இந்தக் கலிகாலத்தில், உலக நன்மைக்காகவும், போதிய மழை பெய்வதற்காகவும் சித்தர்களை வழிபட்டு, ஒருவர் 48 நாட்கள் 'மௌனவிரதம்' இருந்தாரென்றால் அவர் நம் பாராட்டுதலுக்கும் போற்றுதலுக்கும் உரியவர் ஆவர்.
அப்படிப்பட்ட ஒருவர் ஈரோடு மாவட்டம் சென்னிமலைப் பகுதியில் ஒரு சித்தர் வாழ்ந்துகொண்டிருக்கிறார்[பெயர் வேண்டாம்]. ஊர் மக்களால் 'சித்தர்' என்றே அழைக்கப்படுபவர்.
இவரின் கனவில் தோன்றிய சித்தர்கள்[எண்ணிக்கை தெரியவில்லை], மத்தியப் பிரதேச மாநிலம் வழியாகச் செல்லும் நர்மதை நதியிலிருந்து சிவலிங்கம் கொண்டுவந்து பூஜை செய்யும்படி உத்தரவிட்டார்களாம்.
நம் சித்தரும் அங்கு சென்று, நர்மதையில் கல் வடிவிலான சிவலிங்கத்தைத் தேடி எடுத்துத் தரும் நபர்களைச்[கோரிக்கை வைத்தால் கல் வடிவிலான சாத்தான்கூடக் கிடைக்கலாம்!] சந்தித்துக் கோரிக்கை வைத்தாராம்.
04 ஆண்டுகளுக்குப் பின்னர், நர்மதை ஆற்றுப் பகுதியிலிருந்து பெரிய அளவிலான சிவலிங்கம் கிடைத்ததையடுத்து, நம்ம ஊர்ச் சித்தருக்கு மேற்படி நபர்கள் தகவல் அனுப்பினார்கள். அவரும் அங்கு விரைந்து சென்று 360 கிலோ எடைகொண்ட சிவலிங்கக் கல்லை[42 அங்குல உயரம் 54 அங்குலச் சுற்றளவு] ரூ60.000 விலை கொடுத்து வாங்கி லாரி மூலம் சென்னிமலைக்குக் கொண்டுவந்துள்ளார்.
பிரதிஷ்டை[!!!]செய்யப்படவுள்ள லிங்கத்தின் படம் கீழே.....
பிரதிஷ்டை[!!!]செய்யப்படவுள்ள லிங்கத்தின் படம் கீழே.....
#நர்மதையில் இருந்து சென்னிமலைக்குக் கொண்டுவரப்பட்ட 360 கிலோ எடையுள்ள சிவலிங்க வடிவக் கல்லைப் பயபக்தியுடன் பார்த்துச் சென்ற பக்தர்கள்#
என்று தலைப்புக் கொடுத்து, படத்துடன் செய்தி வெளியிட்டுள்ளது ஒரு முன்னணித் தமிழ் நாளிதழ்[நாளிதழ்கள் பலவும் இச்செய்தியை வெளியிட்டுப் புண்ணியம் தேடிக்கொண்டுள்ளன!]
படத்தை உற்று உற்றுப் பார்த்தேன்; பலமுறை பார்த்தேன். பாலீஷ் செய்யப்பட்ட[இப்படிச் சிறிய அளவிலான கற்கள் நர்மதையில் கிடைப்பதுண்டு என்கிறது பத்திரிகைச் செய்தி]கல்லை மீண்டும் மீண்டும் பார்த்தேன். பார்த்து முடித்து.....
''சிவலிங்கம் தெரியல; குழவிக்கல்(அம்மிக்கல்)தான் தெரியுது'' என்றேன் அருகிலிருந்த என் மனைவியிடம். என்னை முறைத்துப் பார்த்துவிட்டு அவர் சொன்னார்.....
''நாத்திகம் பேசுற பாவிகளுக்குச் சிவலிங்கம் தெரியாது; குழவிக்கல்தான் தெரியும்.''