ஆண் கழுகு உறவு கொள்ளும் இச்சையுடன் பெண் கழுகை நெருங்கினால், அந்த ஆண் கழுகுடன் தரையில் கிடக்கும் சிறு தடி போன்ற குச்சியை எடுத்துக்கொண்டு, உயரப் பறந்து சென்று அந்தக் குச்சியினைக் கீழே போட்டுவிட்டுக் காத்து கொண்டிருக்கும் பெண் கழுகு.
நிலத்தை நோக்கி வீழ்ந்துகொண்டிருக்கும் குச்சியை ஆண் கழுகு விரட்டிச் சென்று, அது நிலத்தில் விழுவதற்கு முன்பே பிடித்து, உயரப் பறக்கும் பெண் கழுகிடம் சேர்க்கும். பெண் கழுகு மீண்டும் குச்சியைக் கீழே போட்டுவிடும். ஆண் கழுகு பிடிப்பதற்காகக் கீழே செல்லும். இவ்வாறு, பெண் கழுகு ஒரு குச்சியைக் கீழே போடுவதும், அதை ஆண் எடுத்து வருவதுமாகப் பல மணி நேரத் தேர்வு நடைபெறும். இதன் மூலம் பெண் கழுகு, ஆண் கழுகுக்குள்ள பொறுமைக் குணத்தையும், உடல் வலிமையையும் உறுதிப்படுத்திக்கொள்கிறது.
இவ்வாறான ஒரு சோதனையில் ஆண் கழுகு வென்ற பின்னரே அதனுடன் உடலுறவு கொள்ளப் பெண் கழுகு சம்மதிக்குமாம்![மனித இனத்துப் பெண்கள் இது போன்ற சோதனைகளை நடத்தினால், கணக்கிலடங்காத ஆண்கள் கட்டைப் பிரமச்சாரிகளாகவே காலந்தள்ள வேண்டியிருக்கும்!].
கழுகு மிக உயரமான முட்களை உடைய மரக்கிளைகள், மலைச்சரிவுகளில் உள்ள பாறைப் பிளவுகள் என்று மற்ற உயிரினங்கள் எளிதில் நெருங்க முடியாத இடத்தில் கூடு கட்டும். இடம் தேர்வானதும் ஆண் கழுகு முள், குச்சி, புல், வேர்கள், சிறு கற்கள், வைக்கோல் போன்றவற்றை வைத்துக் கூடுகட்டும். பெண் கழுகு முட்டையிட்டு அடைகாத்துக் குஞ்சு பொறிக்கும். ஒருமுறை இரண்டு முட்டைகளை இடும். முதலில் பொரித்து வெளிவரும் பெரிய குஞ்சு தன் இளவலைக் கொத்திக் கொன்றுவிடும்.
இதைச் செய்யும் குஞ்சு பொதுவாகப் பெண்ணாகவே இருக்கும். ஏனெனில், பெண் குஞ்சு, ஆண் குஞ்சைவிடப் பெரியது. இந்தப் படுகொலையைத் தடுக்க அவற்றின் பெற்றோர் கழுகுகள் எந்த முயற்சியும் எடுப்பதில்லை.
எதிரிகளைத் தாக்கவும், தன்னுடைய முட்டைகளைப் பாதுகாக்கவும் ஆபத்து நேரங்களில் உடலில் இருக்கிற கந்தக அமிலத்தைக் கழுகுகள் உமிழ்கின்றன. கந்தக அமிலம் எந்த ஓர் உயிரினத்தின் மீது பட்டாலும் அது கருகிவிடும்.
கழுகுக் குஞ்சுகள் ஒரு குறிப்பிட்ட காலம்வரை கூட்டில் வைக்கப்பட்டு, தாய்ப் பறவை உணவு ஊட்டும். பிறகு மென்மையான கூட்டினை நீக்கிவிட்டு முட்களையும் குச்சுகளையும் குத்துவது போல வைக்கும். இதனால் கூட்டின் ஓரத்திற்கு வரும் குஞ்சுகளைக் கீழே தள்ளிவிடும்.
குஞ்சுகள் நிலைதடுமாறி விழும்போது, இறக்கைகளை விரித்துப் பறக்கமுயலும். ஆனால் பறக்க முடியாது. குஞ்சுகள் கீழே விழுந்து அடிபடாமல் தடுக்க, ஆண் கழுகு பறந்து சென்று, தன் முதுகில் தாங்கி, அதை மீண்டும் கூட்டிற்குக் கொண்டுவந்து சேர்க்கும். இது போல் தொடர்ந்து பயிற்சியளிக்கப்பட்ட பின்னரே குஞ்சுகள் பறக்க ஆரம்பிக்கும்; சுயமாக இரை தேடிக்கொள்ளும்.
கழுகுகள் புயலை விரும்புகின்றன. புயல் காற்றின் மூலம் அவை மேகங்களுக்கு மேலாக எளிதில் பறக்க முடிகிறது. கழுகுகள் மணிக்கு 32 கிலோமீட்டர் வேகம் பறக்கும் திறன் உடையவை.
கழுகுகளின் இறக்கைகள் ஓர் ஆகாய விமானத்தின் இறக்கைகளைவிட வலிமை வாய்ந்தவை என்கிறார்கள் பறவையின ஆராய்ச்சியாளர்கள்.
குதிரைகள் நின்றுகொண்டு தூங்குவது போல, கழுகுகள் மரக்கிளையில் உட்கார்நதுகொண்டே தூங்கும் திறன் கொண்டவை.
கழுகுகள் மிகவும் புத்திசாலித்தனம் கொண்டவையும்கூட. ஆமை, நத்தை போன்றவற்றை உண்ணும்போது அவற்றின் ஓடுகள் உடையும் வண்ணம், அவைகளை மலை உச்சியில் இருந்து பாறை மேல் வீசி எறிந்து, அவை உடைந்த பின்னர் உண்ணும்.
உலகின் மிகப்பெரிய கழுகான பிலிப்பைன்ஸ் நாட்டுக் கழுகுகளின் இறக்கை எட்டு அடி நீளம் உள்ளவை. அவை ஓர் ஆட்டையோ, ஒரு மானையோ தூக்கி செல்லும் திறன் கொண்டவையாம்!
====================================================================================
நன்றி: