தமிழ்நாட்டு அமைச்சர்களுக்கு ஒரே ஒரு வேண்டுகோள்!

''அமைச்சர்களே, உங்களின் சுகபோக வாழ்க்கை முக்கியமா, தமிழனின் தன்மானமா? எது? எது? எது? இன்றே, இக்கணமே முடிவு செய்யுங்கள்.''

'சொடக்கு'ப் போடும் நேரத்தில், ஒருவரின் பேச்சை அல்லது எழுத்தை மொழியாக்கம் செய்வதற்கான கருவிகள் கண்டுபிடிக்கப்பட்டுவிட்ட இன்றைய அறிவியல் யுகத்தில், பிடிவாதமாக, மாநில மொழிகளை ஆட்சிமொழிகளாக ஆக்க மறுத்து, இந்தியே 'இந்தி'யாவின் தேசிய மொழி என்று சொல்லி அதைத் திணித்துக்கொண்டிருக்கும் மத்திய அரசு, சமற்கிருதத்தைத் திணித்தது; 'நீட்'டைத் திணித்தது. 

காவிரிநீர்ப் பங்கீட்டுப் பிரச்சினையில் உச்சநீதிமன்ற ஆணையை அலட்சியம் செய்து நமக்குத் துரோகம் இழைத்தது.

அண்மைக் காலங்களில், கவர்னருக்கான அதிகாரம் என்ற பெயரில் பல்கலைக் கழகங்களுக்கான துணைவேந்தர்களைத் திணித்திருக்கிறது.

தமிழன், ஜாதிமத வேறுபாடுகளைக் களைந்து, தன் முழு பலத்தையும் திரட்டி நடுவணரசை எதிர்த்துப் போராட வேண்டிய தருணம் இது. 

அமைச்சர்களே, நீங்களும் தமிழர்கள்தான். ஆனாலும், ஆட்சியாளர்களாகிய நீங்கள் போராடுவதுபோல் நடிப்பீர்களே தவிர உண்மையில் போராட மாட்டீர்கள். காரணம்.....

உங்களின் உலகறிந்த 'பலவீனம்'. அதைப் புரிந்துகொண்டுதான், உங்களைத் தங்களுக்கான 'சேவகர்கள்' ஆக்கித் தமிழ்நாட்டை ஆண்டுகொண்டிருக்கிறார்கள் 'அவர்கள்'; திணிப்புகளைச் செய்துகொண்டிருக்கிறார்கள். எனவே.....

நெஞ்சு நிறைந்த தமிழ் உணர்வுடன் வேண்டுகிறோம், ஆட்சிக் கட்டிலிலிருந்து இறங்குங்கள்; ஒதுங்கி நில்லுங்கள். நீண்ட நெடும் போராட்டத்தைத் தொடர்ந்து நடத்திட நம் மக்கள் தயாராக இருக்கிறார்கள்.

''போராடட்டுமே. அந்தப் போராட்டத்துக்கு நாங்கள் தடையாகவா இருக்கிறோம்?'' என்று கேட்கிறீர்களா?

ஆம். நீங்கள் ஆட்சியிலிருப்பது மிகப் பெரும் தடைதான்.

போராடும் தமிழ் இன உணர்வாளர்களைக் காவல்துறையினரைக் கொண்டு தாக்கி, அவர்களின் உத்வேகத்தைக் குறைக்கிறீர்கள்; ஜாமீனில்கூட வெளிவர இயலாத பிரிவுகளில் வழக்குப் போட்டு உள்ளே தள்ளுகிறீர்கள்.

நாங்கள் பதவி விலகி, கவர்னர் ஆட்சி வந்தால் இதெல்லாம் நடக்காதா என்றெல்லாம் கேள்விகள் கேட்டுக் காலதாமதம் செய்யாதீர்கள். கவர்னர் ஆட்சியின் அடக்குமுறைகளையெல்லாம் அவர்கள் பார்த்துக்கொள்வார்கள். உங்களின் பரம எதிரிகள் ஆட்சியைக் கைப்பற்றுவார்களே என்றும் கவலைப்படாதீர்கள். இனி தமிழகத்தை யார் ஆளவேண்டும் என்பதையும் அவர்கள் கவனத்தில் கொள்வார்கள்.

மீண்டும்  வேண்டுகிறோம்.....

ஒதுங்கி நில்லுங்கள். தன்மானமுள்ள தமிழர்கள் போராடட்டும்.

ஆதியோகியும் ஜக்கியின் அதிபுத்திசாலித்தனமும்!!

'இந்தியச் சுற்றுலாத்துறை, கோவை ஈஷா யோக மையத்திலிருக்கும் 112 அடி ஆதியோகி சிலையை இன்கிரிடிபிள் இந்தியா[Incredible India (styled as Incredıble!ndıa) is the name of an international tourism campaign by the Government of India to promote tourism in India since 2002 to an audience of global appeal..Wikipedia] சுற்றுலாத் தலமாக அறிவித்துள்ளது' என்பது செய்தி[தினமலர், 04.04.2018].

செய்தியறிந்து மகிழ்கிறோம்.

ஈஷாயோக மைய நிறுவனர் சத்குருவால்['சத் (Sat) (சமக்கிருதம்: सत्) எனும் சமசுகிருத மொழிச் சொல்லிற்கு உண்மையான, மாறாத, முக்காலங்களில் என்றும் நிலைத்து இருக்கும் பரம்பொருளைக் குறிக்கிறது' என்கிறது விக்கிப்பீடியா. இவரென்ன பரம்பொருளுக்கே குருவா?] வடிவமைக்கப்பட்டு, பிரதிஷ்டை செய்யப்பட்டுள்ள இச்சிலை, 2017ஆம் ஆண்டு மகா சிவராத்திரி நாளில் புண்ணிய பாரதத்தின் பிரதான் மந்திரி நரேந்திர மோடியால் திறந்து வைக்கப்பட்டதாம். மிக்க மகிழ்ச்சி.

