'காக்கை-நரி'க் கதை... புதுசோ புதுசு!!!

'காக்கை - நரி'க் கதை மிகப் பழையது. கால மாறுதலுக்கேற்ப 'முடிவு' மாற்றியமைக்கப்பட்ட கதைகளும் உள்ளன. இது புதியது; இன்றையச் சூழ்நிலையைக் கருத்தில் கொண்டு வடிவமைக்கப்பட்டது. உங்களுக்கு மிகவும் பிடிக்கும்!

                                                    *  *   *

பாட்டி வடை சுட்டுக்கொண்டிருந்தாள்.

எச்சில் துப்புவதற்குப் பக்கவாட்டில் அவள் திரும்பிபோது,  தட்டிலிருந்த வடைகளில் ஒன்றை 'லபக்'கிய காக்கை, அருகிலிருந்த காட்டுக்குப் பறந்து சென்று ஒரு மரக்கிளையில் அமர்ந்தது.

அங்கே வந்த ஒரு நரி வடையைக் கவரும் எண்ணத்துடன், "காக்கா... காக்கா, உன் குரல் ரொம்ப இனிமையானதுன்னு கேள்விப்பட்டிருக்கேன். எனக்காக ஒரு பாட்டுப் பாடு" என்றது.

நரியின் புகழ்ச்சிக்கு மயங்கிய காக்கையும் வாயில் வடை இருப்பதை மறந்து பாட ஆரம்பித்தது. அதன் வாயிலிருந்த வடை நழுவித் தரையில் விழுந்தது.

நரி புருவம் சுருக்கியது.

"எத்தனை தடவை கேட்டாலும் சலிக்காத, நெஞ்சில் தேன் சிந்தும் தமிழ்ப் பாடல்கள் எவ்வளவோ இருக்க, 'கர்... கர்... கர்'னு இந்தியில் பாடுறே நீ. சகிக்கல" என்றது நரி, கடும் கோபத்துடன்.

அதைக் காதில் போட்டுக்கொள்ளாத காக்கை தொடர்ந்து இந்திப் பாட்டைப் பாடிக்கொண்டே இருந்தது.

கடுப்பாகிப் போன நரி, "உன் இந்திப் பாட்டு வேண்டாம். உன் ஊத்தை வாயால் தொட்டு எடுத்த வடையும் வேண்டாம்"னு சத்தம் போட்டுச் சொல்லிவிட்டு அங்கிருந்து ஓட்டமாய் ஓடி மறைந்தது!

நாட்டை ஆளுவோரின் அலட்சியமும் நீதியரசர்களின் அறி[ற]வுரையும்!!

'ஆந்திர மாநிலம், நெல்லூர் மாவட்டம் கிருஷ்ணாப்பட்டினம் அடுத்த மூலக்கூறு கிராமத்தில் வசிக்கும் ஆனந்தய்யா, கொரோனா நோயாளிகளுக்குப் பயன்தரத்தக்க நாட்டு மருந்து கண்டுபிடித்தது முதல், அதை மத்திய ஆயுஷ் அமைச்சகத்திற்கு அனுப்பி ஆய்வு மேற்கொண்டதில், அந்த மருந்தில்[லேகியம்]  தீங்கு விளைவிக்கும் பொருள் ஏதும் இல்லை என்று அறிவிக்கப்ப்பட்டது வரையிலான செய்திகள் நாம் அறிந்தவையே. 

'ஐசிஎம்ஆர்' குழு இந்த லேகியத்தை ஆய்வு செய்ய உள்ளது' என்பதும் நாம் அறிந்த செய்திகளுள் அடங்கும். நாம் அறியாதது.....

'ஆனந்தய்யாவின் கண்டுபிடிப்பான கொரோனா மருந்து குறித்த முடிவை 'ஐசிஎம்ஆர்' அறிவிக்காமல் தாமதப்படுத்துவது ஏன்?' என்பதே.

இது பற்றிய கேள்வியை நடுவணரசிடம் நம் போன்றவர் எவரும் கேட்பதில்லை. காரணம், அதனால் பயனேதும் விளையப்போவதில்லை என்பதுதான்.

நாம் கேட்கத் தயங்குகிற கேள்வியை சென்னை உயர் நீதிமன்றம் கேட்டிருக்கிறது[25.06.2021 நண்பகல் 12.35 மணி, 'news7 tamil' செய்தி]. அது.....

"இலவசமாகக் கொரோனாவுக்கு மருந்து வழங்கும் 'ஆனந்தய்யா', வாழும் ஒரு மனிதக் கடவுள். அவரை நேரில் அழைத்துப் பேசி உரிய அங்கீகாரத்தை வழங்கியிருந்தால் உலக அளவில் அவர் புகழ் பெற்றிருப்பார். ஏன் செய்யவில்லை?" என்பதே.

நீதியரசர்கள் எழுப்பிய கேள்வியில், சர்வதேச அளவில் கொரோனா மருந்து விற்பனை செய்யும் மாஃபியாக்கள் இதற்குத் தடையாக இருக்கிறார்களோ என்னும் சந்தேகமும் உள்ளடங்கியிருக்கிறது.

நீதியரசர்கள் கேள்வி எழுப்பிய பின்னராவது நடுவணரசு உரிய நடவடிக்கை எடுக்குமா?

மாநில உரிமைகளைப் பறிப்பதிலும், நாட்டில் 30% எண்ணிக்கை[?]யிலான மக்களுக்கு மட்டுமே தாய்மொழியாக உள்ள இந்தியை வளர்ப்பதிலும், சில ஆயிரம்பேர் மட்டுமே பேசுகிற சமஸ்கிருதத்தைப் பரப்புவதிலும், பகுத்தறிவுக்கு ஒவ்வாத மூடநம்பிக்கைகளை மக்கள் மீது திணிப்பதிலும் காட்டுகிற வேகத்தை ஆனந்தய்யாவின் மருந்தை அங்கீகரிப்பதோடு, அதிகபட்சம் அவரைக் கொரோனா ஒழிப்புக்குப் பயன்படுத்திக்கொள்வதிலும் நடுவணரசு வெளிப்படுத்துமா?

வெளிப்படுத்த வேண்டும் என்பது நம் போன்ற உண்மைக் குடிமக்களின் மிகு விருப்பம் ஆகும்.