தேடல்!

நம் சம்மதம் இல்லாமலே நம்மைப் பிறப்பித்த கருணைக் கடவுள், நம் சம்மதம் இல்லாமலே சாகடிக்கவும் செய்கிறார். இது அநியாயம்!

Jun 27, 2017

சூரியக்குடும்பம் அழியும்! மனிதன்?!

ஒரு சூரியனும் அதைச் சுற்றி ஏ...ரா...ள நட்சத்திரங்களும் கிரகங்களும் ஒருங்கிணைந்து ஒரு குழுவாய்ச் சுழன்றுகொண்டிருக்கின்றன. இந்த ஒரு குழுவைச் ‘சூரியக் குடும்பம்’ என்கிறார்கள்.
அண்டவெளியில் இம்மாதிரிச் சூரியக் குடும்பங்கள் கணிக்க இயலாத அளவுக்குப் பெரும் எண்ணிக்கையில் இருப்பதாகச் சொல்கிறது அறிவியல்.

மா...மா...மாபெரும் சக்தியின் இருப்பிடமாக உள்ளது சூரியன். அதிலிருந்து ‘சக்தி’ வெளிப்பட்டு, வெளியெங்கும் பரவிக்கொண்டே இருக்கிறது. சூரியனில் உள்ள ‘வாயு’ அணுக்களில் ஏற்படும் வேதியியல் மாற்றங்களால்தான் இந்தச் சக்தி உருவாகிறதாம்.

இன்னும் பல பல பல கோடி ஆண்டுகளுக்கு இந்தச் சக்தியை உருவாக்கத் தேவையான அணுக்கள் சூரியனில் உள்ளன என்றும் விஞ்ஞானிகள் பகர்கிறார்கள். ஆயினும் அந்தோ.....

என்றே.....[சில நிமிடங்களுக்கு நீட்டி முழக்கி வாசிக்கவும்]னும் ஒரு நாள் இந்த அணுக்கள் முற்றிலுமாய் எரிந்து அழிந்துவிட, சூரியனிலிருந்து  சக்தி வெளியாவது நின்றுவிட, சூரியக்குடும்பத்திலுள்ள அத்தனை நட்சத்திரங்களும் கிரகங்களும் படிப்படியாய் அழிந்துபோகுமாம்.

இந்த அழிவைத்தான் ‘நட்சத்திர மரணம்’[Death of Star] என்கிறார்கள்.

இச்செய்தி, என்னைப் போலவே நீங்களும் படித்தோ கேட்டோ அறிந்ததாக இருக்கக்கூடும்.

ஆனால், கீழ்வரும் செய்தி நீங்கள் அறிந்திருப்பதற்கான வாய்ப்பு மிகவும் குறைவாக இருக்கலாம்.

அது.....

#இந்தச் சூரியக்குடும்பம் அழியும்போது நாம் வாழும் பூமியும் சேர்ந்து அழிந்துவிடும்; மனித இனமும் காணாமல் போகும் என்று நீங்கள் நினைத்தால் அது தவறு. பூமி அழியும்.  மனித இனம் அழியாது. மனிதர்கள் வெகு தொலைவிலுள்ள இன்னுமொரு சூரியக்குடும்பத்தின் ஓர் உறுப்பான பூமியில் குடியேறியிருப்பார்கள்# என்பதாகும்.

கடைசிப் பத்திச் செய்தி வெறும் கதையா, கற்பனையா? நம்புவதும் நம்பாமலிருப்பதும் உங்கள் விருப்பம்!

கொசுறு: “மனுச ஜாதி எங்கேயோ இருந்துட்டுப்போகட்டும். அப்போது என் ஆன்மா எங்கே இருக்கும்?” என்று கேட்கிறார் இதை வாசித்த என் எதிர்வீட்டுப் பெரியவர்!!
=====================================================================

Jun 25, 2017

ஓடு...ஓடு...ஓடு! தேடு...தேடு...தேடு!!

நீங்கள் வாசிக்கவிருப்பது ‘தேடோடி’ என்பவர் எழுதியது. பிரபஞ்சத் தோற்றம் குறித்த இவரின் இந்தப் பதிவு நம்மைப் பிரமிப்பில் ஆழ்த்துகிறது. 2015இல் மட்டும் பதிவுகள் எழுதிவிட்டுப் பின்னர் காணாமல் போனாரே, ஏன்? 
அவரின் தளம்http://babutheseeker.blogspot.in/2015/01/blog-post_76.html
எனது புகைப்படம்
ரந்து விரிந்து இருக்கும் இப்பிரபஞ்சத்தில், கோடானுகோடி நட்சத்திரங்களில் கவனத்தையே ஈர்க்காத ஒரு சிறு நட்சத்திரம்தான் நம் சூரியன். அச்சூரியனைச் சுற்றிவரும் கோள்களில் பூமி என்ற கிரகத்தில் வசிக்கும் மனிதர்களாகிய நாம் அற்பத்திலும் அற்பம். ஆனால் அந்த அற்பத்திற்கு அறிவு பெருகும் மூளை என்ற ஒன்றின் வளர்ச்சி மிகச் சிறப்பானது. அச்சிறப்பால், சிந்தனையால் அதற்குள் எழும் கேள்விகள்தான் எத்தனையெத்தனை, எத்தனை அபாரமானவைகள்....?

இதோ தன் தோற்றம் குறித்தும், தானிருக்கும் பிரபஞ்சத்தோற்றம் குறித்தும் அறியப் புறப்பட்டதன் விளைவாக உருவாக்கப்பட்டிருக்கும் கோட்பாடுகளைக் காண்போம். பிரபஞ்சத் தோற்றம் குறித்து பல்வேறு கருத்துகள், கொள்கைகள் நிலவுகின்றன. அவற்றில் சில,

1. ஸ்திர நிலைத் தத்துவம் (Steady State Theory)
2. பெருவெடிப்புக் கொள்கை (Big Bang Theory)
3. கடவுளால் படைக்கப்பட்டது (God's Creation)

இதில் பெருவெடிப்புக் கொள்கை பற்றி இங்கு சற்று பார்ப்போம்.

இன்றிலிருந்து ஏறக்குறைய 13.7 பில்லியன் ஆண்டுகளுக்கு முன் ஏதுமற்ற பாழ்வெளியில், சூனியத்தில், ஓரிடத்தில் மட்டும் ஒரு பொருண்மை இருந்தது. அதி எடையுடன் அனைத்தையும் தனக்குள் அடக்கிக்கொண்டு உள்ளுக்குள் ஒரு பரபரப்பில் இருந்திருக்கவேண்டும். அதனை ஆங்கிலத்தில் Singularity என்கிறார்கள். நாம் தமிழில் அதனை அனைத்தொருமை எனச் சொல்லலாமா..?

அவ்வனைத்தொருமை ஒரு கணத்தில் அதி வேகத்தில் விரிவடையத் துவங்கியது. அந்த அதிவேகத் தொடக்கத்தினைத்தான் நாம் பெருவெடிப்பு என்கிறோம். அதுதான் நம் பிரபஞ்சப் பிறப்பின் முதற்கணம். கணக்கிட முடியாத அளவிற்கான பெருவெப்பம். விரிவிலிருந்து 10ன் அடுக்கு -37வது நொடியில், (அதாவது 0.0000000000000000000000000000000000001 என ஒரு புள்ளி வைத்து 36 சுழியன்கள் போட்டுப் பின் ஒன்று) பிரபஞ்ச வீக்கம் பெறத் துவங்குகின்றது. அப்பொழுது தோன்றுகின்றது முதற்பொருள். Quark-Gluon Plasma (GGP) அல்லது குவார்க் குழம்பி. அதனைத் தொடர்ந்து மற்ற அடிப்படைத் துகள்கள் பிறக்கின்றன.

பெருவெப்பத்தில், அதிவேகத்திலும், ஒன்றோடு ஒன்று மோதி துகள்கள் மற்றும் எதிர்த்துகள்கள் உருவாக்கப்படுகின்றன. உருவான அதே வேகத்தில் அழிக்கவும்படுகின்றன. அப்படியொரு கணத்தில் திடீரென்று Baryogenesis என்றொரு வினை நிகழ்த்தப் பெற்று குவார்க்குகள் மற்றும் லெப்டான்கள் உருப்பெறுகின்றன. இவைகள்தான் நம் இன்றையப் பிரபஞ்சத்தின் பொருள் மற்றும் எதிர்ப்பொருள்களின் (Matter and Antimatter) முன்னோடி.

பிரபஞ்சம் இன்னும் விரிவடையத் துவங்குகின்றது. அளவில் விரிய விரிய வெப்பம் குறையத் துவங்குகின்றது. காரணம் பொருட்களின் சக்தி குறைகின்றன. பல்வேறு தொடர்மாறுதல்களில் இருந்தவைகள் எல்லாம் இப்பொழுது நாம் உணரும் பிரபஞ்சத்தின் இன்றைய அடிப்படை விதிகளுக்குட்பட்டு பொருட்களின் தற்போதைய அமைப்பு உருவாகின்றது.

இதுவரை தன் நிகழ்வில் கண்கொள்ளாக்காட்சியாக இருந்த பெருவெடிப்பு, 10ன் அடுக்கு -11வது நொடியில் தன் வசீகரம் இழக்கத் துவங்குகின்றது. துகள்களின் வேகமும் சக்தியும் இன்றைக்கு நாம் சோதனைச்சாலைகளில் அடைத்துவைத்து சோதிக்கும் அளவிற்குக் குறைகின்றன.

10ன் அடுக்கு -6வது நொடியில் குவார்க்குகளும் குளூவான்களும் ஒன்றிணைந்து பேரியான்களாக (baryon) அதாவது புரோட்டான் நியூட்ரானாக உருவாகின்றன. இப்பொழுது போதுமான வெப்பம் இல்லாத காரணத்தினால் இனி புதிய புரோட்டான்களோ எதிர்-புரோட்டான்களோ உருவாவது நின்று போகின்றது. அதுபோன்றே நியூட்ரான்களும், எதிர்-நியூட்ரான்களும் உருவாவதும் நின்று போகின்றது. பொருண்மை அழிவு துவங்கி (Mass annihilation) சில புரோட்டான் நியூட்ரான்களைத் தவிர மற்றவைகள் அழிவு பெறுகின்றன.

