ஓரவஞ்சனைக் கடவுளும் மருளும் மனிதனும்!!!

 மனிதனுக்கு ஆறறிவு வாய்த்துள்ளது. 

இதைப் பயன்படுத்தி இவன் செய்பவை நல்லவையோ கெட்டவையோ, ஆறாவது அறிவால் சிந்தித்துக் கடவுள் என்றொருவரைக் கற்பித்ததோடு, அவரை வழிபடுவதால் பல நன்மைகளைப் பெறலாம், குறிப்பாகச் செத்தொழிந்த பிறகு சொர்க்கம் சேர்ந்து, சுகபோகத்தில் மூழ்கிக் கிடக்கலாம்(எவ்வளவு காலத்திற்கு?) என்றெல்லாம் நம்பினான்; நம்புகிறான். 

கோயில்கள் கட்டி, சிலைகள் நிறுவி, மந்திரம் சொல்லி அவற்றிற்கு உயிரூட்டி, தங்க & வைர நகைகள் பூட்டி அலங்கரித்து, விழாக்கள் நடத்தி, குஷிப்படுத்தி[கடவுள்களை]ப் பயனடைகிறானோ அல்லவோ வாழ்நாள் எல்லாம் அவரைக் கொண்டாடுகிறான்; மனம்போன போக்கில் கூத்தடிக்கிறான்.

ஆனால், 

அவர், தாம் படைத்த அனைத்து உயிர்களையும் புறந்தள்ளி, தங்களுக்கு மட்டும்  ஆறறிவைத் தந்தது[அனைத்து உயிர்களையும் ஐந்தறிவினவாகவே படைத்து ஆறாம் அறிவையும் கொடுத்திருக்கலாம்.  கொடுத்திருந்தால், “எல்லாம் பரிணாம வளர்ச்சி; இயற்கை நிகழ்வுகள்; கடவுளும் இல்லை கத்தரிக்காயும் இல்லை” என்று பகுத்தறிவு பேச இடமிருந்திருக்காது] கருணைக் கடவுளுக்கு அழகல்ல என்று ஒருபோதும் சிந்தித்ததே இல்லை; அவரைக் கண்டித்து வசைமாரி பொழிந்ததும் இல்லை!

பயம் ஐயா பயம்! தான் கற்பித்த மாயக் கடவுளிடம் அத்தனைப் பயம் மனிதனுக்கு!

அனுமானக் கடவுளும், நிரூபிக்க அல்லாடும் அரைவேக்காடு விஞ்ஞானியும்!!!

ஹார்வர்ட் விஞ்ஞானியான டாக்டர் வில்லி சூன்(Dr Willi Soon) (பிறப்பு 30-9-1965) கடவுள் இருக்கிறார் என்பதை ஒரு கணிதச் சூத்திரம் நிரூபிக்கிறது என்று கூறியுள்ளார்[கணிதச் சூத்திரங்கள் மனிதர்களின் கண்டுபிடிப்பு. இதன் மூலம் கடவுளின் ‘இருப்பை’ உறுதிப்படுத்துவதாகச் சொல்லி, சாமானியர் காதுகளில் பூச்சுற்றுகிறார். கடவுளின் ஆயுளைக் கண்டறிவதற்கோ, அல்லது அவர் எப்போதும் இருந்துகொண்டே இருக்கிறார் என்பதை நிரூபிப்பதற்கோ கணிதச் சூத்திரம் உதவுமா?].

விஞ்ஞானத்தின் விளக்கத்திற்கு அப்பாற்பட்டு[கவனத்தில் கொள்க] பிரபஞ்சம் இருப்பதை க்ளோஸ்ட் ஸ்பேஸ்டைம் கர்வேச்சர்* நிரூபிப்பதாகச் சூன் கூறியுள்ளார்[பரிந்துரைக்கிறது என்பதை இவர் ‘நிரூபிப்பதாக’க் கூறியிருக்கிறார். கர்வேச்சரை உருவாக்கிப் பயன்படுத்திக் கடவுள் இருப்பதையும் நிரூபித்தவர் யார்? எப்போது?]

டாக்டர் வில்லி சூன் ஒரு வான் இயற்பியல்(Astrophysicist) விஞ்ஞானி. மலேசியாவைச் சேர்ந்த இவர் ஹார்வர்ட் ஸ்மித்ஸோனியன் செண்டர் ஃபார் அஸ்ட்ரோ பிஸிக்ஸ் பிரிவில் நீண்ட காலம் ஆய்வு நடத்தியவர்.

நாம் நினைப்பதைவிட அறிவியலும் இறை நம்பிக்கையும் மிக நெருங்கிய தொடர்பைக் கொண்டிருக்கின்றன என்றும் இவர் கூறியிருக்கிறார்[‘அறிவியல் விளக்கத்திற்கு அப்பாற்பட்டிருப்பது பிரபஞ்சம்’ என்று மேலே குறிப்பிட்டிருக்கிறார். பிரபஞ்சமே அறிவியலுக்கு அப்பாற்பட்டதாக இருக்கையில், அறிவியலும் இறை நம்பிக்கையும் மிக நெருங்கிய தொடர்புடையவை என்று இவர் கூறியது எப்படி? முற்றிலும் முரண்பட்ட கூற்று இது.

டக்கர் கார்ல்ஸன் நெட்வொர்க்(Tucker Carlson Network) தளத்திற்குக் கொடுத்த ஒரு பேட்டியில், அவர் “கணிதக் கொள்கைகளும் அறிவியல் கண்டுபிடிப்புகளும் பிரபஞ்சமானது ஒரு குறிக்கோளுடனேயே படைக்கப்பட்டிருக்கிறது[என்ன குறிக்கோள்?] என்ற கருத்தை ஆதரிக்கின்றன” என்று கூறியிருப்பதாக இவர் குறிப்பிட்டிருக்கிறார்.

பிரிட்டனைச் சேர்ந்த விஞ்ஞானியான பால் டிரக்(Paul Dirac), 1928இல் ஆண்டி-மேட்டர்[மேட்டர்>பொருள்; ஆண்டி> எதிரானது. எதுவும் இல்லாமலிருப்பதா? அதாவது, வெற்றிடமா? இப்படியான ஒரு நிலை கண்டுபிடிக்கப்பட்டுள்ளதா?]  இருப்பதாகக் கணிதத்தின் வாயிலாகக் கூறி இருப்பதையும்[இவருடைய கூற்றே குழப்பமானது. இந்த லட்சணத்தில் சப்பைக்கட்டு வேறு] இவர் ஆதாரமாகக் காட்டியுள்ளார்.

இவர் தரும் கூடுதல் ஆதாரங்கள் விஞ்ஞானிகளுக்கே புரியுமா என்பது சந்தேகம். 

சாமானியர்களைக் குழப்பத்தை ஆழ்த்தும் இம்மாதிரிக் கருத்தாக்கங்களை ஊடகங்கள் மொழியாக்கம் செய்து வெளியிடுவதால், அவற்றிற்குப் பயனுண்டோ இல்லையோ[பார்வை எண்ணிக்கை கூடாது; குறையும்], சில அரைவேக்காடு விஞ்ஞானிகள் பிரபலம் ஆகிறார்கள் என்பது மறுக்க இயலாதது.

*(Closed Spacetime Curvature> பிரபஞ்சம் ‘முடிவு இல்லாதது’ அல்ல; மாறாக ஒரு குறிப்பிட்ட அளவும்  வடிவமும் கொண்டுள்ளது என்பதை பரிந்துரைக்கிறது)

          https://kalkionline.com/science-and-technology/god-exists-scientist-explains-with-mathematical-proof