‘இந்தி’யர் அல்லாத ‘இந்தியர்’அமித்ஷாவின் இந்திப் பற்று!!!

இந்தி தினத்தை முன்னிட்டு அமித்ஷா அளித்துள்ள பேட்டியில்,  ‘இந்தி திவஸ்' நாளில் நாட்டு மக்களுக்கு வாழ்த்துகளைத் தெரிவித்துக்கொள்கிறேன். இந்தியா பல ஆண்டுகளாகப் பல்வேறு மொழிகளின் நாடாக இருந்து வருகிறது. இந்தி எப்போதும் ஜனநாயக மொழியாக இருந்து வருகிறது[???]. உலகின் மிகப் பெரிய ஜனநாயக நாடான இந்தியாவில், பல்வேறு மொழிகளுக்கு இடையே ஒற்றுமையை ஏற்படுத்தும் மொழியாக இந்தி உள்ளது[‘இந்தியன்’ என்னும் உணர்வு ஒற்றுமையை ஏற்படுத்தாதா?!].

சுதந்திரப் போராட்டக் காலத்தில் இருந்து இன்றுவரை நாட்டு மக்களை ஒன்றிணைக்கும் மொழியாக இந்தி உள்ளது. ஐக்கிய நாடுகள் சபையிலும் இந்தியை ஊக்குவிக்க நடவடிக்கை எடுக்கப்பட்டுள்ளது. அகில இந்திய இந்தி மாநாடு இந்த ஆண்டு புனே நகரில் நடைபெறும்" என்று தெரிவித்தார்[https://www.hindutmil.in/amp/news/india/1123286-hindi-has-played-an-important-role-in-uniting-the-country-amit-shah.htmla].

அமித்ஷா அவர்களே,

இந்திய அரசியல் சாசனம், ஆங்கிலத்தோடு இந்தியிலும் பதிவு செய்யப்பட்டுள்ளது. இந்தியாவில் பேசப்படுகிற மற்ற மொழிகளை ஒன்றியத்தை ஆண்ட எவரும் சீந்தவே இல்லை.

ஆங்கிலத்தில் உள்ள அரசியல் சட்டப் பிரிவு[?]களுக்கு ஆங்கிலப் பெயர்களை நீக்கிவிட்டு இந்திப் பெயர்களைச் சூட்டுகிறீர்கள்.

நாடாளுமன்றத்திலும் மற்ற மொழிக்காரர்களுக்குப் புரியக்கூடாது, அவர்களின் குறுக்கீடும் இருக்கக் கூடாது என்பதற்காக இந்தியிலேயே பேசுகிறீர்கள்.

நடுவணரசின் நிறுவனங்கள் அத்தனையிலும் இந்தி திணிக்கப்பட்டுவிட்டது.

மேற்கண்ட நிறுவனங்களுக்கான வேலை வாய்ப்பிலும் அவர்களுக்கே முன்னுரிமை.

ஐக்கிய நாடுகள் சபையிலும் இந்தியை ஒரு பயன்பாட்டு மொழியாக்க அயராது பாடுபடுகிறீர்கள்.

இந்தியாவின் இணைப்பு மொழி, பிணைப்பு மொழி, அணைப்பு மொழி என்று எல்லாமே இந்திதான் என்று மேடைதோறும் வாய் வலிக்கப் பேசுகிறீர்கள். இந்திய அரசின் வருமானத்தில் பெரும் தொகையை இந்தித் திணிப்புக்காகச் செலவிடுகிறீர்கள்.

இன்னும் எதற்கு, இந்தியை  இந்தியர்கள் அனைவரும் ஏற்க வேண்டும் என்று  வாய் வலிக்கப் பேசுகிறீர்கள்? இந்தி தெரியாத இந்தியனே இருக்கக் கூடாது என்று நினைக்கிறீர்களா?

இந்தியாவில்[பாரத்] 35% இந்தி பேசுபவர்கள்[எழுத்து வடிவம் பெறாத மொழிகள் எல்லாம் இந்தி ஆக்கப்பட்டன] என்பதால், ஏற்கனவே இரண்டு தடவை ஆட்சியைக் கைப்பற்றிய நீங்கள், வரவிருக்கும் தேர்தலிலும் இந்திக்காரர்களின் வாக்குகளைச் சிந்தாமல் சிதறாமல் அள்ளிக் குவித்து ஆட்சியைக் கைப்பற்றுவீர்கள் என்பதில் சந்தேகமே இல்லை.

இந்த வெற்றி தரும் போதைதான், உங்களின் தாய்மொழி குஜராத்தியாக இருந்தாலும் அதை மறந்து இந்தியைக் கொண்டாடச் செய்திருக்கிறது.

65% பிற மொழி பேசுவோர் விழிப்புணர்வு பெற்று, ஒருங்கிணைந்து தேர்தலில் உங்களை எதிர்கொண்டால் ஒழிய[நடக்கப்போவதில்லை] உங்கள் காட்டில் அடைமழை தொடரும் என்பதிலும் சந்தேகம் இல்லை.

இந்தியை ஒட்டுமொத்த இந்தியாவின் மொழியாக மட்டுமல்ல, ஐ.நா.மொழியாக மட்டுமல்ல, நீங்கள் நினைத்தால் அகில உலக மொழியாகவும் ஆக்கலாம்.

அதைச் செய்தால், உங்களின் ஆயுள் முழுக்க, இந்த நாட்டின் முக்கிய ஆட்சிப் பொறுப்பு உங்கள் கையில்தான்!

வாழ்க இந்தி! வளர்க அமித்ஷா புகழ்!!