ஒரு நொடி கழித்து இதே போன்றதொரு நிகழ்வு எலக்ட்ரான்களுக்கும் பாஸிட்ரான்களுக்கும் நிகழ்கின்றது. இந்த அழிவுகளுக்குப் பின்னர் எஞ்சியிருக்கும் புரோட்டான்கள், நியூட்ரான்கள் மற்றும் எலக்ட்ரான்கள் முன்புபோல் பிரபஞ்சத்தில் அலையவில்லை. வேகம் குறைந்துவிட்டது. ஆனால், போட்டான்கள் (Photons) பிரபஞ்சத்தினை ஆளுமை செய்யத் துவங்கிவிட்டன நியூட்ரினோக்களின் (Neutrinos) சிறிய பங்களிப்போடு.

பெருவிரிவின் சில நிமிடங்களுக்குப் பிறகு ஏறத்தாழ ஒரு பில்லியன் கெல்வின் அளவிற்கு வெப்பநிலையில் நியூட்ரான்கள் புரோட்டான்களோடு ஒன்றிணைந்து இன்றைய பிரபஞ்சத்தின் டியூட்டிரியம் (Deuterium) மற்றும் ஹீலியம் அணுக்கருவை உருவாக்குகின்றன. இதற்கு பெருவெடிப்பு அணுக்கருச்சேர்க்கை (Big Bang Nucleosynthesis) என்று பெயர். பெரும்பாலான புரோட்டான்கள் நியூட்ரான்களோடு சேராமல், ஹைட்ரஜன் அணுக்கருவாகவே நீடிக்கத் தொடங்கின.

பிரபஞ்சம் குளிரக் குளிர (ஒரு பேச்சுக்குத்தான் குளிர என்கிறோம்... ஆரம்ப கணத்தின் வெப்பத்தினை ஒப்பிடும்பொழுதுதான் இது குளிர். நம்மைப் பொறுத்தவரை இது அதிவெப்பம்தான்.) மிச்சமிருக்கும், பொருண்மை, ஆற்றல் நிறைகள் எல்லாம் ஒன்றாக, ஈர்ப்பு விசை உருவாகின்றது.

3,79,000 ஆண்டுகள் கழித்துதான் அணுக்கருவுடன் எலக்ட்ரான்கள் சேர்ந்து அணுக்களே உருவாகின்றன. பெரும்பாலும் ஹைட்ரஜன் அணுக்கள். அதிலிருந்து கதிரியக்கம் பெருகிப் பிரபஞ்சம் முழுவதும் விரைகின்றன. அதனையே பிரபஞ்சப் பின்புல நுண்ணலைக் கதிரியக்கம் (Cosmic Microwave Background Radiation-CMBR) என்கிறோம். இன்றைக்கும் அதனை நாம் உணர்கின்றோம். இந்த ஒன்றைத்தான் பெருவெடிப்பிற்கான ஆதாரமாக விஞ்ஞானிகள் சுட்டுகின்றனர். இதனைத் தொடர்ந்து பின்னோக்கிப் போய்தான் இத்தனையையும் உணர்கின்றோம்.

அதன் பின்னரே, வெகுகாலத்திற்குப் பிறகு அடர்த்தியான பொருள்கள் ஈர்ப்புவிசையின் காரணமாக ஒன்றிணைந்து, அதனால் ஏற்பட்ட நிறையின் காரணமாக ஈர்ப்பு விசை கூடி மேலும், தன்னைச்சுற்றி உள்ள பொருட்களை மேலும் ஈர்த்து, மேகங்கள், நட்சத்திரங்கள், மண்டலங்கள் மற்றும் இதரவைகளாக உருப்பெற்றன. அதன் பின்னர்தான் நம் சூரியன் மற்றும் கோள்கள். அதற்குப்பின் பல மில்லியன் ஆண்டுகளுக்குப் பின்னர்தான் முதல் உயிரினம். அதற்குப் பின் பல மில்லியன் ஆண்டுகள் கழித்துதான் மனிதன்.

பெருவெடிப்பில் நாம் தவறாகப் புரிந்துகொள்வது

1. பெருவெடிப்பு என்றதும், ஏதோ வாணவெடி வெடித்துச் சிதறுவது போன்று கற்பனை செய்துகொள்கின்றோம். விஞ்ஞானிகள் என்ன சொல்கின்றார்கள் என்றால், அது ஒரு திடீர் விரிவடைவு அவ்வளவுதான் என்கிறார்கள்.

2. அனைத்தொருமை (Singularity) என்றதும், அது ஏதோ விண்வெளியில் இருந்த ஒரு சிறிய புள்ளி போன்ற ஒரு பொருள், அல்லது ஒரு கனன்று கொண்டிருந்த ஒரு நெருப்புப் புள்ளி என்று நினைக்கிறோம். அதுவும் தவறு. நினைவில் கொள்ளுங்கள், பெருவெடிப்பிற்குப் பின்னர்தான் வெளி என்ற ஒன்றே உருவானது. பொருள், நிகழ்வு மற்றும் காலமும் அப்படித்தான்.

அதாவது வெளியில் அந்த அனைத்தொருமை இல்லை. மாறாக வெளியே அந்த அனைத்தொருமைக்குள்தான் இருந்தது. அப்படியென்றால் அது எங்கேதான் இருந்தது? எங்கிருந்து வந்தது? எதற்காக வந்தது? சரியான பதில், நமக்குத் தெரியாது என்பதுதான். உண்மையில் நமக்குத் தெரிந்தது என்றால், நாமெல்லாம் அதற்குள் இருந்து வந்தோம் என்பது மட்டும்தான்.
000000000000000000000000000000000000000000000000000000000000000000

Jun 24, 2017

சில நேரங்களில் சில குடிமகன்கள்!!


இது பழங்கஞ்சி! ‘புதுசு புதுசா’ தேடுபவர்களுக்கு[கதைகளைச் சொன்னேன்]ப் பிடிக்குமா? ஒரே ஒரு முறை ருசித்துப் பார்க்கலாம்!
“உங்க கம்பெனி வாட்ச்மேன் சேது வந்திருந்தார். உங்களைப் பார்த்தே ஆகணும்னு ரெண்டு மணி நேரம் காத்திருந்தார். மறுபடியும் வர்றதாச் சொல்லிட்டுப் போனார்.”

-கம்பெனி வேலையாக இரண்டு நாள் வெளியூர்ப் பயணம் போய்விட்டுத் திரும்பிய கணேசனிடம் அவன் மனைவி சவீதா சொன்னாள்.

“என்ன விஷயம்னு கேட்டியா?”

“கேட்கல.” -சொல்லிக்கொண்டே சமையல் கட்டில் புகுந்தாள் சவீதா.

‘எதற்கு வந்தான் சேது? டியூட்டி நேரத்திலும் போதையில் மிதப்பவன். டிஸ்மிஸ் செய்வதாகப் பல தடவை மேனேஜர் எச்சரித்திருந்தார். செய்துவிட்டாரோ?’ என்று சந்தேகப்பட்டான் கணேசன். தான் மேலாளருக்கு நெருக்கமானவன் என்பதால் சிபாரிசுக்காக வந்திருப்பான் என்றும் நினைத்தான்.

வாழ வேண்டிய வயதில் குடித்துக் கெட்டவன் சேது. குறையக் குறையக் குடித்துவிட்டு நடைபாதையில் விழுந்து கிடப்பான். நான்கைந்து தடவை ஆட்டோ பிடித்து அவனை வீடு சேர்த்திருக்கிறான் கணேசன்.



சேது மீண்டும் வந்தான். நடையில் தள்ளாட்டம்.

“வாப்பா சேது. ஏற்கனவே வந்துட்டுப் போனியாமே. என்ன விஷயம்?” என்றான் கணேசன்.

“ஒரு முக்கியமான விஷயம்.....”

“சொல்லுப்பா.”

“குடிச்சிட்டுத் தெருவில் கிடக்கிற என்னை அடிக்கடி நீதான் வீட்டில் கொண்டுபோய்ச் சேர்க்குறே. ......” -நா குழற, தெளிவற்ற வார்த்தைகளை உதிர்த்தான் சேது.

தொடர்ந்தான்: “இதோ பாரு சார், நான் குடிச்சிட்டு நடைபாதையில் கிடப்பேன்; நடுத் தெருவிலும் கிடப்பேன். உனக்கு எதுக்கு இந்த வேலை?”

சேதுவின் கேள்வி, கணேசனை அதிர்ச்சிக்குள்ளாக்கியது. ”ஒரு உதவிதானேப்பா” என்றான்.

“எனக்கு உதவி செய்யுறேன் பேர்வழின்னு இனியும் என் வீடு தேடி வர்ற வேலையை உட்டுடு. ஆளு அம்சமா இருக்கே. கையில் தாராளமா காசு புரளுது. வெகு சுளுவா நீ என் பெண்டாட்டியைக் கணக்குப் பண்ணிடுவே. என்ன...சொன்னது புரிஞ்சுதா?” என்றான் சேது.

சொல்லிவிட்டுத் தள்ளாடியபடியே புறப்பட்டுப் போனான்.

புன்னகை படர்ந்த முகத்துடன் அவன் போவதையே பார்த்துக் கொண்டிருந்தான் கணேசன்.

“அவன் உங்களை அவமானப் படுத்திட்டுப் போறான். கோபப்படாம சிரிச்சிட்டே இருக்கீங்களே?” -சவீதா கேட்டாள்.

“சிரிக்காம என்ன செய்யுறது? அவன் பெண்டாட்டி இன்னொருத்தனோட ஓடிப் போயி ஆறு மாசம் போல ஆகுது. அதை மறந்துட்டு, போதையில் இப்படி உளறிட்டுப் போறான்” என்றான் கணேசன்.

=====================================================================
முன்னொரு காலத்தில் ‘இதயம் பேசுகிறது’ன்னு ஒரு வார இதழ் வந்திட்டிருந்துதே நினைவிருக்குங்களா? அதுல[23.01.2000 'இதயம் பேசுகிறது' இதழில் வெளியானது இந்தக் கதை. கதாசிரியர்?

வேறு யார்? உங்கள் ‘பசி’பரமசிவம்தான்!

Jun 22, 2017

‘பதஞ்சலியும் யோகாவும்!’.....சில ‘பரபர’ தகவல்கள்!

‘மனதில் எந்தவொரு பற்றுக்கும்/நினைவுக்கும் இடம்தராமல் அதனை வெறுமையாக வைத்துக்கொள்ளப் பயிலுவதே ‘யோகா’வின் அடிப்படை நோக்கம்’ என்கிறார்கள்.

