//மத்தியப் பிரதேச மாநிலம், போபாலின் இத்வாரா பகுதியைச் சேர்ந்தவர் ஹபிப் நாசர்; 103 வயதுக் கிழவர்; சுதந்திரப் போராட்ட வீரர். முதல் மனைவியும் இரண்டாவது மனைவியும் இறந்துவிட்ட நிலையில் 49 வயதே ஆன[இது நடுத்தர வயது. 60ஐக் கடந்தவொரு கிழவியைத் தேர்வு செய்திருக்கலாம்] ‘பிரோஸ் ஜகான்’ என்னும் பெண்ணைத் திருமணம் செய்துள்ளார்// என்பது இன்று[19.01.2024] தினத்தந்தியில் வெளியான வியப்பூட்டும் செய்தி.
முதுமைப் பருவத்தில் தனக்கு ஓர் உறுதுணை தேவை என்பதால் இந்தப் பெண்ணை மணந்ததாகத் தெரிவித்திருக்கிறார் ஹபீப் நாசர்[ஓராண்டு கழித்து மண நிகழ்வு குறித்த காணொலி[வீடியோ] வெளியாகியிருக்கிறது].
அண்டை அயலார் உற்றார் உறவினர் என்று பலரும் அவருக்கு வாழ்த்துத் தெரிவித்த நிலையில், சிலர் கிழவரைப் பார்த்துச் சிரித்திருக்கிறார்கள். ஆனால், அதனாலெல்லாம் அவர் மனம் சோர்ந்துவிடவில்லையாம்.
சிரித்தவர்கள், “கிழவனுக்கு இந்தத் தள்ளாத வயதில் பெண்டாட்டி தேவையா[அது விசயத்தில்]?”என்று நினைத்திருக்கலாம்.
103 வயதுக் கிழவன் ஒரு சிறுமியை வன்புணர்வு செய்ததாக[அரிதாக இது போன்ற அட்டூழியங்கள் நாடெங்கும் நிகழ்ந்துள்ளன], ஊடகச் செய்தியொன்று கடந்த ஆண்டில் வெளியானது நினைவில் உள்ளது. அப்படித் தவறு செய்து அவமானப்படுவதைத் தவிர்க்க, இது போன்ற திருமணம் உதவக்கூடும்.
கிழவரின் இந்தத் திருமணம் தவறா, சரியா என்பதை ஆராய்வது நம் நோக்கமல்ல.
வயது 100ஐக் கடந்துவிட்ட நிலையில், ‘இன்றோ நாளையோ, இன்னும் சில நாட்களிலோ எப்போது நம் உயிர் பிரியும் என்றஞ்சி, போதிய உணவின்றி உறக்கமும் இன்றித் தவியாத் தவிக்கும் கிழவர்கள் நடுவே, மணந்துகொண்டவளை ஊர் அறிய ஆட்டோவில் வீட்டுக்கு அழைத்துவந்த இந்தக் கிழவனின் தன்னம்பிக்கையும் துணிவும் நம்மை வியக்க வைக்கின்றன.
மரணத்தை நினைத்துச் செத்துச் செத்துப் பிழைக்கும் முதியவர்களிடையே இவர் ஓர் அபூர்வப் பிறவி.
உலகில் 120 வயதைக் கடந்து வாழ்ந்து சாதனை நிகழ்த்தியவர்கள்[அதிக ஆண்டுகள் வாழ்ந்தவர்களில் சிலர்: ***ஜியான் கால்மன்>பிரெஞ்சு நாட்டவர்>122 ஆண்டுகள் 164 நாட்கள். ***சறத நோஸ்>அமெரிக்கா>119 ஆண்டுகள் 97 நாட்கள். ***கேன் தனக்கா>ஜப்பான்>118 ஆண்டுகள் 10 நாட்கள். ***நுபி ரஜிமா>ஜப்பான்>117 ஆண்டுகள் 260 நாட்கள். ***மாறி லூயிஜ்>கனடா> 117 ஆண்டுகள் 230 நாட்கள்] பலர் உள்ளனர்[இன்னும் அதிக ஆண்டுகள் வாழ்ந்தவர்கள் இருக்கக்கூடும். தேடிக் கண்டறிதல் சாத்தியப்படவில்லை].
‘ஹபிப் நாசர்’ மேற்கண்ட சாதனைகளையெல்லாம் முறியடிக்கும் வகையில் இன்னும் இன்னும் இன்னும் பல ஆண்டுகள் வாழ்ந்து சிறக்க மனதார வாழ்த்துவோம்.
* * * * *