63 கல்லறைகளும் அழிவில்லாத ஜோதிடமும்!!!

மராட்டிய வீரர் சத்ரபதி சிவாஜியின் ஆட்சியின்போது[17 ஆம் நூற்றாண்டின் இடைப்பட்ட காலத்தில்] நிகழ்ந்தது இந்தக் கொடூர வரலாற்றுச் சோகம்.

சிவாஜி, இரண்டாம் 'ஆதில் ஷா'வுக்கு எதிராகப் போர் தொடுத்தபோது, அவரை எதிர்க்கும் பொறுப்பு ஆதில் ஷாவின் இராணுவத் தலைவர் அப்சல் கானிடம் வந்தது. 

புதிய புதிய போர் உத்திகளை வகுத்து, எதிரிகளைத் திணறடிப்பதில் வல்லவர் அப்சல் கான்.

போருக்கு முன்பு ஜோதிடர்களுடன் கலந்தாலோசித்தார் அப்சல் கான். 

இம்முறை, அவர் போர் புரியும் சூழல் அவருக்குச் சாதகமற்றது என்றும், அடுத்தடுத்த போரில் அவர் இறக்க நேரிடும் என்றும் ஜோதிடர்கள் கணித்துச் சொன்னார்கள்.

துயரத்தில் மூழ்கிய அப்சல் கான், தனது உயிர் பிரிவதைவிட ஹரேமில் உள்ள தனது 63 மனைவிகளைப் பற்றி அதிகம் கவலைப்பட்டார். 

தனக்கு மட்டுமே உரியவர்களான 63 மனைவியரும் எதிரிகளிடம் அகப்பட்டு, அவர்களால் கையாளப்படுவதை விரும்பாத அவர்,  அனைவரையும் கொன்றுவிட முடிவு செய்தார். 

அப்சல் கானின் மனைவிகள் தனிமைப்படுத்தப்பட்ட இடத்திற்கு அழைத்துச் செல்லப்பட்டு, கிணற்றில் தள்ளப்பட்டதாக வரலாறு சொல்கிறது. தப்பிக்க முயன்றவர்கள் மீண்டும் கைப்பற்றப்பட்டு கொல்லப்பட்டார்களாம். 

அப்சல் கான் போருக்குச் செல்வதற்கு முன்பே, கொல்லப்பட்ட 63 பேரும் ஒரே குழியில் புதைக்கப்பட்டனர். கருங்கற்களால் கல்லறை எழுப்பப்பட்டது. இது, திறந்தவெளிக் கல்லறை.

தான் இறந்த பிறகு இதன் அருகிலேயே தனக்கான கல்லறையையும் எழுப்ப விரும்பினார் அப்சல் கான். ஆனால், நடைபெற்ற போரில் சிவாஜியின் லெப்டினன்ட் சாம்பாஜி காவ்ஜியால் கொல்லப்பட்டார்.

https://tamil.boldsky.com/insync/pulse/why-did-afzal-khan-kill-all-of-his-wives/articlecontent-pf241116-032316.html?ref_medium=Desktop&ref_source=BS-TA&ref_campaign=Similar-Topic-Slider     -August 30, 2021, 18:30 [IST]

அடுத்து இடம்பெறும் நிகழ்வுக்கும் ஜோதிடர் ஒருவரின் கைங்கரியமே காரணமாக அமைந்துள்ளது. பதற்றமின்றி வாசியுங்கள்.

கிளாடியேட்டர்[gladiator], என்பவர், ஏனைய கிளாடியேட்டர், காட்டு விலங்குகள், குற்றஞ்சாட்டப் பெற்ற குற்றவாளிகளுடன் கொடூரமாக மோதிச் சண்டையிட்டு 'ரோம்' பேரரசுப் பார்வையாளர்களை மகிழ்ச்சிப்படுத்துபவர் ஆவார்; உயிரிழப்பதும் உண்டு[விக்கிப்பீடியா]. 

கிளாடியேட்டர்கள், உடலுறவுக்காக எல்லாத் தரப்புப் பெண்களாலும் பயன்படுத்தப்பட்டார்கள். மோசமான பாலியல் நடவடிக்கைகளிலும் இவர்கள் பங்கேற்றனர். 

பேரரசர் மார்கஸ் ஆரேலியஸின் மனைவி ஃபாஸ்டினா, ஒருமுறை ஒரு கிளாடியேட்டர் மீது ஆசை கொண்டார். அவர் தனது ஆசையைத் தன் கணவரிடம் கூறினார். 

அவர் ஜோதிடர்களிடம் இது குறித்து ஆலோசனை நடத்தினார். அவர்களின் கருத்துப்படி, கிளாடியேட்டருடன் ஃபாஸ்டினா உடலுறவுகொள்ள உத்தரவிடப்பட்டது[இப்படியான பொன்மனப் புருசன் வேறு யாருக்கு வாய்க்கும்!!!].