‘பதஞ்சலி யோக சூத்திரம்’ என்பது யோகக் கலை பற்றிய நூல். இதை எழுதியவர் பதஞ்சலி முனிவர்.
பதஞ்சலி முனிவர் கி.மு. நான்காம் நூற்றாண்டில் வாழ்ந்தவர் என்பது பொதுவான ஊகம். கி மு இரண்டாம் நூற்றாண்டில் என்று சொல்பவர்களும் உண்டு. யோக சூத்திரங்கள் 1]சமாதி, 2 சாதனை, 3 விபூதி, 4 கைவல்யம் என்று நான்கு பாதங்களிலாக 195 சூத்திரங்கள் கொண்டது’ என்கிறது ‘விக்கிப்பீடியா

#இந்தச் சூத்திரத்தில் மூன்று சொற்கள் உள்ளன. மூன்று தன்னிலைகள் என இதை வகுக்கலாம். திருஷ்டு என்றால் பார்ப்பவன், அவதானிப்பவன், உணர்பவன். மனதை உணரும் தன்னிலை என்று இதைச் சொல்லலாம்[புரிகிறது]. இரண்டாவது சொல் ஸ்வரூபம். தன்னுடைய உண்மையான அகநிலை. அல்லது தூய தன்னிலை. இங்கே இன்னும் அது ஒரு உருவகம்தான். மூன்றாவது அவஸ்தை. அந்த தூய நிலையில் உறைதல் என்ற நிலை. தான் என தன்னை உணர்பவன் அந்த உணர்தல் மூலம் உருவாகும் அலைகள் அனைத்தையும் அடக்கி இல்லாமலாக்கிக் கொண்டால் மட்டுமே தூய தன்னிலையாக தன்னை உணர்ந்து அந்நிலையில் அமைய முடியும் என்று இச்சூத்திரத்தை விளக்கலாம்[முடிவற்ற அறிதல்: பதஞ்சலி யோக சூத்திரத்துக்கு எளிய விளக்கம்2 http://www.jeyamohan.in/771#.WUvkMGiGPIU ]

-இத்துடன் நிற்காமல் மேலும் விளக்கிக்கொண்டே போகிறார் பிரபல எழுத்தாளர் ஜெயமோகன். ‘தாங்காதுடா சாமி’ என்று தலைமுடியைப் பிய்த்துக்கொண்டு ஓடி வந்துவிட்டேன்.

#யோகா என்பது ஒன்றிணைப்பதை குறிக்கும் ஓரு விசாலமான வார்த்தை. ஓன்றிணைக்க உதவும் எதுவும் யோகா என்று அழைக்கப்படும். வேறு வார்த்தைகளில் சொல்ல வேண்டுமானால் இந்த எளிமையான சுவாசத்தில் இருந்து, அமர்தல், நடத்தல், உண்ணுதல் மற்றும் மனிதன் செய்யும் எந்த செயலையும் யோகாவாய் மாற்ற முடியும். நீங்கள் இப்போது உண்கிறீர்கள், அப்போது, நாம் அல்லாத ஓன்றை நம்முடைய ஓரு பகுதியாக மாற்றுகிறோம் என்ற விழிப்புணர்வு இருக்குமானால் பத்து நிமிடங்களுக்கு முன் நாம் அல்லாத ஒன்றை, நம்மோடு ஓன்றிணைக்கிறோம் என்பது உங்கள் அனுபவமாக இருக்குமானால், அப்போது, அதனை நீங்கள் “உண்ணும் யோகா” என்றழைக்கலாம்.’ - இது பிரபல ஆன்மிகவாதி ஜக்கி வாசுதேவ் தரும் விளக்கம்.

‘நாம் அல்லாத ஒன்றை நம்முடையதாக மாற்றுகிறோம்’ என்கிறார்.
நாம் எங்கே மாற்றுகிறோம்? அதுவாகத்தானே மாறுகிறது!

‘நாம் அல்லாத ஒன்றை நம்மோடு ஒன்றிணைக்கிறோம் என்பது உங்கள் அனுபவமாக இருக்குமானால் அதனை நீங்கள் உண்ணும் யோகா என்று அழைக்கலாம்’ என்றும் சொல்கிறார் ஜக்கி. [‘ஈஷா’ http://isha.sadhguru.org/blog/ta/patanjali-naveena-yogavin-thanthai/

உண்ணுகிறோம். அது சத்தாக மாறுகிறது. அவ்வளவுதான். இதற்குப் பேரு உண்ணும் யோகாவாம்? நன்றாகவே காதில் பூச்சுற்றுகிறார் உலகமகா யோகி.

இவர் தொடர்ந்து தரும் விளக்கங்களும் இந்த லட்சணத்தில்தான் இருக்கின்றன.

யோகா என்ற வார்த்தை, பண்டைய காலங்களில் குறிப்பிட்ட ஒரு புரிதலோடு உபயோகப்படுத்தப்பட்டது. ஆனால் இன்று அது தளர்வான, அற்பமான பொருளில் உபயோகப்படுத்தப்படுகிறது. மேற்கு நாடுகளில் இன்று “தண்ணீர் யோகா, நாய் யோகா, பூனை யோகா” என்று பலதும் இருக்கின்றன. இது தவறான புரிதல். மேம்போக்கான யோகா மட்டுமே, மேற்கு நாடுகளுக்கு சென்றிருக்கிறது. யோகாவின் ஆத்மா அல்ல. இது மிகத் தீவிரமான பிரச்சினை. யோகாவை ஒரு பயிற்சி என எண்ணுவது, இறந்த குழந்தையைப் பெறுவதைப் போன்றது. அதில் உயிர் இருக்காது.

‘குறிப்பிட்ட ஒரு புரிதலோடு...’ -அதென்ன குறிப்பிட்ட புரிதல்?[விளக்கம் தரப்படவில்லை]

‘யோகாவின் ஆத்மா’[என்கிறார்] - என்னய்யா இது, புதுக் கதை! உடம்புக்குள்ள ‘ஆத்மா’ இருக்கிறதா கதையடிச்சிட்டிருக்கீங்களே, போதாதா?

மேற்கண்ட இரு பிரபலங்களும் இவர்களைப் போன்ற பிற பிரபலங்களும் தரும் விளக்கங்களைச் சுற்றிவளைக்காமல் சுருக்கிச் சொன்னால்.....

பதஞ்சலி யோகா என்பது, ‘மனதில் எந்தவொரு பற்றுக்கும் இடம் தராமல் அதனை வெறுமையாக வைத்துக்கொள்ளப் பயிலுவதே’[அப்படி வைத்துக்கொள்வதால் நன்மைகள் விளைகின்றனவாம். அது குறித்த ஆய்வு இங்கு தேவையில்லை]. 

எந்தவொரு பற்றுக்கும்/எண்ணங்களுக்கும்  இடம் தராமல் மனதை வெறுமையாக வைத்துக்கொள்வது என்பது ஆழ்ந்த உறக்கத்திலும்கூட இயலாத காரியம்; செத்துப் பிணமான பின்னரே இது சாத்தியம்.

மேலும், திருமூலர் காலத்தவரான பதஞ்சலியின் வரலாறாகக் குறிப்பிடப்படும் தகவல்களில் பலவும் கற்பனையில் உதித்தவை.

‘அத்ரி மகரிஷி’ என்றொரு முனிவர். அவரின் மனைவி அனுசூயை.

மும்மூர்த்திகளும் தனக்குப் பிள்ளைகளாகப் பிறக்க வேண்டும் என்று இந்த முனி ஆசைப்பட்டதன் விளைவாகப் பிறந்த மூன்று பேரில் இந்தப் பதஞ்சலியும் ஒருவராம். இவர் மனித முகமும் பாம்பு உடலும் வாய்க்கப்பெற்ற சித்தர்...இப்படிப் போகிறது கதை[மேலே தலைப்பில்[Header] உள்ளவர்தான் பதஞ்சலி. ஜக்கி வாசுதேவின் ‘ஈஷா’ தள உபயம்]. கதைதானே...இருக்கட்டும்.

இந்த இந்திய தேசத்தின் பிரதமர்,  ஜக்கி வாசுதேவ். யோக[கா] குரு எனப்படும் பாபா ராம்தேவ் போன்றவர்களால்,  இந்த யோகா[21.06.2017 யோகா தினம். அனைத்து நாளிதழ்களிலும் செய்திகள்] உலக அளவில் பிரபலம் ஆகியுள்ளதே தவிர இதனால் விளையும் பயன்கள் உறுதி செய்யப்பட்டனவா என்பது தெளிவாக அறியப்படவில்லை.

மூச்சுப் பயிற்சியில் நிச்சயம் பலன் உண்டு. உடம்பை வளைத்தும் இறுக்கியும் முறுக்கியும் செய்யப்படும் உடற்பயிற்சிகளால் நன்மைகள் மட்டுமே விளைகின்றனவா? தீமைகளே இல்லையா?

ஆய்வுகளின் மூலம் யோகா என்னும் உடற்பயிற்சியால் விளையும் நன்மைகள் உறுதி செய்யப்பட்ட பிறகே அது பிரபலப்படுத்தப்படல் வேண்டும். ஆனால்.....

யோகாவை மையப்படுத்தி ஏதேதோ நடக்கிறது; நடந்துகொண்டிருக்கிறது.

நம் மக்கள் சிந்திக்கத் தெரிந்தவர்கள். இது குறித்தும் தீவிரமாகச் சிந்திப்பார்கள்தானே?
===============================================================================














Jun 21, 2017

காக்கும் கடவுள் விஷ்ணுவா, கர்னாடகக் காவலரா? சிலை யாருக்கு?!

இன்றைய நாளிதழில்[‘தி இந்து’ 21.06.2017]  இருவேறு மாறுபட்ட செய்திகள் வெளியாகியுள்ளன. ஒன்று இன்புறுத்தியது. மற்றொன்று துன்புறுத்தியது!

#பெங்களூர் சென்ற குடியரசுத் தலைவர் பிரணாப் முகர்ஜி, 17ஆம் தேதி திட்டமிடப்பட்ட தம் பணியை முடித்துக்கொண்டு, பாதுகாப்பு வாகனத்தில் ராஜ்பவன் நோக்கிச் சென்றுகொண்டிருந்தார்.

குடியரசுத் தலைவரின் பாதுகாப்பு வாகனங்கள் டிரினிட்டி சதுக்கம் அருகே வந்தன. அதே நேரத்தில், எதிர்த் திசையில் வந்த ஆம்புலன்ஸ் வாகனம் ஒன்று போக்குவரத்து நெரிசலில் சிக்கித் தன் பயணத்தைத் தொடர இயலாமல் திணறி நின்றது.

