உச்ச நீதிமன்றத்தின் கண்டனங்களால் பயன் ஏதும் உண்டா?

'காவிரி நீர்' வழக்குத் தொடர்பான விசாரணையின்போது[09.04.2018], 'ஸ்கீம்' குறித்து நடுவணரசு மிகவும் தாமதமாக 'விளக்கம்' கேட்டதைச் சுட்டிக்காட்டி, உச்ச நீதிமன்றம் கண்டனம் தெரிவித்தது.

''ஆகா...உள்நோக்கத்துடன் செயல்படும் மத்திய அரசுக்கு உச்ச நீதிமன்றம் கண்டனம் தெரிவித்துவிட்டது'' என்று நம் அரசியல் தலைவர்களும் தமிழ் இன உணர்வாளர்களும் மகிழ்ச்சி தெரிவித்தார்கள். நீங்களும் நானும்கூட மகிழ்ந்தோம்.

கொஞ்சம் யோசித்தபோது.....

'உச்ச நீதிமன்றம் இவ்வாறு கண்டனம் தெரிவிப்பதால் பயன் ஏதும் உண்டா? அதாவது, அடுத்தடுத்துத் தெரிவித்தால், அக்கண்டனங்களால் நடுவணரசுக்கு ஏதும் பாதிப்பு உண்டா?' என்னும்  கேள்வி என்னுள் எழுந்தது.

'உண்டு' என்றால் நடுவணரசு தண்டிக்கப்பட வேண்டும். 

இது சாத்தியம் எனின்,  தண்டனையை வழங்குவது யார்?

குடியரசுத் தலைவர்தானே?

உச்ச நீதிமன்றத்தின் பரிந்துரையின் பேரில் அமைச்சரவையைக் கலைத்திட குடியரசுத் தலைவர் ஆணை பிறப்பிக்கலாம்; வாய்ப்பு அமையுமெனின், பிறிதொரு கட்சிக்கு ஆட்சியமைக்க வாய்ப்பளிக்கலாம். அது சாத்தியப்படவில்லையெனில், நாடாளுமன்றத்தைக் கலைத்துவிட்டுப் புதிய தேர்தலுக்கு ஆணை பிறப்பிக்கலாம்[சட்ட ரீதியான பிற நடவடிக்கைகள் குறித்து எனக்கு ஏதும் தெரியாது].

குடியரசுத் தலைவரின் ஆணைக்கு ஆளும் கட்சி  கட்டுப்படுதல் வேண்டும். மறுத்தால் நடுவணரசுக்குரிய முழு அதிகாரத்தையும்[முப்படையையும் நிர்வகித்தல் உட்பட] குடியரசுத் தலைவர், தம்வசப்படுத்துவதன் மூலம் சட்டத்துக்கு உட்பட்டு உரிய நடவடிக்கையை எடுக்கலாம்.

ஆக, உச்ச நீதிமன்றம் என்னும் உச்ச அதிகாரம் படைத்த அமைப்பானது, தன் உத்தரவை நடுவணரசு நடைமுறைப்படுத்தாமல் காலம் தாழ்த்தும்போது, அல்லது உத்தரவைக் கிடப்பில் போடும்போது அது தெரிவிக்கும் கண்டனம் அத்தியாவசியமானது என்பதும், அந்தக் கண்டனத்திற்கு உரிய பயன் விளைதல் முக்கியம் என்பதும் தெளிவாகிறது.  பயனேதும் விளைவதில்லை எனின்.....

அது தெரிவிக்கும் கண்டனங்கள் எல்லாமே வெற்றுச் சடங்குகள் என்றாகிவிடும்.
=================================================================================

முக்கிய குறிப்பு:

இந்திய அரசியல் சட்டம் குறித்த அடிப்படை அறிவுகூட இல்லாதவன் நான். ஆர்வம் காரணமாக என்னுள் எழுந்த சந்தேகத்தைப் பதிவு செய்திருக்கிறேன். அரசியல் சட்ட அறிவு வாய்த்தவர்கள் இது குறித்துப் பதிவு எழுதினால் என் போன்ற பலருக்கும் அது பயன் தருவதாக அமையும். நன்றி.

