#ஈரானில் உள்ள அனைத்துப் பெண்களும் ஹிஜாப்[ஒட்டுமொத்த உடம்பை மறைக்கும் முக்காடு] அணிவது சட்டப்படி கட்டாயம் ஆகும்.
இவ்வாறான கொடூரத் தாக்குதலுக்கு உள்ளாவதற்குக் காரணமான ‘ஹிஜாப்’புக்கு ஈரான், ஆப்கானிஸ்தான் போன்ற நாடுகள் அதி முக்கியத்துவம் தருவது ஏன்?
//பெண்களுக்கு ஏற்படக்கூடிய பிரச்னைகளில் மிக முக்கியமானது பாலியல் வன்புணர்வுக்கு உள்ளாவது.
உடல் உறுப்புகள் தெரியும்படியாக ஆடை அணியும்போது அவற்றால் காம உணர்வுக்கு உள்ளாக்கப்பட்ட ஆண்கள் வன்புணர்வில் ஈடுபடும் கொடூரம் நிகழ்கிறது.
இக்கொடூரங்களில் சிக்கிச் சீரழியாமலிருக்கத் தங்களுக்குத் தாங்களே ஒரு பாதுகாப்பு வளையத்தை ஏற்படுத்திக் கொள்ளும் வகையில், ஹிஜாப் என்னும் கேடயத்தை இஸ்லாமியப் பெண்கள் பயன்படுத்துகிறார்கள்[https://www.samarasam.net/view-art.php?id=265]// என்கிறார்கள் ‘ஹிஜாப்’பை அதி தீவிரமாக ஆதரிக்கும் இஸ்லாமியர்கள்.
“ஹிஜாப், பெண்ணின் கவர்ச்சியான உடலுறுப்புகளை மறைக்கிறது” என்கிறார்கள் அவர்கள்.
அவர்களின் வாதப்படி, இஸ்லாமியப் பெண்கள் என்றில்லை, அனைத்துப் பெண்களின் அத்தனை உடலுறுப்புகளுமே கவர்ச்சியானவையா? காம இச்சையைத் தூண்டுகின்றனவா?
மார்பகங்களும், கன்னங்களும் உதடுகளும்[அந்தரங்க உறுப்புகள் உட்பட] தூண்டுதலுக்குக் காரணமானவை என்பதில் சந்தேகம் துளியும் இல்லை. அவற்றை மறைத்திடும் வகையில் ஆடை உடுப்பதில் தவறும் இல்லை.
ஆனால்.....
பெண்களின் தலைமுடியும், கழுத்தும், கைகளும்கூட உணர்ச்சியைத் தூண்டும் என்றால் அது அறிவுடைமை ஆகுமா? அவற்றை ஏன் மூடச் சொல்கிறார்கள்?
பெண்கள் உடுக்கும் உடைகளும், கடைகளில் விற்கப்படும் அவர்களுக்கான உள்ளாடைகளும்கூடத் தூண்டுகோள்களாக அமையக்கூடும் என்று சொன்னால், அது ஏற்கத்தக்கதா? அவற்றிற்கும் தடை விதிக்கலாமா?
உரிய மனப் பக்குவம் இல்லையென்றால், விலங்குகளும் பறவைகளும் புணர்ந்து இன்புறும் காட்சிகளைக் காண்பதுகூட உணர்ச்சிகளைத் தூண்டும் என்பது நினைவில் கொள்ளத்தக்கது.
இவை தவிர.....
காணும் ஓவியங்கள், அழகுற வடிக்கப்பட்ட பெண் சிலைகள், பார்க்கும் திரைப்படங்கள்[குறிப்பாக, இணையங்களில் காட்சிப்படுத்தப்படும் ஆபாசக் காணொலிகள்] போன்றவையும் இது விசயத்தில் முக்கியப் பங்காற்றுகின்றன.
இந்நிலையில், ஈரானியரிடமும், ஹிஜாப்பைக் கட்டாயப்படுத்துகிற பிற இஸ்லாம் நாட்டவரிடமும் நாம் முன்வைக்கும் கேள்வி, “இவை அனைத்தையும் நீங்கள் தடை செய்திருக்கிறீர்களா?” என்பதுதான்.
“ஆம்” என்றால் உங்களின் கண்ணுக்குத் தென்படும் அத்தனை ஹிஜாப் அணிந்த பெண்களையும்[மனைவியை, அல்லது மனைவிகளைத் தவிர] உடன் பிறந்த சகோதரிகளாகப் பார்க்கிறீர்களா?
“ஆம்... ஆம்” என்றால், உங்கள் நாட்டு ஆடவர்கள் எல்லோருமே ‘ஏகபத்தினி/பத்தினிகள்’ விரதர்கள் என்றாகிறதே?
“ஆம்... ஆம்... ஆம்” என்றால்.....
நீங்கள் வற்புறுத்துகிற ‘ஹிஜாப்’பை இவ்வுலகத்துப் பெண்கள் அனைவருக்குமான ‘பொது உடை[மை]’ ஆக்கலாம் என்பதில் மாறுபட்ட கருத்துக்கு இடமே இல்லை!