இதைக் கவனித்த, டிரினிட்டி சதுக்கப் போக்குவரத்துக் காவல் துணை ஆய்வாளர் நிஜலிங்கப்பா, நிற்காமல் வந்துகொண்டிருந்த பிரணாப் முகர்ஜியின் பாதுகாப்பு வாகனங்களைத் தடுத்து நிறுத்தி, ஆம்புலன்ஸ் செல்வதற்கு முதலில் வழி ஏற்படுத்தினார். முகர்ஜியின் பாதுகாப்பு வாகனங்களைக் கடந்து சென்றது ஆம்புலன்ஸ்# - இது ஒரு செய்தி.
மற்றொரு செய்தி:
#கர்னாடக மாநிலம் பெங்களூரு தெற்கு, ஈஜிபுரா பகுதியில் கோதண்ட ராமசாமி கோயில் உள்ளது. இந்தக் கோயிலில், 64 அடி உயரத்தில் விஸ்வரூப மகா விஷ்ணு சிலை[பீடத்தைச் சேர்த்து 108 அடி உயரம்] நிறுவுவதற்குக் கோயிலின் அறக்கட்டளை முடிவெடுத்திருந்தது.

இந்தச் சிலைக்காக, வந்தவாசி அருகே கொரக்கோட்டை கிராமத்தில் பாறையை வெட்டி எடுத்து 400 டன் எடையில் 64 அடி உயரத்தில் விஷ்ணுவின் சிலை செதுக்கப்பட்டுள்ளது[விஷ்ணுவின் முகம், சங்கு சக்கரம் மற்றும் கைகள் மட்டுமே செதுக்கப்பட்டுள்ளன. சிலை, பெங்களூரு கொண்டுசெல்லப்பட்ட பிறகு எஞ்சிய பகுதிகள் செதுக்கப்படும்]. கூடவே, 24 அடி உயரத்தில் ஆதிசேஷன்{7 தலைப் பாம்பு} சிலையும் வடிவமைக்கப்பட்டுள்ளது#
இந்தப் பிரமாண்ட சிலைக்கான கல் செயற்கைக்கோள் மூலம் தேடப்பட்டதாம். பல நாட்கள் தேடித் தேடித் தேடி திருவண்ணாமலை மாவட்டம் வந்தவாசி அருகே கொரக்கோட்டை கிராமத்தில் கண்டுபிடிக்கப்பட்டதாம்.

மத்திய மாநில அரசுகளிடம் அனுமதி பெற்று, கற்களை வெட்டி எடுத்துச் சிலையை வடிவமைக்கும் பணி 2014ஆம் ஆண்டு தொடங்கப்பட்டதாம்.

அடுத்து வரும் செய்தி வெகு வெகு வெகு சுவாரசியம்.

#சிலைகள், 170 மற்றும் 96 டயர்களைக் கொண்ட கார்கோ லாரிகள் மூலம் வந்தவாசி, வேலூர், கிருஷ்ணகிரி வழியாக பெங்களூரு கொண்டுசெல்லப்படும்.

அதிக பாரம் கொண்ட கார்கோ வாகனங்கள் செல்வதற்கான அனுமதியை மத்திய மாநில அரசுகளிடம் அறக்கட்டளை நிர்வாகிகள் பெற்றுள்ளனர். செல்லும் வழியிலுள்ள பாலங்களின் உறுதித்தன்மையை வல்லுனர்கள் ஆய்வு செய்துள்ளனர். பாலங்களுக்கு அடியில் கூடுதல் ஜாக்கிகள் பொருத்தப்பட உள்ளன. மணல் மூட்டைகளை அடுக்கவும் திட்டமிடப்பட்டுள்ளது#

காக்கும் கடவுள் எனப்படும் விஷ்ணுபகவான் பற்றிக் கொஞ்சமும் வஞ்சனையில்லாமல் வகை வகையான ஆபாசக் கதைகளை அருளிச் சென்றிருக்கிறார்கள் நம் மூதாதையர்கள். கதைகளை அடிப்படையாகக்கொண்டு நாடெங்கும் நிறுவப்பட்டுள்ள சிலைகளுக்கும் பஞ்சமில்லை.

இப்போது, 108 அடி உயரத்தில் 400 டன் எடையில் பெங்களூருவில் விஷ்ணு பகவானுக்குப் பிரமாண்ட சிலை!

இருக்கிற சிலைகள் போதாவா? இருக்கிற மூடநம்பிக்கைகள் போதவில்லையா?

இந்த அநாவசிய வெற்றுப் பணி[?]க்கு அறிவியல் தொழில்நுட்ப உதவி வேறு!  மத்திய மாநில அரசுகளின் பேராதரவு வேறு.

கேள்வி கேட்பார் இல்லையா?

கொஞ்சம் கொஞ்சமாகவேனும் மூடநம்பிக்கைகளிலிருந்து மக்கள் விடுபடவே கூடாது என்று கங்கணம் கட்டிக்கொண்டிருக்கிறார்களா விஷ்ணு[கடவுள்] பக்தர்கள்!

இனியேனும் ஆபாசக் கடவுள்களுக்குச் சிலைகள் நிறுவுவதைத் தடுத்தி நிறுத்தி, மனித நேயத்தின் உச்சத்தைத் தொட்ட நிஜலிங்கப்பா[இவர், குடியரசுத் தலைவருக்குப் பதிலாகக் கடவுளே வந்திருந்தாலும் தடுத்து நிறுத்தியிருப்பார். இந்தத் துணிச்சலான செயலுக்கு இவரைத் தூண்டியதே கடவுள்தான் என்று எவரும் குரல் எழுப்ப வேண்டாம்] போன்றவர்களுக்குச்  சிலைகள் நிறுவினால் மக்கள் மனங்களில் மனிதநேயம் வளரும்.

நாடெங்கிலும் உள்ள நற்சிந்தனையாளர்களும் மனிதநேயம் மிக்கவர்களும் ஒருங்கிணைந்து துணிந்து போற்றுதற்குரிய  இம்மாதிரிப் பணிகளை மேற்கொள்ளுதல் உடனடித் தேவை.

செய்வார்களா? மக்களின் ஆதரவு கிடைக்குமா?
===============================================================================

Jun 19, 2017

கல்லில் பலன் சொன்ன கில்லாடி ஜோதிடர்! [பொழுதுபோக்கு]

இது, என் சொந்தக் கதையல்ல; ‘சுட்ட’ கதைதான். எங்கிருந்து சுட்டேன் என்பது எனக்கே நினைவில்லை. உங்களுக்குத் தெரிந்தால் சொல்லுங்கள். இங்கு பதிவு செய்துவிடலாம். [ஜோதிடம் பொய் என்றாலும், தம் படிப்பறிவால் நேர்மையாகப் பலன் சொல்லும் ஜோதிடர்களும் இருக்கிறார்கள்{வெகு அரிதாக}. அவர்களை வருத்துவது என் நோக்கமல்ல]].

ரு கிராமத்தில் ஒரு ஜோதிடர் இருந்தார்; மகா கெட்டிக்காரர்.

ஒரு நாள் ஒரு வீட்டிற்கு ஜோஸ்யம் சொல்லப் போனார். அந்த வீட்டுப் பையன் நோய்வாய்ப்பட்டிருந்தான். “கிரஹங்களின் சஞ்சாரப்படி பையனுக்கு நேரம் சரியில்லை” என்றார் ஜோதிடர்.

“பரிகாரம் பண்ணுங்க” என்றனர் பையனின் பெற்றோர்.

தம் கைப்பையில் சேகரித்துவைத்திருந்த  சிறிய கற்களில் ஒன்றை எடுத்து வைத்து அதற்கு ஏதேதோ சடங்குகள் எல்லாம் செய்து முடித்து, தமக்குரிய காணிக்கையைப் பெற்றுக்கொண்டு கல்லை மட்டும் கொடுத்துவிட்டுப் புறப்பட்டார் ஜோதிடர்.
“பையனுக்கு நோய் குணமாகுமா?” என்றார்கள் பையன் வீட்டார்.

‘காத்திருங்கள்” என்று மட்டும் சொல்லி விடைபெற்றார் அவர்.

இன்னொரு வீட்டார் வந்து அவரை அழைத்துப் போனார்கள். அந்த வீட்டிலும் ஒரு சிறுவன் உடல்நலமின்றிப் படுத்திருந்தான். ஜாதகனுக்குத் தோஷம் இருப்பதாகச் சொன்ன ஜோதிடர், அங்கேயும் ஒரு கல்லுக்குச் சடங்குகள் செய்து முடித்து, அதைக் கொடுத்துவிட்டு, “காத்திருங்கள்” என்று சொல்லிக் காணிக்கையும் பெற்றுக்கொண்டு போனார்.

மாதம் ஒன்று கழிந்தது.

ஜோதிடர் முதலாவதாகக் கல் கொடுத்த வீட்டுக்காரர்கள் அவரைத் தேடிவந்து, “ஐயா, பையன் செத்துப் போய்ட்டானய்யா” என்று அழுது அரற்றினார்கள்.

“உங்க தலையில் கல்லைத் தூக்கிப் போட்டுட்டுப் போவான் என்பதை உணர்த்தத்தான் ஒரு கல்லைக் கொடுத்துவிட்டு வந்தேன்” என்றார் ஜோதிடர்.

இரண்டாவது வீட்டுக்காரர்களும் அப்புறம் ஒரு நாள் தேடிவந்தார்கள்; “உங்க புண்ணியத்தில் பையன் பிழைச்சுட்டான்” என்றார்கள்.

ஜோதிடர் சொன்னார்: “பையனின் ஆயுள் கல்லைப் போலக் கெட்டியானதுன்னு உணர்த்தத்தான் கல்லைக் கொடுத்துட்டு வந்தேன்.”

‘பசி’பரமசிவம்: நாட்டில் ஜோதிடத்தின் பெயரால் ஏதேதோ நடக்குதுங்க. அறிவு ஜீவியான நானே ஏமாந்திருக்கேன்!

நீங்க? 
***********************************************************************************************************************

Jun 18, 2017

பெரியார் சொன்ன ‘குள்ளநரி’க் கதை!

‘பெரியார் இந்தக் கதையை ஏன் சொன்னார்?’ என்ற கேள்வி இப்போது வேண்டாம். கதை, வெகு சுவையானது! படித்து இன்புறுங்கள்!!
ற்றில் வெள்ளம் பெருக்கெடுத்து ஓடியது. ஒரு குள்ளநரி வெள்ளத்தில் சிக்கி உயிருக்குப் போராடிக்கொண்டிருந்தது.

