‘அது’ விசயத்தில் தமிழன் ‘ஏறத்தாழ’ யோக்கியன்!

‘அது’ எது என்று தெரிந்துகொள்ள வேண்டுமா? கீழ்வரும், எழுத்தாளர் சுஜாதா எழுதிய[1976] ‘கணையாழியின் கடைசிப் பக்கக் கட்டுரை’யைப் படியுங்கள்!

#சமீபத்தில் சென்னை  சென்றிருந்தபோது கடைகளில் தொங்கிய, ‘முத்தம்’, ‘பருவம்’, ‘தில்குஷ் மோகினி’ போன்ற, முன்பக்கமும் ஸ்டேப்பில் அடித்த பத்திரிகைகளில் சிலவற்றை ஆராய்ந்தேன்.

ம்ஹூம்! ஜாக்கெட்டில் பட்டன்களை அவிழ்ப்பதோடு நின்றுவிடுகிறது.

உண்மையான போர்னோ எழுதுவதற்கு ஒரு திறமை வேண்டும். அமெரிக்கர்களை இதில் மிஞ்ச முடியாது. ஃபிலிப் ராத், வானர்காட் போன்றவர்களைத் தனிப்பட்டுக் குறிப்பிடலாம்.

தமிழில் ஆதியிலிருந்தே பார்த்தால் சங்கப்பாடல்கள் செக்ஸ் உணர்ச்சியற்று இருக்கின்றன. சில களவுப் பாடல்களில் உள்ள கலவையைப் பதம் பிரிப்பதற்குள் உயிர் போய்விடுகிறது. 

திருக்குறளில் காமத்துப்பாலில் சில வரிகள் பளிச்சிடுகின்றன. இருந்தும் வள்ளுவரின் காமத்தில் உண்மையான காமம் கொஞ்சமே. மற்றவை பெருமூச்சுகள், ஊடல், வளை கழல்வது இன்ன பிறவே.

தமிழில் ஏகமாகப் பரவிக் கிடக்கிற காவியங்களிலும் பிரபந்தங்களிலும் அவ்வப்போது தோன்றும் பெண்கள் யாவரும்[out of proportion] கொங்கைகளில் ஈர்க்கிடை போகாதாம். இல்லையென்றால் மலைக் குன்றுகளாம். இடை இல்லவே இல்லையாம்.

அருணகிரிநாதர் சில சமயங்களில் Pure Porno.

‘அருக்கு மங்கையர் மலரடி வருடியும்
கருத்தறிந்து பின்னர் அரைதனில் உடைதனை
அவிழ்த்தும் அங்குள.....’

மேலே திருப்புகழில் தேடிக்கொள்ளவும்.

சென்ற நூற்றாண்டின் இறுதியிலும் இந்த நூற்றாண்டின் ஆரம்பத்திலும் பதங்கள் என்று தேவதாசிகளுக்கான நடனப் பாடல்கள் ராகதாளத்துடன் நிறைய எழுதப்பட்டன. இவைகளில் எல்லாம் கண்ணனின் லீலைகளை விஸ்தாரமாக வர்ணித்து, ‘அவன் இப்படிச் செய்தான். இங்கே கடித்தான். சகியே அவனைக் கூட்டிவா.....பசலை!’ என்ற ரீதியில் எழுதப்பட்ட அந்தப் பாடல்களை எவரும் படித்ததாகத் தெரியவில்லை.

சில அந்தரங்க சபைகளில் நடனமாடியிருக்கலாம். பக்தியும் போர்னோவும் கலக்கும் வினோதம் இந்திய இலக்கியத்தின் தனிப்பட்ட அம்சம். இந்த நூற்றாண்டின் தமிழ் எழுத்திலும் அதிகம் போர்னோ கிடையாது.

பாரதியார் இதைத் தொடவில்லை. பாரதிதாசனில் ஓடைக் குளிர் மலர்ப் பார்வைகள்தான் உண்ணத் தலைப்பட்டன. உடல்கள் இல்லை.

புதுமைப்பித்தன், கு.ப.ரா. போன்றவர்கள் தலை வைத்துப் படுக்கவில்லை. ஏன் நம் புதுக்கவிஞர்களும் புது எழுத்தாளர்களும்கூட ஜகா வாங்கியிருக்கிறார்கள்.

செக்ஸை நேராகச் சொல்வதில் ஏனோ எல்லாருக்குமே தயக்கம் இருந்திருக்கிறது.

‘மார்பகம் விம்மி விம்மித் தணிந்தது....’ அப்புறம் என்னடா என்றால் ‘இருவரும் இருளில் மறைந்தார்கள்!’..... ஏன் மறைய வேண்டும்?#
-------------------------------------------------------------------------------------------------------------------------

நன்றி: ‘கணையாழியின் கடைசி பக்கங்கள்’; குமரிப் பதிப்பகம்[மிகப் பழைய புத்தகம். சில முன்பக்கத் தாள்கள் இற்று உதிர்ந்துவிட்டன!!].

=====================================================================