இச்சிலை, 'உலகின் மிகப் பெரிய மார்பளவுச் சிலை' என்று கின்னஸ் உலக சாதனைப் புத்தகத்தில் மே 2017இல் இடம்பெற்றதாம். மிகவும் மகிழ்கிறோம்.

ஆதியோகியின் மகிமை பொருந்திய திருமுகத்திற்கு முன்னால் 10 லட்சத்திற்கும் மேற்பட்டோர் வெகு சாதாரணமாக அமர்ந்து தியானம் செய்ய முடியுமாம். மகிழ்ச்சியோ மகிழ்ச்சி.

இத்துடன் செய்தி முற்றுப்பெற்றிருந்தால் தேவலாம். இதற்கு மேலும், ஜக்கி உதிர்த்த சில தத்துவங்களைத் தொகுத்தளித்திருக்கிறது தினமலர்.

''எந்தவொரு மதமும் தோன்றுவதற்கு முன்னால், தோராயமாக 15000ஆண்டுகளுக்கு முன்பு, யோக அறிவியலைத் தன் ஏழு சீடர்களான சப்தரிஷிகளுக்குப் பரிமாறினார் முதல் யோகியான ஆதியோகி'' என்கிறார் வாசுதேவ்.

பரம்பொருளின் குருவான அருள்மிகு ஜக்கி அவர்கள் இதற்கான வரலாற்று ஆதாரங்களைத் தரவில்லை; இவ்வாறான கற்பனைக் கதைகளை மக்கள் மத்தியில் பரப்புவதன் மூலம் பக்தி நெறி வளர்க்கிறாரா, தன்னை வளர்த்துக்கொள்கிறாரா?

நெற்றிக்கண் போன்ற திலகத்துடனும், ஜடாமுடியுடனும் காட்சியளிக்கிற இந்தச் சிலை சிவபெருமானுக்கான உருவத்தை  மனதில் கொண்டு வடிவமைக்கப்பட்டது.  இந்தச் சிவபெருமான்தான் 15000ஆண்டுகளுக்கு முன்பிருந்த ஆதியோகி என்கிறார் வாசுதேவ்.

பதினையாயிரம் என்ன, பத்து லட்சம் யுகங்கள், பத்துக் கோடி யுகயுகாந்தரங்கள் என்றுகூட அடித்துவிட்டிருக்கலாம். யாரும் கேள்வி கேட்க மாட்டார்கள். பிரதான் மந்திரியின் ஆத்ம நண்பரல்லவா?

மேலும், தத்துவம் என்னும் பெயரில் ஏதேதோ சொல்லி மண்டை காய வைக்கிறார் ஜக்கி.

''உலகின் அடுத்த தலைமுறையினர் நம்பிக்கைகளைப் பின்பற்றுபவர்களாக இல்லாமல் தேடுதல் உடையவர்களாக இருப்பார்கள்'' என்கிறார் 

நம்பிக்கைகள் என்று எவற்றைச் சொல்லுகிறார்?

கடவுள், மதம் போன்றவற்றின் மீதான நம்பிக்கைகளா?  பாவம், புண்ணியம் தொடர்பான நம்பிக்கைகளா? மூடநம்பிக்கைகளா? 

''வரும் வருடங்களில் தத்துவம், சித்தாந்தம் மற்றும் நம்பிக்கை முறைகள்[நம்பிக்கையில் முறைகளா? புரியலையே!] அனைத்தும் காரண அறிவு[இதுக்கென்ன விளக்கம்? காரணங்களைத் தேடும் அறிவா?] மற்றும் அறிவியல்பூர்வமான சோதனைகளுக்கு முன் தாக்குப்பிடிக்க முடியாமல் தன்னால் உடைந்துபோகும்'' என்பது சத்குருவின் நவயுக தத்துவம்.

அறிவியல் வளர்ச்சி பெறும்போது, தத்துவம், சித்தாந்தம் எல்லாம் உடைந்து போகும், அதாவது அழிந்துப்போகும் என்கிறார். அப்புறம் எதற்கு இவர் இன்னும் தத்துவம் சித்தாந்தம் எல்லாம் பேசித் திரிகிறார்? பிரமாண்ட ஆதி யோகியை வைத்து மக்களைப் பித்தர்கள் ஆக்கிக்கொண்டிருக்கிறார்?

இந்த மனிதருக்குத் தத்துவமும் தெரியாது; சித்தாந்தமும் புரியாது.

மனம்போன போக்கில் கொஞ்சம் வித்தியாசமாக எழுத வைத்ததோடு ஆடம்பர ஆடைகளுடுத்த படங்களையும் போட்டு, சத்குரு ஆக்கி இவரைப் பிரபலப்படுத்தியது ஆனந்தவிகடன் வார இதழ். 

பயன் விளைகிறதோ இல்லையோ, தியானப் பயிற்சி, கூட்டு வழிபாடு, ஆட்டம்பாட்டம் என்று கவர்ச்சிகரமான பல செயல்திட்டங்களின் மூலம் மக்களை ஈர்த்துத் தம்வசப்படுத்திய ஜக்கி வாசுதேவ், ஊடகங்களின் ஆதரவுடன் புகழைத் தக்கவைத்ததோடு ஆன்மிகத்துறையில் உச்சநிலையை எய்திவிட்டார்.

ஜக்கி ஆங்கில அறிவு படைத்தவர் மட்டுமல்ல, மக்களின் மனங்களைப் படிப்பதில் அதிபுத்திசாலியும்கூட!

=============================================================================