கரையில் நின்று வேடிக்கை பார்த்துக்கொண்டிருந்த மனிதர்களைப் பார்த்து, “ஐயோ...ஐயோ...என்னைக் காப்பாத்துங்களேன்” என்று அபயக்குரல் கொடுத்தது.

மனிதர்களில் எவரும் கண்டுகொள்ளவில்லை.

வெள்ளத்தில் தத்தளித்துக்கொண்டே சிறிது நேரம் யோசித்த குள்ளநரி, “ஐயோ...உலகம் அழியப்போவுது! ஒட்டுமொத்த உலகமும் அழியப்போவுது”ன்னு கூக்குரல் எழுப்பியது; எழுப்பிக்கொண்டே இருந்தது.

மனிதர்களில் ஒருவர், “குள்ளநரி, உலகம் அழியப்போவுதுன்னு சொல்லுதே” என்றார் பதற்றத்துடன்.

“அது ஏதோ உளறுது” என்றார் மற்றொருவர்.

“அப்படியில்ல. ஒருவேளை உண்மையா இருந்துட்டா[“கிழவன் கடவுள் இல்லேன்னு சொல்றான். ஒருவேளை கடவுள் இருந்துட்டா நம்மையெல்லாம் தண்டிப்பார். எதுக்கும் கும்பிட்டு வைப்போம்”னு நம்மவர்கள் சொல்ற மாதிரி!] நாம் எல்லாரும் அழிஞ்சிடுவோமே. எதுக்கும் நரியைக் காப்பாத்தி விசாரிப்போம்” என்றார் வேறொருவர்.

“அப்படியே செய்வோம்” என்றார்கள் மற்றவர்கள்.

எல்லாருமா நீந்திப்போய் குள்ளநரியைப் பத்திரமா கரை சேர்த்தார்கள்.

எல்லோரும் ஒருமித்த குரலில் கேட்டார்கள்: “உலகம் அழியப்போகுதுன்னு சொன்னியே, நிஜமா?”

நீண்ட பெருமூச்சு விட்டுத் தன்னை ஆசுவாசப்படுத்திக்கொண்ட குள்ளநரி, “உண்மையைச் சொல்லி என்னைக் காப்பாத்துங்கன்னு கெஞ்சினேன். ஒருத்தனும் கண்டுக்கல. உலகம் அழியப்போகுதுன்னு ஒரு பொய்யை அவிழ்த்துவிட்டதும், அதை நம்பி அலறியடிச்சிட்டு வந்து என்னைக் காப்பாத்துனீங்க. இனியாவது உண்மையை மதிக்கக் கத்துக்கோங்கடா முட்டாள்களா”ன்னு சொல்லிட்டு அங்கிருந்து ஓட்டம் பிடித்தது. 
===============================================================================
பெரியார் சொன்ன ஆறுவரிக் கதையை அரைப்பக்கக் கதையாக்கியிருக்கிறேன். பெரியார் ஆவி[!!!!!] என்னை மன்னிக்கட்டும்!


Jun 16, 2017

விதியும் கடவுளும் வில்லங்க மனிதர்களும்!!

‘விதி’ பற்றிய முற்றிலும் புதுமையானதொரு பார்வை. படியுங்கள். கொஞ்சமேனும் பயன் விளையலாம்.
நாம்  விரும்பாதவை, அல்லது எவராலும் விரும்பத்தகாதவை நடந்தால், அவற்றிற்கு  ‘விதி’யைக் காரணம்  காட்டுகிறோம். தீராத நோயின் தாக்குதல்; எதிர்பாராத சாவு; காதல் தோல்வி என்றிப்படி நிறையச் சொல்லலாம்.

நோய்நொடி அண்டாமல் முழு உடல்நலத்துடன் வாழவே நாம் விரும்புகிறோம். கொடிய நோய்கள் நம்மைத் தாக்கும்போது விதியை நொந்துகொள்கிறோம். நம்மைப் படைத்து மண்ணில் வாழப் பணித்தவர் கடவுள் எனின், நோய்களையும் படைத்து[படைப்பாளி அவர் மட்டுமே என்பதைக் கருத்தில் கொள்க] நம் மீது தாக்குதல் தொடுப்பவர்  அவரே என்பதால் நம் வாழ்வில் ‘விதி’  புகுந்தது எப்படி?

காதல், காமம், ஆசை, பாசம், நேசம், பொறாமை என்று விதம் விதமான உணர்ச்சிகளுடன் நம்மை நிலவுலகில் உலவவிட்டவரும் கடவுளே. உணர்ச்சிகளுடன் போராடுவதோடு உணர்ச்சியுள்ள மனிதர்களுடனும் போராடுகிறோம். போராட்டத்தில் வெற்றியும் தோல்வியும் தவிர்க்க இயலாதவை. வெற்றியைத் தழுவும்போது கடவுளைப் போற்றுவதும் தோற்கும்போது  விதியைக் காரணம் காட்டுவதும் அறியாமையின் உச்சமல்லவா?

நிலநடுக்கங்களையும் சுனாமிகளையும், பஞ்சம், தீராத வறுமை போன்றவற்றையும் கோரத்தாண்டவம் ஆடவிட்டுப் பல்லாயிரக் கணக்கில் உயிர்களைச் சாகடிப்பவர் கடவுளாக  இருக்கையில், கண்ணுக்குத் தெரியாத விதியைக் காரணம் ஆக்குவது விந்தையிலும் விந்தையல்லவா!?

புதிய புதிய கொலை ஆயுதங்களைக் கண்டுபிடிப்பதற்கான அதிபுத்திசாலித்தனத்தை மனிதனுக்கு அள்ளி அள்ளி வழங்கியவர் கடவுள். இதன் விளைவு.....

வெடி விபத்து, வாகன விபத்து என்று வகை வகையான விபத்துகளில் சிக்கி, வகைதொகையின்றிச் செத்துத் தொலைக்கிறான் மனிதன். விபத்துகளுக்கு மூலகாரணமான கடவுளைப் புறந்தள்ளி, விதியே விபத்துகளுக்குக் காரணம் என்பது அறிவுடைமை அல்லவே!

“நான் மனதாலும் பிறருக்குக் கெடுதல் நினைத்ததில்லை. எனக்கு ஏன் இத்தனை கஷ்டங்கள்? எல்லாம் என் தலைவிதி...விதி” என்று நாளும் புலம்புவோர் நம்மில் கணக்கிலடங்காதவர். விதியை வகுத்தவர் கடவுள்[என்று சொல்லப்படுபவர்]  என்கிறார்கள். எல்லாம் கடவுளே என்னும்போது, ‘விதி’ என்ற ஒன்று எதற்கு?

“அவன் ரொம்ப ரொம்ப நல்லவனாயிற்றே, அவனா எனக்குத் துரோகம் செய்தான்? நம்ப முடியல. எல்லாம் விதியின் விளையாட்டு” என்று மாய்ந்து மாய்ந்து சொல்லிக் கலங்கும்  மாந்தர் நம்மில் மிகப்பலர். கடவுளின் படைப்பில், ரொம்ப ரொம்ப நல்லவனும் இல்லை; ரொம்ப ரொம்பக் கெட்டவனும் இல்லை என்பதை மறந்துவிட்டு, இல்லாத விதியின் மீது பழி போடுவது தவறல்லவா? இவ்வாறாக.....

நல்லவை நடந்தால் கடவுளைத் துதி பாடுவதும், அல்லவை விளைந்தால் அவரை நிந்திக்க மறுத்து, சாத்தானைச் சாடுவதையும், விதியை நொந்துகொள்வதையும் வழக்கம் ஆக்கிக்கொண்டார்கள் மனிதர்கள். 

இது எத்தனை பெரிய தவறு?

இந்தத் தவற்றை இவர்கள் தெரிந்தே செய்கிறார்களா, செய்யும்படிக் கடவுள் தூண்டுகிறாரா?!

பதில் தெரிந்தவர் யார்?
+++++++++++++++++++++++++++++++++++++++++++++++++++++++++++++++++++++++++++++++

உங்கள் பறவைப் படம் பார்த்ததும் என் ஒரு போஸ்ட் நினைவு வந்துவிட்டது... நேரம் இருப்பின் பார்த்து அழுங்கோ விதியை நினைச்சு ஹா ஹா ஹா:)..

http://gokisha.blogspot.com/2012/02/blog-post_24.html

Friday, 24 February 2012

‘அதிரா’ வின் கீழ்க்காணும் பதிவை வாசித்து நீங்களும் அழலாம்.....
பாரம்மா பறவைக்கும் பாசங்கள்..இருக்கின்றது..
து எனக்கு, சில மாதங்களின் முன்பு கொசு மெயிலுக்கு வந்திருந்தது, பார்த்ததும், மீண்டும் பார்க்க முடியாமல் அப்படியே விட்டுவிட்டேன்... இன்று போடலாமே, விலங்குகளின் பாசத்தை மனிதர்களும் உணர்வோமே, ஏதோ நாம் மட்டும்தான் அன்பில், பாசத்தில் ஓங்கி உயர்ந்து நிற்கிறோம் என எண்ணிக் கொண்டிருக்கிறோம், விலங்குகளின், பறவைகளின் பாசத்தை உணர்ந்தாலும், அதை நாம் பெரிது படுத்துவதில்லை, ஆனால் இதைப் பார்த்ததும், இதயம் கரைந்துவிடுகிறது... நீங்களும் பாருங்கோ....

காதல் ஜோடியாகப் பறந்தபோது, பெண் பறவையைக் கார் அடித்துவிட்டது..., நடக்க முடியாமல், கரையை நோக்கி தவழ முயற்சிக்கிறது.... 
விதி செய்த சதியோ அத்தான்...

அதைப் பார்த்த ஆண் பறவை, ஓடிச்சென்று, உணவெடுத்து வந்து ஊட்டுகின்றது..
பாரம்மா பறவைக்கும் பாசங்கள் இருக்கின்றது, பறந்தோடி இரைதேடி, துணைக்குக் கொடுக்கின்றது....



மீண்டும் ஓடிச்சென்று உணவெடுத்து வந்த வேளை, பெண்பறவை பிரிந்துவிட்டது... திகைத்து நிற்கிறது ஆண்பறவை..
கடவுளே இது கனவாகிடக்கூடாதா.... கண்ணுக்கொரு வண்ணக்கிளி காதுக்கொரு கானக்குயில்.....நெஞ்சுக்கொரு வஞ்சிக்கொடி.. அது நீதானம்மா....



அழுதழுது, பெண்ணைத் தட்டி எழுப்ப முயல்கின்றது....
தன்னுயிர் பிரிவதைப் பார்த்தவர் இல்லை.... என்னுயிர் பிரிவதைப் பார்த்து நின்றேன்ன்..