தமிழ்நாட்டின் அடுத்த 'முதலமைச்சர்' தமிழிசையே!!!

தமிழகப் 'பாசக' தலைவர் தமிழிசை அவர்களின் கனிவான கவனத்திற்கு.....

''தமிழ்நாட்டிற்கு ராணுவத்தை அனுப்பினாலும் அஞ்சமாட்டோம்'' என்று, திரையுலகம் நடத்திய, காவிரி நீருக்கான அறப்போராட்டத்தில் ஆர்ப்பரித்தார் நடிகர் சத்தியராஜ். ''ஐ.டி. ரெய்டுக்கும் அஞ்ச மாட்டீர்களா?'' என்று நீங்கள் கொடுத்த அடியால் அதிர்ச்சியில் உறைந்துபோய்விட்டார் அந்த நடிகர்.

''எனக்கு அந்த ஆசை இல்லை, இந்த ஆசை இல்லை. இதுவரை என் வீட்டில் ஐ.டி.ரெய்டு நடந்ததில்லை'' என்று உங்களுக்குப் பதிலளிக்கும் முகமாக ஏதேதோ உளறிக்கொட்டியிருக்கிறார்.

சத்தியராஜைப் பொருத்தவரை, மேடைகளில்தான் ''ஆய்...ஊய்...'' என்றெல்லாம் அலட்டிக்கொள்வாரே தவிர, உண்மையில் அவர் ஒரு தொடைநடுங்கி நடிகர். உங்களுக்கு அவர் பதிலளித்தபோது, மைக் பிடித்திருந்த அவரின் கை வெடவெடவென்று நடுங்கியதே, அதைக் கவனித்திருந்தால் உங்களுக்குப் புரிந்திருக்கும்.

உள்ளுக்குள் பயந்து நடுங்கினாலும், தமிழ் மக்கள் தன்னை ஒரு கோழை என்று எண்ணிவிடாமலிருக்கவே உங்களுக்குப் பதில் சொல்லித்  'தில்' காட்டியிருக்கிறார் நடிகர்.

'காவி'யத் தலைவி தமிழிசை அவர்களே,

சத்தியராஜை பகிரங்கமாகக் கேள்வி கேட்டதன் மூலம் ஒரு பெரும் தவற்றை இழைத்துவிட்டீர்கள் நீங்கள். 

நீங்கள் அவரிடம் கேள்வி கேட்டதற்குப் பதிலாக, அதே கேள்வியை, வருமான வரித்துறையினர் மூலம், குறுந்தகவல் அனுப்பி ரகசியமாகக் கேட்டிருந்தால்.....

இந்நேரம் ஓடிவந்து உங்களிடம் சரணடைந்திருப்பார் சத்தியராஜ்; பாசகவில் உறுப்பினராகவும் ஆகியிருப்பார்.

இதே குறுஞ்செய்தியை பாரதிராஜா, கமல்காசன், ரஜினிகாந்த் போன்ற திரையுலகப் பிரமுகர்களுக்கும் அனுப்பியிருந்தால், ஒட்டுமொத்த திரையுலகமே உங்கள் பின்னால் அணிவகுத்திருக்கும்.

இதே அஸ்திரத்தைப் பிரயோகித்து, ஸ்டாலின், வைக்கோ, திருமாவளவன், இராமதாஸ், அன்புமணி, கொங்குதேசக் கட்சி ஈஸ்வரன், தினகரன், வேல்முருகன், எடப்பாடி, பன்னீர் மற்றும் இன்னபிற அரசியல் கட்சித் தலைவர்களையும் உங்கள் காவிக் கட்சியில் இணைய வைத்திருக்கலாம். 

இத்தகையதொரு புத்திசாலித்தனமான காரியத்தை இனியேனும் நீங்கள் செய்து முடியுங்கள். முடித்தால்.....

தேர்தலே நடத்தாமல், நீங்கள் தமிழ்நாட்டின் 'அன்னப்போஸ்ட்' முதலமைச்சர் ஆகிவிடலாம். மத்தியில் மோடி ஆட்சி நீடிக்கும்வரை உங்களின் ஆட்சியும் நீடிக்கும்.

வாழ்த்துகள் தமிழிசை!