தேடல்!

நம் சம்மதம் இல்லாமலே நம்மைப் பிறப்பித்த கருணைக் கடவுள், நம் சம்மதம் இல்லாமலே சாகடிக்கவும் செய்கிறார். இது அநியாயம்!

Feb 6, 2015

கடவுளை உணர ‘அது’ தேவை! எது?

“ஒரு பக்கக் கதைக்குள் இத்தனை பெரிய கடவுள் தத்துவமா!?” என்று இதைப் படித்த பின் நீங்கள் பாராட்டினால் மகிழ்வேன்! “அடேய்...மூடா!” என்று சாடினாலும் மகிழ்ச்சியே!!

ன்மிகச் சொற்பொழிவு நிகழ்த்திக்கொண்டிருந்த மத குரு ஒருவர், “........ஆக, கடவுள் இருப்பதை யாரும் யாருக்கும் காட்ட முடியாது; ஒருவருக்குப் பிறிதொருவர் உணர்த்தவும் முடியாது. ஒருவன் தன்னுள் தானே உணர்வது மட்டுமே சாத்தியம். மனிதராய்ப் பிறந்த ஒவ்வொருவரும், மனத் தூய்மை பெற ஆண்டவனின் இருப்பை உணர்ந்து, அவனை வழிபடுவது இன்றியமையாத் தேவையாகும். அவனை வழிபடுக...பயன் பெறுக” என்று பேருரையை முடித்து மேடையிலிருந்து இறங்கி நடந்தார்.
அவரை வழி மறிப்பது போல் நின்று கொண்டிருந்த ஒருவன், சிரம் தாழ்த்தி, கை குவித்து வணங்கினான்.

“ஏதும் சந்தேகமா?”என்றார் மதகுரு.

“உணர்தல்னா என்ன? எனக்குப் புரியும்படி சொல்லுங்க.” என்றான் அவன்.

அவனைச் சிறிது நேரம் உற்றுப் பார்த்த மதகுரு, ஓங்கி அவன் கன்னத்தில் அறைந்தார்.

அதிர்ச்சியடைந்த அவன், கண்கள் சிவக்க, உதடுகள் துடிக்க, “என்னை ஏன் அடித்தீர்கள்?” என்றான்.

அவன் கேள்வியை அலட்சியப் படுத்திய அவர்,  “நான் அடித்தவுடன் எதிர்பாராத ஒருவித உணர்ச்சிக்கு ஆட்பட்டாய் அல்லவா? அதுதான் ‘கோபம்’கிற குணம். அதை மத்தவங்களுக்கு விளங்கச் சொல்லிப் புரியவைக்க முடியாது. அது உனக்கு மட்டுமேயான ஓர் அனுபவம். அந்த அனுபவத்தில் ஒன்றிப் போவதைத்தான் உணர்தல் என்கிறோம். புரிந்ததா?”என்றார்.

‘புரிந்தது’ என்பதாகத் தலையசைத்தான் அவன்.

“நீ தெருவில் நடந்து போகும்போது, உனக்கு முன்னால் போன ஒரு வயதானவர் மயங்கி விழுகிறார். “ஐயோ பாவம்”னு ஒருவிதத் துடிப்போட ஓடிப் போய் அவருக்குத் தேவையான உதவிகளைச் செய்யறே. அந்தப் பெரியவர் விழுந்ததைப் பார்த்ததும் உனக்குள் ஒருவித அனுதாப குணம் பிறந்தது. அந்தக் குணத்திற்கு நீ ஆட்பட்டிருப்பதை அனுபவித்து அறிந்து கொள்வதுதான் உணர்தல்.....”

“சரிங்கய்யா.”

“ அன்பு, பாசம், கவலை, பொறாமைன்னு  குணங்கள் எத்தனையோ இருக்கு. அன்பின் வசப்பட்டா அதுக்கு அன்புணர்ச்சின்னு பேரு. பாசத்துக்கு உட்பட்டா அது பாச உணர்ச்சி. கொஞ்சம் சிந்தித்தால், நாடி நரம்புகளுக்குள்  இம்மாதிரி உணர்ச்சிகள் ஊடுருவியிருப்பதைப் புரிந்துகொள்ள முடியும். இப்போ உணர்தல்னா என்னன்னு உனக்குப் புரிஞ்சுதா?” என்றார் மதகுரு

“புரிஞ்சுதுங்க.”

“அன்பையும் பாசத்தையும் மத்ததுகளையும் உணர்ற மாதிரி, முயன்றால் கடவுளையும் உணரலாம். உன்னால் முடியும்தானே?” என்றார் மதகுரு.

“முடியாதுங்க.” என்றான் அவன்.

குரலில் ஏமாற்றம் தொனிக்க, “ஏன்?” என்றார் மதகுரு.

“அன்றாட வழ்க்கையில் கிடைக்கிற அனுபவங்கள் மூலமா அன்பு முதலான எல்லாக் குணங்களையும் நான் உணர்ந்திருக்கேன். ஆனா, கடவுளை உணர்றதுக்கான அனுபவம் எனக்கு ஏற்பட்டதே இல்லை.  அதுக்கான வாய்ப்பு இனி இருக்கும்னு நான் நம்பல.” என்று திடமான குரலில் சொன்னான் அவன்.