சத்தமாக அழுது கூப்பிடுகின்றது...
ஆலம் விழுதுகள்போல் உறவு ஆயிரம் வந்தும் என்ன, வேரென நீயிருந்தாய், அதில்நான் வீழ்ந்து விடாதிருந்தேன்:(((


எதுவுமே பண்ண முடியாமல் உரக்க ஓலமிடுகின்றது தனித்துவிட்ட ஆண் பறவை:(((
இறைவா... உன் மாளிகையில் எத்தனையோ மணி விளக்கு... எனக்கென இருந்தது ஒரு விளக்கு... இதனுடந்தானா உன் வழக்கு:(((( 



பின் இணைப்பு:
Millions of people cried after seeing these photos in  America,  Europe, Australia , and even India . The photographer sold these pictures for a nominal fee to the most famous newspaper in France .  All copies of that edition were sold out on the day these pictures were published.



Jun 15, 2017

கூகுளில் கணினித் தமிழ்ச் சொற்களைத் தந்தவர் யார்?

“தமிழ் வாழ்க! தமிழ் வெல்க!!” என்பன போன்ற வெற்றுக் கூச்சல்களால் இனியும் தமிழ் வளராது; அறிவியல் துறையில் தமிழ் வளரவில்லையேல் வெகு விரைவில் நம் ‘தெய்வத்தமிழ்’ அழிந்துபோகும்! அதை அழியாமல் காப்பதற்குக் கடுமையாக உழைத்த ஓர் ‘அறிவியல் தமிழ் அறிஞர்’ பற்றிய பதிவு இது.
கூகுளில் பயன்படுத்தப்படும் கணினித் தமிழ்ச் சொற்களைத் தந்த பெருந்தகை இவர்தான். தம் வாழ்நாளில் 8.5 லட்சம் தமிழ்க் கலைச்சொற்களை உருவாக்கினார்!

‘மருத்துவக் கலைச்சொல் களஞ்சியம்’, ‘அறிவியல் தொழில்நுட்பக் கலைச்சொல் களஞ்சிய அகராதி’ ஆகியன இவர்தம் ஆக்கங்கள்.

பிரிட்டானிக்கா கலைக்களஞ்சியத்தைத் தமிழில் கொண்டுவந்த குழுவுக்குத் தலைமை ஏற்றவர்; ‘யுனெஸ்கோ கூரியர்’ இதழைத் தமிழில் வெளியிடுவதில் தீவிர முயற்சி செய்து, 35 ஆண்டுகள் அதன் ஆசிரியராகச் செயல்பட்டவர் இவர்.

‘அறிவியல் தமிழ் அறக்கட்டளை’ என்னும் நிறுவனத்தைத் தொடங்கி இவர் ஆற்றிய தமிழ்ப்பணி  என்றென்றும் மறக்க இயலாதது. தமிழ்நாடு அரசு உயர்கல்வி - தமிழ் ஆக்கப்பணிக்குழு உறுப்பினராகச் செயல்பட்டுத் தமிழ் வளர்த்தவர்.

‘கணினிக் கலைச்சொல் களஞ்சிய அகராதி’ இவர் உருவாக்கியதே.

தமிழ் அறிவியல் கருத்தரங்கை 1986இல் முதன்முதலில் சென்னையில் நடத்திய சாதனையாளர். அறிவியல், தொழில்நுட்பம், கணினித்துறை ஆகியன சார்ந்த 8 கலைச்சொல் அகராதிகளை வெளியிட்ட அறிவியல் அறிஞர்.

பாண்டிச்சேரி வானொலி நிலைய அறிவியல் நிகழ்ச்சி ஆலோசகராகப் பணியாற்றிப் பாராட்டுப் பெற்றவர்.

இவர் ஆற்றிய அளப்பரிய அறிவியல் தமிழ்ப்பணிக்காக, கலைமாமணி, வளர்தமிழ்ச் செல்வர், ‘அறிவியல் தமிழ் வித்தகர்’ போன்ற பல விருதுகளைப் பெற்ற இந்தத் தமிழ்தொண்டர், ‘அறிவியல் தந்தை’ என்றும் போற்றப்படுபவர்.

இத்தனை, இன்னும் எத்தனையோ சாதனைகளை நிகழ்த்தி, தம் 82 ஆம் அகவையில்  காலமானவர் அறிவியல் தமிழ் அறிஞர் ‘மணவை முஸ்தபா’ அவர்கள்.

இன்று அவரின் பிறந்த தினம். அதை நினைவுகூரும் வகையில், அவரைப் பற்றிய அரிய பத்து முத்தான தகவல்களை வழங்கியுள்ளார் ‘நாகலட்சுமி சிவலிங்கம்’ அவர்கள்[தி இந்து 15.06.2017]. அவருக்கும் தி இந்துவுக்கும் நம் நன்றி.
+++++++++++++++++++++++++++++++++++++++++++++++++++++++++++++++++++++++++++++++




Jun 13, 2017

”எனக்கு மாட்டிறைச்சி தாருங்கள்” -கேட்டு வாங்கிச் சாப்பிட்ட சுவாமி விவேகானந்தர்!!!

 விவேகானந்தர் இந்துமதத் துறவி ஆவார். 

‘இராமன்-சீதை’ மாட்டிறைச்சியை விரும்பி உண்டனர் என்றும் மாட்டிறைச்சி உணவை நிறுத்தியதால் தான் இந்த நாடு ஆண்மை இழந்து போனது என்றும் அவர் கூறியிருப்பதை நம்மில் பலரும் அறிந்திருக்க வாய்ப்பில்லை.

“நான் சொல்வதைக் கேட்டால் உங்களுக்கு அதிர்ச்சியாக இருக்கும். நமது பழங்கால பழக்க வழக்கத்தின்படி மாட்டுக் கறியை சாப்பிடாதவன் நல்ல இந்து அல்ல.”(He is not a good Hindu whodoes not eat beef) - (தொகுதி-3 - அமெரிக்காவில் கலிபோர்னியாவில் ‘ஷேக்ஸ்பியர் கிளப்பில்’ பிப்.2, 1900 அன்று ஆற்றிய உரை) என்றும் அவர் கூறியிருக்கிறார்.

விவேகானந்தரே மாட்டிறைச்சி சாப்பிட்டார் என்பதற்கும் வரலாற்றுச் சான்றுகள் உள்ளன.

அமெரிக்காவின் நாடாளுமன்றத்தின் தலைவராக இருந்தவர் ‘டாக்டர் ஜான் ஹென்றி பாரோஸ்’ என்னும் பாதிரியார். அவர் எழுதிய ‘ஆசியாவில் கிறிஸ்தவர்களின் ஆக்கிரமிப்பு’ என்ற நூலில், கீழ்க்கண்டவாறு குறிப்பிட்டுள்ளார்.

“மதங்களுக்கான நாடாளுமன்றத்தின் முதல் அமர்வு முடிந்த பிறகு, நான் விவேகானந்தருடன் உணவு விடுதிக்கு சாப்பிடச் சென்றேன்; அந்த உணவு விடுதி, நிகழ்ச்சி நடந்த ‘ஆர்ட் இன்ஸ்டிடியூட்’ என்ற நிறுவனத்தின் தரைத்தளத்தில் இருந்தது. ‘என்ன சாப்பிடுகிறீர்கள்? என்று கேட்டேன். ‘எனக்கு மாட்டிறைச்சி கொடுங்கள்’ என்று விவேகானந்தர் கேட்டார்” என்பதாகக் குறிப்பிட்டுள்ளார்.

ஒருமுறை விவேகானந்தரிடம் பசுக்களைப் பரிபாலிக்கும் சங்கத்தைச் சேர்ந்த ஒரு பிரச்சாரகர் வந்து பசுக்கள் பாதுகாப்புப் பணிக்கு நன்கொடை கொடுக்குமாறு கேட்டார். அப்பொழுது அந்தப் பிரச்சாரகரைப் பார்த்து, “உங்கள் சங்கத்தின் நோக்கம் என்ன?” என்று கேட்டார் விவேகானந்தர்.

“நோயுற்ற வலுவிழந்த பசுக்களையும்  கசாப்புக்காரர்களிடமிருந்து வாங்கப்பட்டனவற்றையும் பரிபாலிக்கப்படுவதற்காகப் பசு வைத்தியசாலைகளை ஏற்படுத்தியிருக்கிறோம்” என்று பதில் சொன்னார் அவர். 

“மத்திய இந்தியாவிலே ஒரு கொடிய பஞ்சம் எழுந்து விட்டது. ஒன்பது லட்சம் மக்கள் பட்டினியால் இறந்தார்கள். இவர்களுக்காக உங்கள் சங்கம் என்ன செய்தது?” என்ற கேள்வியை எழுப்பினார் விவேகானந்தர்.

“பஞ்சம் முதலிய துன்பம் வரும்போது நாங்கள் உதவி புரிவதில்லை. எங்கள் சபை பசுத் தாய்களைப் பரிபாலிக்கும் பொருட்டே ஏற்படுத்தப்பட்டது. பஞ்சங்கள் என்பவை மக்களுடைய பாவ கருமத்தினாலே ஏற்பட்டது. கருமம் எப்படியோ, பயனும் அப்படியே!” என்றார் அந்த ஆள்.

“பசுத் தாய்களும் தம்முடைய கருமத்தினால் கசாப்புக்கடைக்காரர்களின் கையில் அகப்பட்டு இறக்கின்றன என்று சொல்லி விட்டுப் போக வேண்டியதுதானே?” என்று மடக்கினார் விவேகானந்தர். 

“ஆம், நீங்கள் சொல்வது உண்மைதான். ஆனால் பசு நம் அன்னை என்று சாஸ்திரங்கள் சொல்லுகின்றனவே” என்றார் பிரச்சாரகர்.

அப்பொழுது நறுக்கென்று ஒன்று சொன்னார் விவேகானந்தர்:  “ஆம். பசு நம் அன்னை என்பதை அறிந்து கொண்டேன். உங்களைப் போன்ற புத்திசாலிகளான பிள்ளைகளை வேறு யார்தான் பெறுதல் கூடும்?."
=============================================================================================

நன்றி: ‘இந்துமதம் எங்கே போகிறது?’ http://thathachariyar.blogspot.in/
“சுருதி ஸ்மிருதி இதிஹாஸ”, “புராண மீமாம்ஸாத்வாய ஸுத்ர விஷாரத்”,“வேதார்த்த ரத்னாகர வேதவாஸஸ்பதி”, “மஹோ பாத்யாய”, “மகா மஹோ பாத்யாய”, அக்னிஹோத்ரம் ராமானுஜ தாத்தாச்சாரியார் அவர்கள் எழுதியுள்ள “இந்து மதம் எங்கே போகிறது?","சடங்குகளின் கதை" ஆகியன இந்தத் தளத்தில் பதிவு செய்யப்பட்டுள்ளன.

மிருதங்கம், செண்டை உள்ளிட்ட தோல் கருவிகளுக்கு இனி மனிதத்தோல்!!!

மிருதங்கம், செண்டை உற்பத்திக்கு இனி மாட்டுத்தோல் கிடைக்காது’ -இது இன்றைய நாளிதழ்ச் செய்தி[‘தி இந்து’, 13.06.2017].
செய்திச் சுருக்கம்:
#செண்டை, மிருதங்கம், தபேலா, தாரை, தப்பட்டை போன்ற இசைக் கருவிகளுக்குப் பசுத்தோல், காளைத்தோல், எருமைத்தோல், ஆட்டுத்தோல் என்று பல்வேறு விதமான தோல்கள் பயன்படுத்தப்படுகின்றன. மாடுகளை இறைச்சிக்காகச் சந்தைக்குக் கொண்டுசென்று விற்கக் கூடாது என்ற மத்திய அரசின் தடைச்சட்டம் வந்ததும் நிலைமை மோசம் ஆகிவிட்டது.

இதனால் ஆடு, எருமை ஆகியவற்றின் தோல்கள் கிடத்தாலும் பசுமாடு & காளைமாட்டுத் தோல்கள் கிடைப்பதில்லை. கிடைத்தாலும் ஆயிரக்கணக்கில் விலை கூடுதலாகத் தரவேண்டியுள்ளது.

இப்போது மார்க்கெட்டில் ஒன்றிரண்டு மாடுகள் வெட்டப்படுவதே அரிதாகிவிட்டது.

இப்பிரச்சினைக்கு ஒரு தீர்வு ஏற்படாவிட்டால் மேற்குறிப்பிட்ட இசைக் கருவிகளின் உற்பத்தி பெருமளவில் பாதிக்கப்படும்#

இனி ஊடகங்களில் எதிர்பார்க்கப்படும் செய்தி:
#ஆளுங்கட்சியின் பேராதரவுடன் இந்துத்துவாக்கள் செய்துவரும் தொடர் மூடநம்பிக்கைப் பிரச்சாரங்களால், சூடு சொரணை இழந்ததன் விளைவாக மிகப்பெரும்பான்மையான பாரதக் குடிமகன்களின் தோல்கள் தடித்து  மறத்துவிட்டனவாம்.

‘விலங்குகளின் தோல்களைக் காட்டிலும், தடித்து மறத்துப்போன மனிதத் தோல்களைப் பயன்படுத்துவதன் மூலம் இசைக்கருவிகளில் அதிகப்படியான ஸ்ருதிகளைப் பெற்றிட முடியும்’ என்று உடற்கூற்று விஞ்ஞானிகள் ஆய்வு செய்து கண்டுபிடித்திருக்கிறார்கள்!

இதில் கவனிக்கத்தக்கது என்னவென்றால்.....

ரூபாய் 2500 வரை விற்பனையான பசுத்தோல் இனி 25000க்கும் மேலே உயரக்கூடும். தரம் உயர்ந்த, மறத்துப்போன மனிதத் தோல்கள்  200000 ரூபாய்க்கும் குறையாமல் விற்பனையாகும் என்று எதிர்பார்க்கப்படுகிறது#
======================================================================
தமிழ்மணம் இடுகைப் பட்டியலில், ‘செண்டை’க்குப் பதிலாக, ‘கெண்டை’ [என் கவனக் குறைவால்] என்று பதிவாகிவிட்டது. வருந்துகிறேன்.





Jun 12, 2017

உயிர் ஒரு புதிரா? “அல்ல...அல்ல” என்கிறது இன்றைய அறிவியல்!

உயிர் குறித்த விரிவான ஆய்வல்ல இப்பதிவு. அது குறித்த ஒரு சுருக்கமான விளக்கம் மட்டுமே!

#நாம் உண்ணும் உணவு செரிமானம் ஆகி, உயிர்வாயு[ஆக்சிஜன்] கலந்து, வேதியியல் மாற்றங்களைப் பெறுவதன் மூலம் சக்தியாக மாறுகிறது. அச்சக்தி செல்களிலும் ஊடுருவுகிறது. செல்கள் உரிய சக்தியைப் பெற்ற நிலையில் உடம்பு இயங்குகிறது.
இவ்வகையில், உடம்பின் இயக்கத்திற்கு ஆதாரமாக அமைவது ‘சக்தியே’ என்பது அறியப்படுகிறது. இந்தச் சக்தியே ‘உயிர்’[*] என்றும் அழைக்கப்படுகிறது.

இந்தச் சக்தியை நம் உடம்பானது முற்றிலுமாக இழக்கும்போது அதன் இயக்கம் நின்றுபோகிறது; பின்னர் அழிந்துபோகிறது.

ஆக, உடம்புக்குள் பரவிக்கிடப்பது ‘சக்தி’ மட்டுமே; உயிர் என்று கூடுதலாக ஒன்று இல்லை[இந்தச் சக்தியை, ’உயிர்ச் சக்தி’ என்றும் அழைத்துக்கொள்ளலாம்]. 

இது, இன்றைய அறிவியல் வழங்குகிற உடம்பின் இயக்கம் பற்றிய செய்தியாகும்.

எனவே, இனியேனும்.....

நம் உடம்புக்குள் ஏதோ “இருக்கு...இருக்கு...இருக்கு” என்று கிறுக்குத்தனமாய் உளறிக்கொண்டிருக்காமல், இருக்கும்வரை பிற மனிதர்கள் மீதும் ஏனைய உயிரினங்கள் மீதும் அன்பு செலுத்தி அமைதியாக வாழ்ந்திட முயற்சி செய்வோம்.

உயிர் குறித்த கூடுதல் தகவல்கள்:

வடமொழியாளர், இந்த உயிர்ச்சக்தியை ‘பிராணா’ என்றார்கள்.

எகிப்தியர் - ‘கா’[Ka]

சீனர்   -  ஷீ[Shi or Qi]

ரோமர் & கிரேக்கர் - ‘ஈதர்’[Ether]
+++++++++++++++++++++++++++++++++++++++++++++++++++++++++++++++++++++++++++++++
மேற்கண்ட தகவல்கள் பற்றிய ‘ஆதாரம்’, ‘போகூழ்[?]’ காரணமாகத் தொலைந்துவிட்டது என்பதை மிகு வருத்தத்துடன் தெரிவிக்கிறேன்!


Jun 11, 2017

வெறிநாய் மனிதர்கள்!!!.....தண்டனைதான் என்ன???

ஜமீலா நிர்வாணப்படுத்தப்பட்டு, அவளுடைய மார்புக் காம்புகளில் வயர்கள் மூலம் மின்சாரம் செலுத்தப்பட்டது என்றும் அவளுடைய பெண்ணுறுப்பு அந்த அரக்கர்களுக்கு ஆஷ்ட்ரேயாய்ப் பயன்பட்டது என்றும்.....

