வாசல் இங்கே[திருப்பதி ஏழுமலையான் கோயில்]! சொர்க்கம் எங்கே?!

//வைகுண்ட ஏகாதசியை முன்னிட்டு டிசம்பர் மாதம் 23ஆம் தேதி முதல் 2024 ஜனவரி 1ஆம் தேதி வரை திருப்பதி ஏழுமலையான் கோயிலின் சொர்க்கவாசல் திறந்திருக்கும் என்று அறிவிக்கப்பட்டுள்ளது. 

நாள் ஒன்றுக்கு ரூ.300 சிறப்புத் தரிசனம் மூலம் 20,000 பக்தர்களும், இலவசத் தரிசனம் மூலம் 50,000 பக்தர்களும் வைகுண்ட வாசல் பிரவேசம் செய்யலாம் என்றும் தெரிவிக்கப்பட்டுள்ளது. 

சொர்க்க வாசல் திறந்திருக்கும் இந்த 10 நாட்களிலும் சுமார் 7 முதல் 8 லட்சம் பக்தர்கள் தரிசனம் செய்வதற்குத் தேவஸ்தான நிர்வாகம் நடவடிக்கை மேற்கொண்டுள்ளது// https://tamil.asianetnews.com/spiritual/vaikunta-ekadasi-2023-10-days-devotees-are-allowed-to-vaigunta-vaasal-in-thirupathi-rya-s3jies

சொர்க்கவாசலைத் திறந்துவைத்துப் பல்லாயிரக்கணக்கான பக்தர்களைப் பிரவேசம் செய்விக்கும் ஆன்மிகப் பணியை ஆண்டுதோறும்[விசேட நாட்களில்] தவறாமல் செய்கிறது திருப்பதி தேவஸ்தானம்.

இந்த ஆண்டும் அதற்கான அறிவிப்பை மேற்கண்டவாறு அது செய்துள்ளது.

இந்த ஆகச் சிறந்த தொண்டின்[சொர்க்கவாசல் பிரவேசம்] மூலம், சொர்க்கம் என்று ஒன்று இருப்பதை அவர்கள் நம்பச் செய்கிறார்கள் என்பது கருத்தில் கொள்ளத்தக்கது.

அந்தச் சொர்க்கத்திற்குப் புண்ணியம் பல செய்தவர்கள் மட்டுமே செல்ல அனுமதிக்கப்படுவார்கள் என்பது நம்மவர்களின் நீண்ட நெடுங்கால நம்பிக்கை.

சொர்க்கம் செல்லும் அத்தனைப் புண்ணியவான்களும் அதற்கான வாயிலை[சொர்க்க வாசல்]க் கடந்தால்தான் சொர்க்கத்தில் நுழைய முடியும்.

ஆக, புண்ணியவான்கள் மட்டுமே நுழையக்கூடிய வாசலில்[சொர்க்க வாசல்] புண்ணியம் செய்தவர், செய்யாதவர் என்று உலகில் உள்ள மனிதர்கள் அனைவரும் நுழைந்திடும் அரிய வாய்ப்பைத் திருப்பதி நிர்வாகம் வழங்குகிறது என்பது பெரிதும் போற்றத்தக்கது.

இந்த அதிசயத்தை அவ்வப்போது நிகழ்த்தும் தேவஸ்தானிகள் நினைத்தால்.....

சொர்க்கம் சென்று திரும்பும் பேரதிசயத்தையும் அவர்கள் நிகழ்த்துவார்கள் என்று உறுதிபடச் சொல்லலாம்.

சொர்க்க வாசலில் நுழைவதற்குக் கட்டணங்கள் வசூலிக்கப்படுகிறது[நாள் ஒன்றுக்கு ரூ.300 சிறப்பு தரிசனம் மூலம் 20,000 பக்தர்களும், இலவசத் தரிசனம் மூலம் 50,000 பக்தர்களுக்கு வைகுண்ட வாசல் பிரவேசம் செய்யலாம் என்றும் தெரிவிக்கப்பட்டுள்ளது].

சொர்க்கத்தில் நுழைவதற்கும் கூடுதலாகவோ, மிகக் கூடுதலாகவோ, மிக மிகக் கூடுதலாகவோ கட்டணங்கள் வசூலிக்கலாம்.

நிர்ணயிக்கவிருக்கும் தொகை குறித்து அறிவிக்குமாறு ஏழுமலையானிடமே கோரிக்கை வைக்கலாம்.

சீனியர் அர்ச்சகர்களின் கனவிலோ, அவர்களுக்குக் கேட்கும்படியாக அசரீரியாகவோ அத்தொகை பற்றி அவர் அறிவிப்புச் செய்வார் என்பது 100% உறுதி.

ஏழுமலையான் கோடி கோடி கோடி கோடீஸ்வரக் கடவுள் என்பதால் ஏழைகளுக்கான இலவச அனுமதிகளை விரும்பமாட்டார் என்பதும், மகான்களும் ஞானிகளும் அவதாரங்களும் மட்டுமே அங்கு[சொர்க்கம்] நிரந்தரமாகத் தங்குவதற்கு அனுமதிக்கப்படுவார்கள் என்பதும் கவனத்தில் கொள்ளத்தக்கது.

எல்லாம் அவன் செயல்! எல்லாப் பழியும் இறைவனுக்கே!!

கடவுள் இல்லை[“இல்லவே இல்லை” -பெரியார்] என்றாலும், அவரிடம் கோரிக்கை வைப்பதால் எவ்விதப் பயனும் இல்லை என்றாலும், அவரை நம்புகிறவர்களும், தங்களின் குறைகள் தீர அவரிடம் கோரிக்கை வைப்பவர்களும் கோடிக்கணக்கில் இருந்துகொண்டுதான் இருக்கிறார்கள்.