“கடவுள் உன்னைக் காப்பாற்றுவார்” என்று  ஆசீர்வதித்து நடையைக் கட்டினார் மதகுரு!

*****************************************************************************************************************************************************


18 comments :

  1. வணக்கம் நண்பரே...
    ஆகமொத்தம் இருவருமே... அவரவர்கள் இடத்தில்தான் நிற்கிறார்கள்.
    நான், ஆத்தி,
    நீ நாத்தி

    அடியாத்தி ?
    தமிழ் மணம் 1

    ReplyDelete
    Replies
    1. //நான், ஆத்தி,
      நீ நாத்தி

      அடியாத்தி ?//

      அடுக்குமொழி உங்களுக்குக் கைவந்த கலைதான்.

      நன்றி கில்லர்ஜி.

      Delete
  2. “அன்றாட வழ்க்கையில் கிடைக்கிற அனுபவங்கள் மூலமா அன்பு முதலான எல்லாக் குணங்களையும் நான் உணர்ந்திருக்கேன். ஆனா, கடவுளை உணர்றதுக்கான அனுபவம் எனக்கு ஏற்பட்டதே இல்லை. அதுக்கான வாய்ப்பு இனி இருக்கும்னு நான் நம்பல.”////

    சரியான பதில் சொன்னான்.
    இல்லாத ஒரு விஷயத்தை எப்படியெல்லாம் தினிக்கிரார்கள் என்பதர்க்கு
    சிறந்த எடுத்துக்காட்டே இந்த பதிவு.

    ReplyDelete
  3. இந்தத் திணிப்பு வேலைதான் மக்களை ஆழ்ந்து சிந்திக்க விடாமல் தடுத்துக்கொண்டிருக்கிறது.

    நன்றி மகேஷ்.

    ReplyDelete
  4. அடிவாங்கியவன்
    திருப்பியடித்திருக்கலாம்

    ReplyDelete
    Replies
    1. உங்கள் மன உணர்வை மதிக்கிறேன்.

      நன்றி செந்தழல் சேது.

      Delete
  5. அடியைக் கொடுத்து கோபத்தை புரிய வைக்க முடிந்தவருக்கு கடவுளை ஏன் அதைபோல் புரிய வைக்க முடியலே ?
    த ம 4

    ReplyDelete
    Replies
    1. முடிவதும் முடியாமல் போவதும் அவன் செயல் என்பார்களோ!?

      நன்றி பகவான்ஜி.

      Delete
  6. Replies
    1. அடி வாங்கிய அவனா, மத குருவா?

      நன்றி DD.

      Delete
  7. உணர்தல்தான் கடவுள் என்று புரிய வைத்தீர்கள்! காதலை போல் அதுவும் ஒரு உணர்வுதான். நமக்கு மீறிய ஒரு சக்தியைத்தான் மனிதன் ஆரம்ப காலம் முதல் கடவுள் என்று சொல்லிவந்திருக்கிறான்.

    ReplyDelete
    Replies
    1. ‘நம்மை மீறிய சக்தி....!’

      சக்தியை ‘சக்தி’ என்றே சொல்லலாமே? அதை ஏன் கடவுள் ஆக்கினார்கள்? அந்தச் சக்தியால், அதாவது கடவுளால் உயிர்களுக்கு நன்மை மட்டுமே விளைகிறதா? அதை ஏன் வழிபட வேண்டும்? படைப்புத் தொழிலை அது ஏன் செய்கிறது?

      இப்படி, விடை காணப்படாத கேள்விகள் பல உள்ளன.

      விடை காணும் முயற்சியில் ஈடுபடுவதை விட்டுக் கடவுளை நம்ப வைப்பதில்தான் கருத்தைச் செலுத்தினார்கள்...செலுத்துகிறார்கள் ஆன்மிகவாதிகள்.

      இவை பற்றிய விவாதங்கள் இன்றளவும் தொடர்கின்றன.

      இங்கே நான் எழுப்பிய கேள்வி, கடவுளை உணர வைக்க முடியுமா என்பதுதான்.

      இதற்கு விடை தெரிந்தால் மிக மிக மகிழ்வேன்.

      தங்கள் வருகைக்கும் கருத்துப் பகிர்வுக்கும் மிக்க நன்றி செந்தில் குமார்.

      Delete
  8. //விடை காணும் முயற்சியில் ஈடுபடுவதை விட்டுக் கடவுளை நம்ப வைப்பதில்தான் கருத்தைச் செலுத்தினார்கள்...செலுத்துகிறார்கள் ஆன்மிகவாதிகள்.//

    Excellent Sentence Sir....

    ReplyDelete
    Replies
    1. நன்றி...நன்றி ஏலியன்.

      Delete
  9. அருமையான் குட்டி கதை!

    ReplyDelete
    Replies
    1. நன்றி நாரதன்.

      மிக்க நன்றி.

      Delete