உடலுறவுக்குப் பிறகு அந்தக் கிளாடியேட்டர் கொல்லப்பட்டு[இதுவும் கடவுளின் திருவிளையாடல்தான்!], வெளியேறும் குருதியில் அம்மையார் குளித்து முடித்து, மீண்டும் தன் கணவனுடன் அவர்  உடலுறவு கொள்ள வேண்டும் என்பதும் ஜோதிடர்களின் கணிப்பாம்!

                                  *  *  *

அன்று முதல் இன்றுவரை ஜோதிடர்கள் அடிக்கும் கொட்டம் ஓய்ந்தபாடில்லை. மூடர்கள் எண்ணிக்கை குறையாதவரை இவர்களின் காட்டில் மழைதான்!

https://tamil.boldsky.com/insync/pulse/weird-intimacy-habits-from-the-ancient-world/articlecontent-pf240299-032196.html

கொலைகார ஜோதிடர்கள்!

கடவுளை நம்புகிறவர்களைவிடவும் ஜோதிடர்களை நம்புகிற மூடர்களின் எண்ணிக்கை மிக அதிகம்[பதிவின் இறுதியில் உள்ள குட்டிக் கதையைத் தவறாமல் படித்திடுக!]. ஏழை, பணக்காரன் என்ற வேறுபாடு இல்லாமல், இவர்களை நம்பிக் கெட்டவர்கள் ஏராளம். இவர்களில் எவரும் திருந்துவதாகத் தெரியவில்லை; திருத்தவும் ஆளில்லை.

‘சேலம் இரும்பாலை மோகன்நகர் பகுதியில் வசித்து வருபவர் பாண்டியன் (வயது 55). இவர் தனது மகள்களுக்குத் திருமண ஏற்பாடு செய்தார். ஆனால், ஜாதகத்தில் தோஷம் உள்ளதாகவும், குலதெய்வம் கோவிலுக்குச் சென்று வழிபட்டு வந்தால் நல்லது நடக்கும் என்றும் ஜோதிடர் கூறியுள்ளார். அதன்படி, பாண்டியன் தஞ்சாவூர் மாவட்டம் ஒரத்தநாடு பகுதியில் உள்ள தங்களது குலதெய்வம் கோவிலுக்குச் சாமி கும்பிடக் குடும்பத்துடன் சென்றார்.

அங்கு அவர்கள் சாமி கும்பிட்டுவிட்டு ஒரு காரில் நேற்று முன்தினம் தஞ்சாவூரில் இருந்து சேலத்துக்குத் திரும்பினார்கள்.

இவர்களது கார் நள்ளிரவு 12 மணி அளவில் நாமக்கல்லுக்கு அடுத்து உள்ள என்.புதுப்பட்டி அருகே வந்து கொண்டிருந்தது. அப்போது பாண்டியனின் கட்டுப்பாட்டை இழந்து ஓடிய கார் சாலையோரத்தில் இருந்த ஒரு கிணற்றுக்குள் பாய்ந்தது. 80 அடி ஆழம் கொண்ட அந்தக்  கிணற்றில் தண்ணீர் இல்லை. இதனால் கிணற்றுக்குள் விழுந்த கார் நொறுங்கியது.

இந்த விபத்தில் பூங்குழலி, அவரது மகள் மங்கையர்கரசி ஆகியோர் உடல் நசுங்கிச் சம்பவ இடத்திலேயே பரிதாபமாக உயிரிழந்தனர். 2 பேர் பலத்த காயம் அடைந்தனர்.’

இது, 27.07.2015 இல் நாளிதழ்களில் வெளியான செய்தி.

இம்மாதிரியான சோகச் சம்பவங்கள் அவ்வப்போது நிகழ்ந்துகொண்டுதான் இருக்கின்றன. காரணம், மக்களின் அசைக்க முடியாத மூடநம்பிக்கை.

இதை வளர்த்துவிட்டவர்கள்/வளர்த்துக்கொண்டிருப்பவர்கள் ஜோதிடர்கள்.

நேரிடையாக ஒருவரைக் கிணற்றில் தள்ளிக் கொலை செய்வது மட்டும்தான் குற்றச் செயலா? இம்மாதிரி விபத்துகளுக்குக் காரணமாக இருப்பதும் குற்றம்தானே?

ஜாதகத்தில் தோஷம் இருப்பதாகச் சொல்லி, பாண்டியனைக் குடும்பத்துடன் கோவிலுக்குச்செல்லத் தூண்டியவர் ஒரு ஜோதிடர். அவர் பேச்சைக் கேட்டுக் கோயிலுக்குச் சென்றதன் பலன் இருவர் சாவு; இருவர் காயம்.

எந்தவொரு தொழிலைச் செய்வதாயினும் அதற்கு அரசின் அனுமதி பெறவேண்டும். ஜோதிடர்களைப் பொருத்தவரை எந்தவொரு கட்டுப்பாடும் இங்கு இல்லை. 

