அவர்களது கைகளில் இருக்கும் ஸ்மார்ட் போன்களில் ஆபாசப் படங்களும், அந்தரங்கக் கட்டுரைகளும் தாராளமாகக் காணக்கிடைக்கின்றன.
இது நவீன உலகின் சாபக்கேடு என்றால் அதில் தவறேதும் இல்லை. காரணம்.....
ஒரு காலத்தில் இலைமறை காயாக மட்டுமே புழக்கத்தில் இருந்துவந்த ஆபாசம் இன்று, 'எங்கெங்கு காணினும் ஆபாசமே' என்று சொல்லும் அளவுக்கு நுண் கிருமிகளாகப் பரவிக்கொண்டிருக்கிறது.
குளியறைகளிலும், ஒதுக்குப் புறமான இடங்களிலும் மறைத்து மறைத்துப் படித்த ஆபாசக் கதைகளையும் தத்ரூபமான காட்சிகளையும் இன்று தங்களுடைய தனி அறையிலேயே அச்சமில்லாமல் படிக்கிறார்கள்; கண்டு களிக்கிறார்கள். களம் அமைத்துக் கொடுப்பவை லேப்டாப்கள், ஸ்மார்ட்போன்கள் ஆகியவை.
பேஸ்புக், டுவிட்டர் போன்ற சமூக வலைத்தளங்களும் தத்தம் பங்குக்குக் கவர்ச்சி மீம்ஸ்களை அள்ளித் தெளிக்கின்றன.
இரட்டை அர்த்த வசனங்கள், ஆபாசச் செய்கைகள், அரை நிர்வாணக் காட்சிகள், இளைஞர்கள்-இளம்பெண்களை மட்டுமே குறிவைத்து எடுக்கப்படும் கவர்ச்சித் திரைப்படங்கள் என இவையும் தம் பங்குக்கு ஆபாசத்தைத் திணி திணி என்று திணிக்கின்றன.
இங்கே குறிப்பிடத்தக்க இன்னொரு 'பயங்கரம்'.....
இவற்றைவிடவும், இளசுகளைச் சீரழித்துக்கொண்டிருப்பது இணையத் தளங்களின் ‘லைவ்-சாட்’ எனப்படும் வசதி.
இந்த இணையத் தளங்களில் நுழைவுக் கட்டணம் செலுத்திப் பதிவு செய்துகொண்டால், நம்முடைய கட்டளைக்குத் தலையாட்டும் பொம்மைகளைப் போன்ற பெண்கள் நேரலையில் தோன்றுவார்கள். இந்தியா, ஜப்பான், அமெரிக்கா, ஆஸ்திரேலியா போன்ற பல நாடுகளில் இருந்தும் பலர் இந்த இணையத் தளங்களில் இணைந்திருப்பதால், ஆசைக்கேற்ப ஆட்களைத் தேர்வு செய்யமுடியும்.
இவை பல இளையோரின் ஆசைகளைத் தீர்க்க வழியாக அமைகின்றன. தங்களை நல்லவராகச் சமூகத்தில் காண்பிக்க நினைப்பவர்கள் இத்தகைய ஆபாச இணையத் தளங்கள் வழியாகத் தங்களின் அந்தரங்க ஆசைகளைச் தீர்த்துக்கொள்கிறார்கள்.
மேலும், உடல் அழகை வெளிப்படுத்த விரும்பியும், ஆண்மையின் பெருமையை வெளிக்காட்டும் ஆசையாலும், ஆண், பெண் நட்புகளை உருவாக்கும் நோக்கத்துடனும், நிர்வாண உடலைப் பொழுதுபோக்காகக் காட்ட நினைத்தும் பலர் இத்தகைய இணையத் தளங்களில் இணைகின்றனர். சிலர் பணம் சம்பாதிக்கும் நோக்கத்திற்காகவும், இணைகிறார்கள்.
அந்தரங்கக் கதைகள், ஆபாச வீடியோக்கள், 'லைவ் செக்ஸ் சாட்' சம்பந்தமான உலக மார்க்கெட்டில் இந்தியாவும் இடம்பிடித்து முன்னேறிக்கொண்டிருக்கிறது. இந்த வேகம் இணையத் தலைமுறையினரின் எதிர்காலம் மீதான அச்சத்தை அதிகப்படுத்தியிருக்கிறது.
குழந்தைகள் மீதான பாலியல் அத்துமீறல், ஆசிரியர்-மாணவர் இடையிலான காதல், கள்ளத்தொடர்பு, கூட்டாக நிகழ்த்தப்படும் பாலியல் வன்முறை போன்ற பல பிரச்சினைகளுக்கு இத்தகைய ஆபாசப் படங்கள் காரணமாகிவிடுகின்றன. அதனால்தான், ஆபாசத்தை விரும்பும் இளைய தலைமுறையினர் பற்றிய கவலை நம்மிடையே அதிகரித்திருக்கிறது.
குறிப்பாகப் பிள்ளைகளைப் பெற்றவர்களின் மனநிலை விவரிப்புக்கு அப்பாற்பட்டதாக உள்ளது!
https://www.dailythanthi.com/amp/News/Sirappukatturaigal/2018/11/03150115/Internet-generation.vpf இல் வெளியான கட்டுரை, சற்றே சுருக்கிப் பதிவு செய்யப்பட்டுள்ளது.