எஸ்.ஆர்.சேகர்['பாஜக' பொருளாளர்] 'விஸ்கி' சேகர் ஆகிறார்!!!

மேதகு பாஜக பிரமுகர் எஸ்.ஆர். சேகர் அவர்கள், அறநிலையத்துறை அமைச்சர் சேகர் பாபு அவர்களுக்கு எதற்காக ஒரு பெட்டி 'விஸ்கி' அனுப்பியிருக்கிறார் என்பது, இது தொடர்பான நேற்றையச் செய்தியை அறிந்தவர்களுக்குத் தெரிந்திருக்கும்[https://www.toptamilnews.com/278228a-box-of-whiskey-is-sent-to-sehgar-babu-for-this-research/].

"ஊரடங்குத் தளர்வுகளில் டாஸ்மாக் கடைகள் திறக்கப்பட்டும் ஏன் கோயில்களை மட்டும் திறக்கவில்லை?" என்றெழுப்பப்பட்ட கேள்விக்கு, "டாஸ்மாக் கடைகள் பொது வெளியில் இருப்பதால் போலீசார் பாதுகாப்புப் பணியில் ஈடுபட்டு, கூட்டத்தைக் கட்டுப்படுத்தகூடும். ஆனால், கோயில்களைத் திறந்தால் பொதுமக்களைக் கட்டுப்படுத்துவது சுலபம் இல்லை’’ என்று பதில் அளித்தாராம்  இந்து அறநிலையத்துறை அமைச்சர் சேகர்பாபு.

சிறந்ததொரு ஆராய்ச்சியின் மூலம் அமைச்சர் இப்படியொரு கண்டுபிடிப்பை நிகழ்த்தியதாகக் கருதி, அதைப் பாராட்டும் வகையில் ஒரு பெட்டி 'விஸ்கி' அனுப்பப்படுவதாக அறிவித்துள்ளார் தமிழ்நாடு  'பாஜக' பொருளாளர் S.R.SEKHAR.

உலக அளவில், வகை வகையான எத்தனையோ ஆராய்ச்சிகளுக்கு, விருதுகளும், பட்டங்களும், பண முடிப்புகளும் பரிசுகளாக வழங்கப்பட்டுள்ளன. ஆனால், எந்தவொரு ஆய்வுக்கும் 'விஸ்கி' பரிசாக அளிக்கப்பட்டதில்லை.

அரியதொரு சாதனையாக, பாஜக பொருளாளர் அறநிலையத்துறை அமைச்சருக்கு இதைப் பரிசாக வழங்கியுள்ள செயல் நம்மை மெய்சிலிர்க்க வைக்கிறது.

இவருடைய பெருந்தன்மையைப் போற்றிப் பாராட்டுவதற்கு, பெரிய பல பெட்டிகள் நிறைய 'விஸ்கி' வாங்கி அவருக்கு அனுப்பிடவே என்னுள்ளம் அவாவுகிறது. ஆனால்,  அதற்கான பொருளாதார வசதி இல்லாததால், இப்போதைக்கு, 'முதுபெரும் பதிவர்' என்னும் தகுதியுடன், 'விஸ்கி' என்னும் அடைமொழியை அவருக்குப் பரிசாக வழங்குகிறேன்.

இனி, பாஜக தொண்டர்கள் மட்டுமல்லாமல், தமிழகமும், ஏன்... ஒட்டுமொத்த இந்த உலகமும் அவரை 'விஸ்கி' சேகர் என்று அழைக்கக் கடவதாக.

வாழ்க 'விஸ்கி' சேகர்'! வளர்க அவர்தம் புகழ்!!

====================================================================================

.