ஜோதிடச் சக்ரவர்த்தி, ஜோதிடர் திலகம், ஜோதிட சிரோமணி, ஜோதிட பூஷன், ஜோதிட விபூஷன், ஜோதிட ரத்னா, நவக்கிரக ஜோதிடர், ஜோதிடக்கலை ஏந்தல் என்பன போல் தமக்குத்தாமே பட்டம் சூட்டிக்கொண்டு, அறியாமையுள்ள மக்களிடம் கதையளந்து காசு பண்ணிக்கொண்டிருக்கிறார்கள் இவர்கள்.

இவர்களால், மூடத்தனமான செயல்பாடுகளும் உயிர்ப்பலிகளும் நேர்ந்தவண்ணம் உள்ளன.

உயிர்ப்பலிகளுக்குக் காரணமான ஜோதிடர்களைக் குற்றம் புரிந்தவர்களாகக் கருதி, அவர்கள் மீது உரிய நடவடிக்கைகளை எடுக்க மத்திய மாநில அரசுகள் முன்வர வேண்டும் .

அதற்கு முன்னதாக, ஜோதிடத்தைப் பல்கலைக் கழகங்களில் ஒரு பாடமாக வைக்க வேண்டும் என்பன போன்ற பித்துக்குளித்தனமான அறிக்கைகள் வெளியிடுவதை அவர்கள் நிறுத்த வேண்டும். 

செய்வார்களா?

*****************************************************************************************************************************************************

                                     கடவுளின் கவலை [குட்டிக் கதை]

சொர்க்கத்தை மேற்பார்வையிட்டுத் திரும்பிய இறைவி, இறைவன் வெற்று வானத்தை வெறித்துப் பார்த்துக் கொண்டிருப்பது கண்டு திடுக்கிட்டு, “பித்துப் பிடிச்ச மாதிரி, பிது பிதுன்னு முழிச்சிட்டிருக் கீங்க. என்னாச்சு உங்களுக்கு?” என்று கேட்டுப் பரிவுடன் அவரின் முன் நெற்றி நீவினார்.

“மோனத்தவம் புரிய அமர்ந்தேன். மனசை ஒருமுகப் படுத்த முடியல” என்றார் இறைவன், வருத்தம் தொனிக்கும் குரலில்.

“ஏனாம்?”

“பகுத்தறிவாளன்கிற பேர்ல, கண்ட கண்ட கசமாலம் எல்லாம், கடவுள் எப்போ தோன்றினார்? அல்லது, யாரால் தோற்றுவிக்கப்பட்டார்?  'அவர் தோன்றியவரல்ல; தோற்றுவிக்கப்பட்டவரும் அல்ல. அவர் ஆதி அந்தம் இல்லாதவர்.....அதாவது, எப்போதும் இருப்பவர்'னா அது எப்படிச் சாத்தியம் ஆச்சுன்னு கேள்வி மேல் கேள்வி கேட்டுக் கிடுக்கிப்பிடி போட்டுட்டே இருக்கானுக. நம்ம அவதாரங்கள்னு சொல்லிட்டுத் திரியற ஆட்களால அவங்களைச் சமாளிக்க முடியல. உடனடியா பதில் வேணும்னு கோரிக்கை வெச்சுட்டே இருக்காங்க. எனக்கும் பதில் தெரியல. ரொம்பவே பதற்றமா இருக்கு.”

“கவலையை விடுங்க. எமதர்மன்கிட்ட சொல்லி, பூலோகத்திலிருந்து ஒரு ஜோதிடரை வரவழைச்சி, கோடி கோடி கோடியோ கோடிப் பிரபஞ்ச ஆண்டுகளுக்கு முன்னால், இன்ன நட்சத்திரத்தில் கடவுள் தோன்றினார்; யுக யுக யுக யுகாதி யுக ஆண்டுகளுக்கு அப்புறம், இன்ன நட்சத்திரத்தில் மறைவார். மறைந்த அதே கணத்தில் மீண்டும் தோன்றுவார். இப்படி, கிஞ்சித்தும் இடைவெளியின்றித் தோன்றுவதும் மறைவதுமாக இருப்பவரே கடவுள்னு ஊடகங்களுக்கு அறிக்கை தரச் சொல்லிடறேன்” என்றார் இறைவி.

“மனித குலம் நம்புமா?” என்றார் இறைவன்.

“என்ன நீங்க, உலகம் புரியாத கடவுளா இருக்கீங்க. உங்களை நம்புறதை விட ஜோதிடர்களைத்தான் மனுசங்க அதிகம் நம்புறாங்க” என்று அழுத்தம் திருத்தமான குரலில் சொன்னார் இறைவி.

இறைவனின் முகத்தில் மகிழ்ச்சி பரவியது.

*********************************************************************************************

*கனவுகள் கண்டதோடு, தாம்கண்ட கனவுகளை நனவுகளாக்கிப் பற்பல சாதனைகள் நிகழ்த்திய அறிவியல் அறிஞர் அப்துல்கலாம் பற்றிய நினைவுகளை என்றென்றும் போற்றிப் பாதுகாப்போம்*

*********************************************************************************************