'கார் வெடிப்புச் சம்பவத்தில் உரிய நடவடிக்கை எடுக்க வலியுறுத்தி இன்று கடையடைப்புப் போராட்டத்தில் ஈடுபடப் போவதாகக் கோவை மாவட்ட பா.ஜ.க அறிவித்திருந்தது. வியாபாரிகள், மக்களின் கோரிக்கையை ஏற்றுத் தங்களது கடையடைப்புப் போராட்டத்தை அவர்கள் ஒத்திவைத்தனர்'
இது இன்றைய மாலைச் செய்தி[மாலைமலர் 31 அக்டோபர் 2022 11:42 AM].
இன்று வெளியான பலதரப்பட்ட செய்திகளில் இதுவும் ஒன்று. விவாதிப்பதற்கோ விமர்சனம் செய்வதற்கோ இதில் யாதொன்றும் இல்லை.
ஆனால், இதே இதழில் வெளியான வேறொரு செய்தியோ வெறுப்பேற்றுகிறது; எரிச்சலூட்டுகிறது.
'கோவைக்கு வர இருந்த பெரிய ஆபத்தைக் கோட்டை ஈஸ்வரன் தடுத்து நிறுத்திவிட்டதாகவும்[கோவை, கோட்டை ஈஸ்வரன் கோவில் முன்பு கடந்த 23ஆம் தேதி இடம்பெற்ற கார் வெடிப்பு நிகழ்வை மனதில் கொண்டு இப்படிப் பேசியிருக்கிறார் அவர்]. இதற்கு நன்றி கூறும் வகையில் கோட்டை ஈஸ்வரனைத் தரிசிக்கக் கோவை வருவதாகவும் அண்ணாமலை தெரிவித்திருந்தார். தெரிவித்தபடியே கோட்டை ஈஸ்வரனைத் தரிசித்தார்' என்பதே அந்தச் செய்தி.
இவருடைய கட்சி ஆட்சி நடத்துகிற குஜராத் மாநிலத்தில், ஒரு தொங்கு பாலம் அறுந்து விழுந்து 141 மனித உயிர்கள் பலியாயினவே, அந்தத் தொங்கு பாலத்தை ஓடோடிப் போய், விழாமல் தாங்கிப் பிடித்துப் பலியான உயிர்களை ஈஸ்வரன் காப்பாற்றியிருக்கலாம். ஏன் செய்யவில்லை?[அது அங்குள்ள வேறொரு கடவுளின் கடமை என்று அண்ணாமலை நினைத்துவிட்டாரோ?].
கொலை, கொள்ளைச் சம்பவங்களை விடுங்கள், சிறுமிகளும், இளம் பெண்களும் வன்புணர்வு செய்து வதைக்கப்படும் நிகழ்வுகள் தினம் தினம் இந்த நாட்டில் நடக்கின்றன.
அவர்களில் எத்தனைப் பேரைப் பாதிப்புக்கு உள்ளாகாமல் காப்பாற்றியிருக்கிறார் இவரின் ஈஸ்வரக் கடவுள்?
மத்தியில் ஆளுகிற பலம் வாய்ந்த கட்சிக்காரர் என்பதால் மனம் போன போக்கில் அரசியல் பேசுகிறார் தமிழ்நாடு 'பாஜக' தலைவரான இவர்.
அரசியல் யார் வேண்டுமானாலும் பேசலாம். கடவுள் குறித்தும், அவருடைய செயல்பாடுகள் குறித்தும் பேசுவதற்குக் கொஞ்சமேனும் சிந்திக்கும் அறிவு தேவை.
அரசியல்வாதி அண்ணாமலை அவர்கள் இனியும் கருணை வடிவானவன் என்று சொல்லப்படும் கடவுள் குறித்துப் பேசாமலிருப்பது, அவருக்கு நல்லதோ அல்லவோ இந்த நாட்டுக்கு நல்லது.
===================================================================