'யோகாவும் உடலுறவும்'...ஜக்கி வாசுதேவ்!

ஜக்கி வாசுதேவிடம் 'வலைத்தமிழ்'த் தளம் தொடுத்த வினாவும் அதற்கான அவரின் பதிலும்: அடைப்பு[  ]களுக்குள் நம் விமர்சனம்.

வலைத்தமிழ்:

'யோகா பயில்கிறவர்களுக்குப் பாலியல் உணர்வுகள் அறவே கூடாது என்று வற்புறுத்தப்படுகிறதே ஏன்?'

கவனியுங்கள், பாலியல் உணர்வு அறவே கூடாதா என்பது கேள்வி.

ஜக்கி:

உடலியல் சார்ந்த ஒன்றை நீங்கள் புனிதம் என்று போதிக்கவும் வேண்டாம்; ஆபாசம் என்று அவமதிக்கவும் வேண்டாம். அதன் வழியாகவே நீங்கள் வாழ்கிறீர்கள். அதற்குத் தேவையில்லாத அலங்காரங்களையோ, அசிங்கங்களையோ நீங்கள் புகட்டாதிருந்தால் அது அதற்கேயுரிய அழகோடு திகழும்[அழகோடு திகழும், சரி. அதனால், யோகாவுக்கு அது தடையில்லை என்கிறாரா? இல்லை, தடை விதிக்கிறாரா? தெளிவான பதில் இல்லை]

இரு பாலினங்களுக்கும் இடையிலான உடல் தேவை என்பது இனப்பெருக்கத்தைப் பொருத்தவரை சரிதான். ஆனால், அதைக் கடந்து உங்கள் தேடல் இருக்குமேயானால்[உடலுறவு மூலம் இன்பம் கிடைக்கிறது. அதற்கு மேல் யாரும் எதையும் தேடுவதில்லையே. கேள்விக்குத் தொடர்பில்லாத கருத்து]  அது போதாது.

உங்கள் சமூகத்திலேயே சிலர் அறிவு ரீதியாக இயங்கி, அந்த அறிவுடன் தங்களை அடையாளப்படுத்திக் கொள்வார்கள். அத்தகைய மனிதர்களுக்கு பாலுறவின் தேவை குறைந்துவிடும்['பாலியல் தேவையைக் குறைப்பது எப்படி?' என்பதல்ல கேள்வி]. உடல் ரீதியாகத் தங்களை அடையாளப்படுத்திக் கொள்பவர்களுக்கு அந்தத் தேவைகள் அதிகரிக்கும். நீங்கள் உங்களை எதனுடன் அடையாளப்படுத்திக் கொள்கிறீர்களோ அதைச் சார்ந்துதான் அதிகம் செயல்படுவீர்கள்.

மிக அடிப்படையானதும், எளிமையானதுமான ஒன்றைச் சரியென்றும் தவறென்றும் இனம் பிரிக்கிறீர்கள். பாலுறவைத் தவறென்று சொல்வதற்கு ஒரு தத்துவம்[இதனால் பலவகையிலும் தொல்லைகள் நேர்வதால், பல நேரங்களில் இதைத் தவிர்க்கத் தோன்றுகிறது. மற்றபடி, இதில் ஏது தத்துவம்?]  வேண்டும். அதைத் தொடரவும் வேண்டும். இந்தச் சிக்கல்கள் எல்லாம் அவசியமில்லை. அதன் எளிமையான தன்மைகளை நீங்கள் பார்ப்பீர்களானால், அது உங்கள் வாழ்வில் ஒரு சிறிய அம்சம். அதை நீங்கள் பெரிதுபடுத்தினீர்களானால், அதுவே உங்கள் வாழ்வின் முக்கிய அம்சம் ஆகிறது[இவை பற்றி மாறுபட்ட கருத்துக்கு இடமில்லை. கேள்விக்கான பதில் மட்டுமே தேவை] .

யோகா என்றால் 'ஒன்றாதல்'[உடல், மனம், எண்ணம் ஆகிய மூன்றுமா? வேறு எதனுடனுமா?] என்று பொருள். காதல் என்றாலும் அதுதான் பொருள். பாலுறவு என்றாலும் அதுதான் பொருள்.

உங்கள் உடல், மனம், எண்ணம் ஆகியவற்றின் எல்லைகளைக் கடந்து நீங்கள் தேடும்போது[எதை?] அதனை யோகா என்கிறோம். இந்த ஒருமையை[அதென்ன ஒருமை? யோகாவா, அல்லது, எதையோ தேடும்போதுன்னாரே அதுவா?] நீங்கள் உடலளவில் தேடும்போது நீங்கள் என்ன செய்தாலும் அது இரண்டாகத்தான் தெரியும். பாலுறவு என்கிற பெயரில் மக்கள் செய்யும் அத்தனை விசித்திரங்களுமே[?] ஏதாவது ஒரு விதத்தில் ஒன்றுபட்டுவிட வேண்டும் என்கிற நோக்கத்தில்தான் செய்யப்படுகிறது. ஆனால், அது நிகழவே நிகழாது. சில விநாடிகளுக்குப் போலியானதோர் ஒருமை நிகழும். பிறகு இருவரும் பிரிந்துவிடுவார்கள்.

வினா எழுப்பிய வலைத்தளக்காரர்கள் என்ன நினைத்தார்களோ, வாசிக்கும் ஜக்கி பக்தர்கள் மெய் சிலிர்ப்பார்கள்!

ஹ...ஹ...ஹ!!!

=============================================================== 

https://www.valaitamil.com/udal-uravu-kuriththa-ungal-paarvai_12223.html