#லிபியா நாட்டைச் சேர்ந்த பெண் போராளி ஜமீலா. அறுபதுகளில், லிபியாவின் ஒரு பகுதியை ஆக்கிரமித்திருந்த ஃப்ரெஞ்ச் (அல்லது இத்தாலிய) அராஜகவாதிகளை எதிர்த்துப் போராடிய புரட்சிப் பெண் அவர்.
ஜமீலாவின் குடும்பமே சிறைபிடிக்கப்பட்டுக் கொடுமை செய்யப்பட்டதாம். ஜமீலாவின் தந்தையுடைய வயிறு பலூன் மாதிரி உப்புகிற வரைக்கும் தண்ணீரால் நிரப்பிப் பிறகு அந்த வயிற்றின் மேல் குதிப்பார்களாம். உடம்பில் எங்கெங்கே துவாரங்கள் இருக்கின்றனவோ, அத்தனை துவாரங்களிலும் தண்ணீர் வெளியே பீய்ச்சியடிக்குமாம்.
ஆண் போராளிகளுக்கு இப்படியான சித்ரவதை என்றால் பெண் போராளிகளின் வேதனைகளைப் பற்றிச் சொல்லவே வேண்டாம். பெண் போராளிகளைக் கொடுமைப்படுத்துவது அதிகாரத்திலிருக்கிற அராஜகவாதிகளுக்கு அல்வா தின்கிற மாதிரி.
ஜமீலா நிர்வாணப்படுத்தப்பட்டு, அவளுடைய மார்புக் காம்புகளில் வயர்கள் மூலம் மின்சாரம் செலுத்தப்பட்டது என்றும் அவளுடைய பெண்ணுறுப்பு அந்த அரக்கர்களுக்கு ஆஷ்ட்ரேயாய்ப் பயன்பட்டது என்றும் வாசித்தபோது, அந்தக் கொடியவர்களை அப்படியே குதறிப் போட்டாலென்ன என்கிற வெறி ஏறியது, அந்த வயசிலேயே.
ஜமீலாவின் மீது பிரயோகிக்கப்பட்டது உச்சக்கட்டச் சித்ரவதை. அது ஒரு கூட்டுக் கற்பழிப்பு.
அயோக்கியர்களின் கைகளில் அபலைப் பெண்கள் சிக்கிக் கொண்டால், உடனே காமம் தன் வேலையைக் காட்ட ஆரம்பித்து விடும். முதற்கட்ட நடவடிக்கையே கற்பழிப்புதான்.
போர்க்காலங்களில், கற்பழிப்பு என்பது அன்றாடம் நடக்கிற ஒரு சடங்கு. 1971 பாகிஸ்தான் – பங்களாதேஷ் யுத்தத்தின் முடிவில் பார்த்தால், ஆயிரக்கணக்கான வங்காளதேசப் பெண்கள் கர்ப்பமாம். பாகிஸ்தான் படை வீரர்களின் கைங்கர்யம்.
அது சரி, வீரர்களென்று அவர்களைக் குறிப்பிட முடியுமோ? இப்படித்தான் நாம் அடிக்கடி தவறு செய்கிறோம். கிரிக்கெட் விளையாடுகிறவனைக்கூட வீரன் என்கிறோம். கற்பழிப்பதற்கு எப்படி வீரம் தேவையில்லையோ அப்படித்தான் கிரிக்கெட் விளையாடுவதற்கும் வீரம் தேவையில்லைதானே!
இந்தியப் படையினர் கூடக் காஷ்மீரில் இந்த இழி செயலில் ஈடுபட்டிருப்பதாய்த் தகவல்கள் வருகின்றன.
பங்களாதேஷ் யுத்தத்தில் நடந்த கற்பழிப்புகள் மாதிரி அல்லது அதைவிடக் கொடூரமான கற்பழிப்புகள் சமீபத்தில் விடுதலைப்புலிகளுக்கெதிரான யுத்தத்தில் சிங்களப் படைக் காடையர்களால் நிகழ்த்தப்பட்டிருப்பதைச் சனல் 4 தொலைக்காட்சி வெளிச்சம் போட்டுக் காட்டியிருக்கிறது.
துப்பாக்கி, ஏ.கே-47, பயோனட், பீரங்கி மாதிரி, கற்பழிப்பு கூட ஒரு போர்க்கால ஆயுதம்தான். பெண்ணினத்துக்கெதிராய்ப் பிரயோகிக்கப்படுகிற படுபாதகமான ஆயுதம்!
கற்பழிப்பு என்கிற வார்த்தைக்கு இலங்கைத் தமிழில் வலுப் பொருத்தமான சொற்றொடர் ஒன்று வைத்திருக்கிறார்கள்.
பாலியல் வல்லுறவு.
வார்த்தை எதுவானாலும் வேதனை பெண்களுக்குத்தான்.
நம்ம ஊர்ப் போலீஸ் ஸ்டேஷன்களில் கற்பழிப்பு அல்லது பாலியல் வல்லுறவு என்பது ஒரு பொழுதுபோக்கு அம்சம். ஓய்வுநேர வீர விளையாட்டு.
இந்த இடத்தில், ‘வீர’ என்பது உயர்வு நவிற்சி அணி.
1992 ஆம் வருடம், வாச்சாத்தி கிராமத்துப் பழங்குடியினர் மேலே, அரசு அதிகாரிகள், அரசியல்வாதிகள், காவல் துறையினர், வனத்துறையினர் அனைவரும் இணைந்து பிரயோகித்த வன்முறையில், அந்தக் கொடுங்கோலர்களால் கற்பழிக்கப்பட்ட பதினெட்டுப் பெண்களில் பதினைந்து பேர் மைனர் சிறுமிகள் என்கிற பயங்கரத்தை பகிரங்கப்படுத்தியிருக்கிறது பாரதி கிருஷ்ண குமாரின் ஆவணப்படமான ‘உண்மையின் போர்க்குரல்’.
போலீஸோடு இணைந்து கற்பழிப்புக் களியாட்டத்தில் ஈடுபட்ட வனத்துறையை, வனத்துறை என்று நாகரிகமாய்க் குறிப்பிடாமல் காட்டுத் துறை என்று கொச்சையாய்ச் சொன்னால் சரியாயிருக்காது?
கற்பழிக்கிற போலீஸ்காரர்களும் லஞ்சம் வாங்குகிற போலீஸ்காரர்களும் திருந்திவிட்டாலே நாடு ஓரளவு சுபிட்சமாகிவிடும்.
இணங்க மறுக்கிற, முரண்டு பிடிக்கிற, தற்காப்புக்காக நகங்களால் பிறாண்டுகிற, விட்டுவிடும்படி மன்றாடுகிற, கண்ணீரோடு கதறுகிற, வசவுகளையும் சாபங்களையும் வாரியிறைக்கிற ஒரு பாவப்பட்ட பெண்ணின்மேல் காமம் கொண்டு, அவளை முழுமையாய் ஆக்கிரமித்து, அமுக்கிப் பிடித்து இந்தக் கயவர்கள் எப்படித்தான் வல்லுறவு கொள்வார்களோ!
தங்களுடைய மனைவிமாருக்கோ, சகோதரிகளுக்கோ, பெண் மக்களுக்கோ இது போன்ற கொடுமை நேர்ந்தால் எப்படியிருக்கும் என்று அந்த எக்கச்சக்கமான தருணங்களில் இவர்கள் நினைத்துப் பார்க்கவே மாட்டார்களா?
திருட்டு, கொள்ளையை விடவும் கொடுமையான, சொல்லப்போனால் கொலையை விடவும் கொடூரமான வல்லுறவு வக்கிரத்தில் ஈடுபடுகிற பாவிகளுக்கு அதிகபட்சத் தண்டனையாய் என்ன வழங்கலாம்? கிராமங்களிலும் தமிழ்த் திரைப்படங்களிலும் அதிகபட்சத் தண்டனையாக ஓர் ஆனந்தமான தண்டனையை வழங்குவார்கள். கற்பழிக்கப்பட்ட பெண்ணை, கற்பழித்த கயவனுக்கே கட்டி வைத்துச் சோலியை முடித்து நீதியை நிலைநாட்டி விடுவார்கள்.
கற்பழிக்கப்பட்ட பெண்ணுக்குத் தாலி. காமுகனுக்கு ஜாலி.
இதுவா தண்டனை? காமுகனுக்கு கத்னா செய்து விடுவது அல்லவா சரியான தண்டனையாயிருக்கும்?
இந்தக் கத்னா என்பது முஸ்லிம்கள் செய்கிற, ஆண்குறியின் மேல் தோலைச் சீவி விடுகிற, ஸர்க்கம்ஸிஷன் என்கிற இஸ்லாமிய கத்னா அல்ல.
மேற்படி (அல்லது கீழ்ப்படி) உறுப்பையே சீவி விடுவதுதான் நான் சொல்கிற ‘கத்னா’.
சவூதி அரேபியா போன்ற முஸ்லிம் நாடுகளில் கடுமையான ஒரு தண்டனை முறை அமலில் இருக்கிறது. திருட்டுக் குற்றத்துக்கு, திருடிய கையை மணிக்கட்டோடு துண்டித்து விடுவது. அந்தத் திருடன் இனி திருடவே முடியாது. கையிருந்தால்தானே திருடுவான்!
அதே மாதிரி, கற்பழிப்புக் கயவன் வேரோடு கத்னா செய்யப்பட்டு விட்டால், பிறகு கற்பழிப்பில் ஈடுபடவே முடியாது இல்லையா!
ஐட்டம் இருந்தால்தானே ஆட்டம் போட முடியும்?
இந்த சப்ஜக்ட்டை வைத்து விவகாரமான ஒரு சிறுகதை கூட வந்திருக்கிறது. எழுதியது யாராயிருக்கும்? இது ஒன்றும் கஷ்டமான கேள்வியில்லை. ஈஸியாய் ஊகித்து விடலாம்.
கோடிகளில் புரள்கிற சவூதி அரேபிய ஷேக்குகளெல்லாம் கற்பழிக்கிற பாவச் செயலில் ஈடுபடவே மாட்டார்கள். ரெண்டோ மூணோ நாலோ மனைவிகளைக் கைவசம் எப்போதும் வைத்திருப்பார்கள். அதையும் மீறி உடம்பு உணர்ச்சிவசப்படுகிறபோது, விமானமேறி பம்பாய்க்கு வந்து, அஞ்சு நட்சத்திர ஹோட்டேலொன்றில் அறையெடுத்துத் தங்கி, சில லட்சங்கள் செலவில் ஆறாவதாய் ஒரு நட்சத்திரத்தை அமர்த்தி ஆசுவாசப்படுத்திக்கொண்டு ஊர் போய்ச் சேருவார்கள்.
அதன் பிறகு, இருக்கவே இருக்கிறது ஹஜ் என்கிற வசதி. வருஷா வருஷம் ஹஜ் கடமையை நிறைவேற்றுகிற வசதி கூட இருக்கிறது, லோக்கல் சவூதிகளுக்கு. ஹஜ் ஸீஸனில் புனித மக்காவுக்குப் போய், பாவ மன்னிப்புக்காக அல்லாவிடம் அப்ளிகேஷன் போட்டுவிட்டால் பாவங்களெல்லாம் பைசல் செய்யப்பட்டு அன்று பிறந்த பாலகனைப் போலப் புனிதம் பெற்று விடுவார்கள். பிறகு, அக்கம் பக்கம் ஒரு நோட்டம் விட்டு விட்டுத் திரும்பவும் பம்பாய்க்குப் பிளேன் ஏறி விடலாம்.
இத்தனை வசதிகள் இல்லாத, சாமான்ய சவூதிகள் சிலர் கற்பழிப்புக் குற்றத்தில் ஈடுபடுகிறபோது, நாம் முன்மொழிந்த கத்னா தண்டனை அவர்களுக்கு வழங்கப்படுவதாய்த் தெரியவில்லை. சவூதி மன்னரின் பார்வைக்கு இந்த நாவலை அனுப்பி வைக்கலாமென்றால், அவருக்குத் தமிழ் வாசிக்கத் தெரியுமா என்று தெரியவில்லை. தமிழ் வாசகங்களை இடமிருந்து வலமாய் வாசிக்க வேண்டுமென்பது கூட அவருக்குத் தெரிந்திருக்க நியாயமில்லை.
நம்ம நாட்டில் இந்தச் சட்டத்தை அமல்படுத்தலாம்#
ஏ.ஏ.ஹெச்.கே.கோரி

====================================================
இன்று[11.06.2017], ‘தி இந்து’[’பெண் இன்று’ - இணைப்பு]வில் ‘நாட்டுல என்ன நடக்குது?’ என்னும் தலைப்பின் கீழ், கீழ்க்காணும் செய்திக் குறிப்புகள் வெளியாகியுள்ளன. அவை.....

* தனா: டெல்லியில் நடந்த சம்பவம் மனதை உலுக்கிடிச்சி. ஆட்டோவில் சென்ற 19 வயது இளம் பெண்னை அந்த ஆட்டோவின் ஓட்டுநரும் உடன் பயணித்த இருவரும் சேர்ந்து கூட்டுப் பாலியல் வன்முறைக்கு உட்படுத்தியிருக்காங்க. இவங்களையெல்லாம் என்ன செய்யுறது?

* விஷாலி: இங்கே தமிழ்நாட்டில் நடந்த கொடுமையை என்னன்னு சொல்லுறது? சேலம் ஓமலூரைச் சேர்ந்த 15 வயதுப் பெண்ணைப் பேருந்தில் வைத்து, கூட்டுப் பாலியல் வல்லுறவு செய்திருக்கிறார்கள்

கட்டுரை எழுதிய பிரபல கதாசிரியர் ’ஏ.ஏ.ஹெச்.கே.கோரி’ அவர்களுக்கு என் நன்றி.