'ஒரு சொல்' பதிவு!

இன்று காலை 08.00 மணி அளவில், தொலைக்காட்சியில் வெளியாகிக்கொண்டிருந்த ஒரு செய்தி என் கவனத்தை வெகுவாக ஈர்த்தது. அது.....

'ஒரு சொல் பதிவு'

தத்தம் சமூக வலைத்தளங்களில் தத்தமக்குப் பிடித்ததும், வாசிப்போரை ஈர்ப்பதுமான ஒரே ஒரு 'சொல்'ஐ மட்டும் பதிவு செய்தல் என்னும் புதிய நடைமுறை இது.

உலக அளவில், மிகக் குறுகிய கால அளவில் இந்த 'ஒரு சொல் பதிவு' பதிவர்களிடையே வெகுவாகப் பிரபலம் ஆகிவிட்டதாம்.

அமெரிக்க ஜனாதிபதி 'ஜோ பிடன்' இன்று ட்விட்டரில் 'ஜனநாயகம்' என்பதை ஆங்கிலத்தில் ‘democracy’ என்று பதிவிட்டார். 

அடுத்த சில நொடிகளில், நாசாவின் ட்விட்டர் பக்கத்தில், ‘universe’ என்ற சொல் பதிவிடப்பட 'ட்விட்டர்'இல் இந்த ஒரு வார்த்தைப் பதிவு [Tweet] பரபரப்பை உண்டுபண்ணியது. 

உலகின் பெரிய தலைவர்களும், பல துறைப் பிரபலங்களும் இந்த ஒரு சொல்லை 'ட்வீட்' ஆகப் போட்டுவருகிறார்கள்.

'அதிமுக'வின் அதிகாரப்பூர்வ ட்விட்டர் பக்கத்தில் ‘எடப்பாடியார்’ என்று எடப்பாடியார் பதிவிட, தாங்களும் தங்கள் பங்குக்குத் திமுக, நாம் தமிழர் என பல்வேறு கட்சித் தலைவர்களும் பல்வேறு சொற்களைப் பதிவிட்டு வருகிறார்கள். 

தமிழக முதல்வர் மு.க ஸ்டாலின் வெளியிட்ட ட்விட்டர் பதிவில், 'திராவிடம்' என்றும், நாம் தமிழர் கட்சி வெளியிட்டுள்ள பதிவில் 'தமிழ்' என்றும், தமிழக பாஜக தலைவர் அண்ணாமலை 'தமிழன்' என்றும், சீமான் வெளியிட்டுள்ள பதிவில் 'தமிழ்த்தேசியம்' என்றும் பதிவிட, தத்தம் பக்கங்களில் பாரட்டுவதும் பழிப்பதுமான விமர்சனங்களைக் கொட்டித் தீர்த்துவிட்டார்களாம் இணையவாசிகள்.

பிரபலங்கள் உட்பட ஏராளமானோர் இந்த 'ஒரு சொல் பதிவு'க்குத் தத்தம் பங்களிப்பைச் செலுத்திவிட்ட நிலையில், பதிவர்கள் வரிசையில் 'முதல் நிலை'[நம்பர்1!--- ஹி... ஹி... ஹி!!!] பெற்றுள்ள 'பசி'பரமசிவம் பதிவிடவிருக்கும் அந்த 'ஒரு சொல்' என்ன என்பதை அறிந்திடப் பேராவலுடன் பதிவருலகம் காத்திருக்கும் என்பதை அடியேன் உய்த்துணர்ந்துள்ள காரணத்தால், அந்த ஒரு சொல்லை இப்போது பதிவு செய்கிறேன். அது.....

'நன்றி'![நீங்கள் எதிர்பார்த்த 'ஹி... ஹி... ஹி!!!' அல்ல].

மானுட மாண்பை வளர்க்கும் மகத்தான சொல் இது!

பகைவனின் மனதையும் பக்குவப்படுத்தி நண்பனாக்கும் மாயச் சொல் இது!!

உலகின் ஒட்டுமொத்த மனிதர்களையும் ஒருங்கிணைக்கும் வலிமை வாய்ந்த ஒற்றைச் சொல் இது!!!

தங்களின் வருகைக்கு நன்றி.

நன்றி... நன்றி... நன்றி!

==========================================================================

குறிப்பு:

'ஒரு சொல் பதிவு' பற்றி விரிவாக எழுதியதால், இப்பதிவு, 'நன்றி'என்னும் ஒரு சொல்லில் அமையாமல்போனது அறியத்தக்கது.

'புற்றுநோய்க் குழந்தைகள்'... பதறுகிறது மனம்! பற்றி எரிகிறது ஒட்டுமொத்த உடம்பும்!!

#வெளிநாடுகளில் புற்றுநோயால் பாதிக்கப்படும் குழந்தைகளில் 90 விழுக்காடு[%] பேர் உயிர் பிழைக்கிறார்கள். நம் நாட்டிலோ 40 விழுக்காடு குழந்தைகள்தான் உயிர் பிழைக்க முடிகிறது. ஒரு குழந்தைக்கு 5 லட்சம் செலவு செய்து இரண்டரை ஆண்டுகள் சிகிச்சை பெற்றால் பெரும்பாலும் அது உயிர் பிழைக்க வாய்ப்பு உள்ளது. ஆனால், நம் நாட்டில் அது சாத்தியப்படுவதில்லை#['ராணி' வார இதழ்[04.09.2022இல் வெளியான ஒரு கட்டுரையில்].

காரணம்.....

வறுமை ஐயா, வறுமை... வறுமை.

இந்த வறுமை காரணமாகப் புற்றுநோயால் மட்டும் இறந்துபோகும் குழந்தைகள் 60 விழுக்காட்டுக்கும் அதிகம். இப்படி, ஆயிரக் கணக்கில் ஏழைக் குழந்தைகளைப் பலிகொள்ளும் நோய்கள் மிகப் பல.

இது குறித்த தகவல்களை, திருமணம், பிறந்த நாள் போன்ற நிகழ்வுகளில் ஆயிரக்கணக்கில் செலவு செய்யும் ஆடம்பரப் பிரியர்களும், விசேட பூஜை, ஆராதனை, அபிசேகம், தேர்த் திருவிழா, குடமுழுக்கு என்னும் பெயர்களில் பணத்தை வீணடிக்கும் பக்தர்களும் அறிவார்கள்.

அறிந்திருந்தும், அர்த்தமற்ற செயல்களைப் புறக்கணித்து, ஓரளவுக்கேனும் இந்தக் குழந்தைகளுக்கு உதவ முன்வராத, மனிதாபிமானமே இல்லாத இந்தக் கல்நெஞ்சக்காரர்கள் ஒருபுறம்!

விநாயக சதுர்த்தி என்னும் பெயரில், வண்ண வண்ணக் களி மண் சிலைகளை வடித்து வீணாகக் கடலிலும் ஆற்றிலும் குளங்களிலும் குட்டைகளிலும் கரைத்துப் பல்லாயிரக் கணக்கில் பணத்தை வீணடிக்கும் பேதைகள் இன்னொரு புறம்.

இவர்களின் அடாத செயல்களால்.....

பதறுகிறது மனம்! பற்றி எரிகிறது ஒட்டுமொத்த உடம்பும்

===========================================================================