அந்த நம்பிக்கை, அளவு கடந்த துன்பங்களை அனுபவிக்கும்போது, “எல்லாம் அவன் செயல்” என்று சொல்லி ஆறுதல் பெற உதவுகிறது என்பதும் ஒரு நம்பிக்கைதான்.

எதிர்கொள்ளும் பிரச்சினைகளுக்குத் தீர்வு கிட்டாதபோது, “அவன் விட்ட வழி” என்று அவர் மீது பாரத்தைச் சுமத்திவிட்டுக் கவலையைக் குறைத்துக்கொள்ள முயல்பவர்களும் உள்ளனர்.

இஸ்லாமியர்கள் என்றால், பாராட்டுக்குரிய சாதனைகள் நிகழ்த்தினாலும் “எல்லாப் புகழும் அல்லாவுக்கே” என்பார்கள் தன்னடக்கத்துடன்.

ஆக, நல்லது செய்யும்போது, அல்லது நிகழும்போது மட்டுமே நம் மக்கள் கடவுளின் பெருமை பேசுவார்கள்.

தப்புத்தண்டாவில் ஈடுபட்டு மாட்டிக்கொள்ளும்போதுகூட, “இதுவும் ஆண்டவன் செயலே என்று அவன் மீது பழி சுமத்துவதில்லை. “எல்லாப் புகழும் அல்லாவுக்கே” என்று அல்லாவின் புகழ் பாடும் இஸ்லாமியர்கள்கூட, தவறு செய்தாலும், குற்றம் புரிந்தாலும், “எல்லாப் பழியும் இறைவனுக்கே[அல்லாவுக்கே] என்று சொல்வதில்லை.

ஆக, எம்மதம் சார்ந்தவராயினும் எந்தவொரு சூழலிலும் கடவுளை இழித்துரைக்காமலிருப்பதற்கு.....

அவர் மீதான பக்தி என்பதைவிடவும், பழி தூற்றினால் அவர் தண்டிப்பார் என்று அஞ்சுவதே முக்கியக் காரணம் ஆகும்.

ஆனால், இந்த இருபதாம் நூற்றாண்டில், இந்த நிலைமை முற்றிலுமாய் மாறிவிட்டது.

அதற்கு உதாரணமான ஒரு நிகழ்வு பின்வருமாறு:

சென்னை திருவான்மியூரைச் சேர்ந்தவர் 50 வயதான செந்தில் குமார்.

கடந்த 3 ஆண்டுகளாக மனைவியைப் பிரிந்து திருமுடி விநாயகர் கோயில் தெருவில் வடமாநிலத் தொழிலாளர்களுடன் தங்கி வேலை பார்த்துள்ளார்.

இவர்[செந்தில் குமார்] தங்கியிருக்கும் வீட்டிற்கு அருகே மூக்குப்பொடிச் சித்தர் கோயில் உள்ளது. 48 வயதான் ‘கமல் உஸ்மான்’ என்பவர் தினமும் அங்குச் சாமி கும்பிடுவதை[?!] வழக்கமாக்கியிருந்தார்.

எதிர்பாராத வகையில் ஒரு நாள், திருவான்மியூர் காவல் நிலையத்திற்கு வந்த கமல் உஸ்மான், செந்தில் குமாரைக் கொலை செய்துவிட்டதாகச் சரணடைந்தார். இந்தச் சம்பவம் குறித்துக் காவல்துறையினர் அவரிடம் தீவிர விசாரணையில் ஈடுபட்டனர். அப்போது அவர் கூறிய வாக்குமூலத்தைக் கேட்ட போலீசார் அதிர்ச்சியில் உறைந்தனர்.

அவர் கொடுத்த வாக்குமூலத்தில்.....

//செந்தில் குமார் அடிக்கடி அவர் தங்கியிருந்த அறைக்குப் பெண்களை அழைத்து வருவதையும், அவ்வாறு அழைத்துவரும் பெண்களுடன் சித்தர் கோயில் அருகே நின்று பேசுவதையும் அவர்களுடன் பின்னர் சல்லாபிப்பதையும் வாடிக்கையாக வைத்திருந்தார். அவர் இவ்வாறு நடந்துகொண்டது எனக்குச் சுத்தமாகப் பிடிக்காததால், அது குறித்துச் சிவபெருமானிடம்[?!] முறையிட்டேன்.

பல முறை முறையிடவே, ஒரு நாளில், செந்தில் குமாரைக் கொலை செய்யுமாறு கடவுள் கூறினார்.....

கடவுள் சிவபெருமானின் ஆணைக்கிணங்க, செ.குமார் தங்கியிருந்த அறைக்குக் கத்தியுடன் சென்ற நான்[கமல் உஸ்மான்] அவரை 18 முறைக்கு மேல் வயிறு, கழுத்து உள்ளிட்ட பகுதிகளில் குத்திக் கொலை செய்தேன்// என்று கூறியுள்ளார்.

இது கலிகாலம் என்பார்கள்.

கொலை செய்துவிட்டுக் கடவுளின் மீது பழி போடுவது போல, வழிப்பறி, கொள்ளை போன்ற குற்றச் செயல்களில் ஈடுபடுவோரும், வன்புணர்வு செய்வோரும்கூட, கடவுளின் தூண்டுதலால் குற்றம் செய்ததாகக் கூறும் நாள் வெகு தொலைவில் இல்லை எனலாம்.

எல்லாம் அவன் செயல்! எல்லாப் பழியும் இறைவனுக்கே!!

                                       *   *   *   *   *

https://tamil.news18.com/chennai/god-said-to-kill-him-murderer-shocks-police-with-his-statement-1212333.html