''மட்டும்''.....உளவியல் கதை!

தொலைக்காட்சி பார்த்துக்கொண்டிருந்த மனைவி தனலட்சுமியிடம், “உன் மருமகளுக்கு ஃபோன் பண்ணிடு” என்றார் முத்துசாமி.

''எதுக்கு.”

“இங்கே வந்து ரொம்ப நாளாச்சி. பேரப் பிள்ளைகளைப் பார்க்கணும்னு தோணலையா? வந்து ஒரு மாசம் இருந்துட்டுப் போங்கன்னு சொல்லிட்டே இருக்கான் நம்ம புள்ள. நாளை  சென்னை கிளம்புவோம். விசயத்தை அவளுக்குச் சொல்லிடு” என்றார் முத்துசாமி.

“ஊருக்கு வர்றோம்னு சொன்னா பதிலே சொல்லாம ஃபோனை வெச்சுடுறா. அவனுக்குச் சொன்னா போதாதா?” என்றாள் தனலட்சுமி.

“போதாது. அவ ரோசக்காரியாச்சே. அவன் வேலைக்குப் போனதும் இவ வீட்டைப் பூட்டிட்டுப் போயிடுவா. நாம வாசப்படியில் காத்துக் கிடக்கணும். இப்பவே ஃபோன் பண்ணிடு.”

ஃபோனை உயிர்ப்பித்து, “நாளை கழிச்சி நானும் மாமாவும் அங்கே வர்றோம். அது வந்தும்மா...இங்கே ரெண்டு மூனு கல்யாணத்துக்கு அழைப்பு வந்திருக்கு. ரெண்டு நாள் மட்டும் தங்கிட்டு ஊர் திரும்பிடுவோம்.” -'மட்டும்' என்பதை அழுத்தம் திருத்தமாகச் சொன்னாள் தனலட்சுமி.

“சரிங்க அத்தை” என்றாள் மருமகள்  வினிதா.

பேசி முடித்து செல்ஃபோனை அணைத்தபோது  முத்துசாமி சிரித்தார்; “கல்யாண அழைப்பு இருக்குன்னு எதுக்குப் பொய் சொன்னே?” என்று கேட்டார்.

“நாம ரெண்டு நாள்தான் இருப்போம்னு முன்கூட்டியே சொல்லிட்டா, கொஞ்சம் மரியாதை கொடுத்து உபசரிப்பா. சொல்லலேன்னா, நாள் கணக்கில் கேம்ப் போட்டுடுவோமோன்னு முகம் கொடுத்துப் பேச மாட்டா. உபசரிப்பும் படு மட்டமா இருக்கும்” என்றாள் தனலட்சுமி.

“நீ ரொம்பத்தான் புத்திசாலி.”

========================================================================

இப்பதிவு, indiblogger முகப்புப் பக்கத்தில் இடம்பெற்றுள்ளது.

எழுத்தாளர் எஸ். ராமகிருஷ்ணனின் அற நெஞ்சம்!

'சமரசம்'[1-15 பிப்ரவரி, 2019] என்னும் இதழுக்கு சாகித்திய அகாடமிப் பரிசு பெற்ற எழுத்தாளர் எஸ். ராமகிருஷ்ணன் அவர்கள் அளித்த பேட்டியிலிருந்து.....

''.....அடிப்படை அறங்கள் கைவிடப்படும்போது அது நம் மனதில் ஆழமான வருத்தத்தை உருவாக்குகிறது. ஒரு நிகழ்ச்சி நினைவுக்கு வருகிறது.

இது வடநாட்டில் நடந்தது.  சாலையோரத்தில் நடந்துகொண்டிருந்த ஒரு பெண்ணை நான்கு பேர் தூக்கிச்சென்று  ஒரு வயல்வெளியில் பாலியல் பலாத்காரம் செய்ய முயலுகிறார்கள்.

அப்போது, கிராமத்து விவசாயிகள் சிலர் கைகளில் தடிகளுடன் ஓடிவர, பெண்ணைப் பலாத்காரம் செய்ய முயன்றவர்கள் ஓடிவிடுகிறார்கள்.

அப்புறம் நடந்ததுதான் நம்மைப் பெரும் அதிர்ச்சிக்கு உள்ளாக்குகிறது.

பெண்ணைக் காப்பாற்றியவர்கள் என்று நினைக்கப்பட்ட விவசாயிகளே அந்தப் பெண்ணைக் கூட்டு வன்புணர்வு செய்கிறார்கள். 50, 60 வயதுகளைக் கடந்த, அன்றாடம் நாம் காணுகிற சாதாரணத் தோற்றத்தில் இருப்பவர்கள் அவர்கள்.

இத்தனை ஆண்டுகள் இந்திய விவசாயிகள் மீது நான் வைத்திருந்த நம்பிக்கையைத் தகர்க்கும் வண்ணம் அவர்கள் நடந்துகொண்டார்களே, ஏன்?

எது அவர்களை இப்படிச் செய்யத் தூண்டியது?

தம் மகள்களின் வயதில், அல்லது பேத்திகளின் வயதிலுள்ள ஒரு பெண்ணை எப்படி அவர்களால் வன்புணர்வு செய்ய முடிந்தது?

பாலியல் வறட்சிதான் இதற்கெல்லாம் காரணமா? இப்படிச் செய்தால் என்ன நடந்துவிடப்போகிறது என்று நினைப்பது காரணமா?

காலங்காலமாய் நாம் போற்றிவந்த அறவுணர்வு எங்கே போனது?

இந்தியச் சமூகத்தின் அடிப்படை அறவுணர்ச்சிகள் நொறுங்குவதை இப்போது நாம் காண்கிறோம். இனி எந்த நம்பிக்கையில் இம்மாதிரி அவலத்துக்குள்ளாகும் பெண்களை நாம் காப்பாற்றப் போகிறோம்?''

'சமரசம்' இதழுக்கும், எழுத்தாளர் எஸ்.ராமகிருஷ்ணன் அவர்களுக்கும் நம் நன்றி.