“தீய சக்திகளை நிர்மூலம் செய்து நல்லவர்களை வாழ வைக்கப் பல அவதாரங்கள் எடுத்தார் கடவுள்; இன்னும் எடுக்க இருக்கிறார்” என்கிறது ஒரு மதம்.
"பாவிகளின் பாவங்களைச் சுமப்பதற்காகவே தேவன் இங்கே மனிதனாகப் பிறக்கிறார். செத்துப் பிழைத்து அதிசயங்கள் நிகழ்த்துகிறார்” என்கிறது மற்றொன்று.
‘நாங்கள் தொழுகின்ற கடவுள் உண்மையானவர். வாருங்கள். வந்து முறையிடுங்கள். நீங்கள் கேட்பதெல்லாம் அவர் தருவார்” -இது இன்னொன்று.
இம்மதங்கள் சொல்பவை உண்மையாக இருக்கக்கூடும் எனினும், இப்போதைக்கு இருக்கிற கடவுள்களே போதும்; புதிய அவதாரம் தேவையில்லை என்பது நம் எண்ணம்.
எந்தவொரு கடவுளும் மனிதனாகப் பிறக்க வேண்டாம்; செத்துப் பிழைத்தலாகிய அதிசயத்தையும் நிகழ்த்த வேண்டாம்.
கேட்பதையெல்லாம் கடவுள் தருவாரென்றாலும், எதையும் கேட்டுப் பெறுகிற மனநிலையில் நாம் இல்லை.
இப்போதைய நம் தேவை ஒன்றே ஒன்றுதான். அது.....
கொரோனா என்னும் கொடுந்தொற்றை முற்றிலுமாய் அழித்தொழிப்பது.
லட்சக்கணக்கில் சக மனிதர்களைக் கொரோனாவுக்குப் பலி கொடுத்துவிட்ட நிலையில், எஞ்சியிருப்பவர்களைக் காப்பாற்றினால்தான் மனிதகுலம் தப்பிப் பிழைக்கும்.
கொரோனாவை அழித்து மனித இனத்தைக் காப்பாற்றும்படி நம் போன்றோர் வேண்டுதல் வைத்தால் அதை மேற்குறிப்பிடப்பட்ட கடவுளோ கடவுள்களோ நிறைவேற்றுவார்களா என்பதில் நமக்கு முழு நம்பிக்கை இல்லை.
இதே வேண்டுதலைக் கடவுள்களுடன் தொடர்பிலுள்ள மதவாதிகள் முன்வைப்பார்களேயானால், வேண்டுதல் நிறைவேறும் என்பது 100% உறுதி.
இது அறிவியல் யுகம். ஒரு நிகழ்வைக் காணொலிக் காட்சி மூலம் உலக மக்கள் அனைவரும் காண முடியும்.
அனைத்து மதத்தலைவர்களும்[கடவுளைப் போற்றுகிறவர்கள்] அவர்களுக்குப் பிடித்தமான ஓரிடத்தில் கூடிக் கூட்டு வழிபாடு நிகழ்த்தி, கொரோனாவை உடனடியாக அழித்தொழிக்க வேண்டும்[இப்படிச் செய்தால்தான், மதங்களின் மீதும் கடவுள்/கடவுள்களின் மீதும் மக்களுக்கு முழு நம்பிக்கை பிறக்கும்].
சாதிப்பார்களா!?!?
===============================================================