கடவுள்களின் கடவுள் மொழி தமிழ்!!!

தஞ்சைப் பெரிய கோயிலில் தமிழ் மொழியில் குடமுழுக்கு நடத்தப்பட வேண்டும் என்னும் தமிழர்களில் கோரிக்கைக்கு எதிராக, சென்னை மயிலாப்பூர் பகுதியைச் சேர்ந்த ரமேஷ் என்னும் நபர், சமஸ்கிருதத்தில்தான் குடமுழுக்கு நடத்தப்பட வேண்டும் என்று உயர் நீதிமன்றக் கிளையில் ஒரு மனுவைத் தாக்கல் செய்துள்ளார்.

அவர் சார்பாக நீதிமன்றத்தில்  அவருடைய வழக்கறிஞர் வாதிடும்போது.....

“சமஸ்கிருதம் தேவமொழி என்பதால் அதில் மந்திரங்கள் ஓதித்தான் குடமுழுக்கு நடத்தப்பட வேண்டும்” என்று கூறியிருக்கிறார்.

இம்மாதிரியான பேர்வழிகளிடம் நாம் கேட்கும் கேள்வி, “இன்னும் எத்தனை காலத்திற்குத் தமிழர்களை முட்டாள்கள் ஆக்கும் கில்லாடி வேலையைச் செய்யப் போகிறீர்கள்?” என்பதுதான்.

உங்கள் கூற்றுப்படி, தேவன் என்று ஒருவர் இருப்பது உண்மையானால் அவர் சமஸ்கிருதத்தை எப்போது உருவாக்கினார்? [உலகிலுள்ள அத்தனை மனித இனத்தவரும் தமக்கான ஒரு மொழியைத் தாமே படைத்துக்கொண்டிருக்கும்போது, சமஸ்கிருதத்தைத் தாய்மொழியாகக் கொண்டிருந்த இனத்தவர்களுக்கு மட்டும் தமக்கான ஒரு மொழியை உருவாக்கிக்கொள்வதற்கான அறிவு வாய்க்காமல் போனது ஏன்?]

தொடர்ந்து நீங்கள் இவ்வாறான ஒரு பொய்யைப் பரப்புரை செய்துகொண்டிருப்பீர்களேயானால், “தமிழ் தேவாதி தேவ பாஷை” என்னும் பொய்யை மனம் கூசாமல் சொல்லுவோம் என்பதை அறிவீர்களாக.

“சமஸ்கிருதம் அதிர்வலைகளைக் கொண்டது” என்று வழக்கறிஞர் கூறியிருக்கிறார்..

இப்படியொரு அதிர்வலை இருப்பதை ஏதேனும் ஒரு கருவியின் மூலம் உலகறிய நிரூபித்திருக்கிறீர்களா?

பொய் சொல்வதற்கும் ஓர் எல்லை இல்லையா?

சமஸ்கிருதத்தை உச்சரிக்கும்போது ஒருவித சக்தி பரவுவதாகவும் கதை அளந்திருக்கிறார் வழக்கறிஞர். நாம் எழுப்பும் மிக முக்கியக் கேள்வி......

அந்தச் சக்தியைக் கொண்டு நீங்கள் சாதித்தது என்ன? எத்தனை பேருடைய குறைகளைக் களைந்திருக்கிறீர்கள்? எத்தனை கெட்டவர்களை நல்லவர்கள் ஆக்கியிருக்கிறீர்கள்?

இனியும் இப்படி, சமஸ்கிருதத்தைத் தேவ பாஷை என்று பொய் சொல்லிக்கொண்டிருப்பீர்களேயானால், ஒட்டுமொத்த தமிழர்களாலும் புறக்கணிக்கப்பட்டு நீங்கள் தனிமைப்படுத்தப் படுவீர்கள் என்று எச்சரிக்கை செய்கிறோம்.
========================================================================
கிண்டிலில் ‘என் பக்கம்’[Author Page]:
amazon.com/author/haipasi

‘அணுகுண்டைவிடவும் ஆபத்தானது மதவெறி!’...விஞ்ஞானிகள்.

‘மூடநம்பிக்கைகளை எதிர்ப்பவர்கள், மாட்டிறைச்சி உண்பவர்கள், தகவல் அறியும் உரிமைச்சட்ட ஆர்வலர்கள், அப்பாவிப் பொதுமக்கள் ஆகியோர் மத வெறியர்களால் கொல்லப்படுவது தடுத்து நிறுத்தப்படவேண்டும்.’ 

மேற்கண்ட கோரிக்கைகள் அடங்கிய மனு ஒன்று, சென்னை கணித அறிவியல் நிறுவனம், டெல்லி ஜவஹர்லால் நேரு பல்கலைக்கழகம் மற்றும் ஐஐடிகள் உட்படப் பல்வேறு நிறுவனங்களில் பணியாற்றும் சுமார் 130 விஞ்ஞானிகளால் கையெழுத்து இடப்பட்டு, குடியரசுத் தலைவருக்கு அனுப்பப்பட்டுள்ளது - இது இன்றையப் பத்திரிகைச்[தி இந்து 29.10.2015] செய்தி.

‘பல்வேறு வகைப்பட்ட மக்களின் சமூக, கலாச்சார இழைகள் பின்னிப்பிணைந்து உருவாக்கியுள்ள ஒற்றுமை உணர்வுதான், நம் நாட்டின் நாகரிகச் சிறப்புக்குப் பெரும் வலிமை சேர்த்துக்கொண்டிருக்கிறது. இந்தப் பெருமைகளுக்கும் சிறப்புகளுக்கும் மத வெறியர்கள் மற்றும் அடிப்படைவாதிகளால் தற்போது ஆபத்து ஏற்பட்டுள்ளது. மக்களை மத ரீதியாகப் பிளவுபடுத்தும் முயற்சிகள் நடைபெறுகின்றன. மத ரீதியாகப் பிளவுபட்ட ஒரு சமூகம் என்பது அணுகுண்டைவிடவும் ஆபத்தானது’ என்று கோரிக்கை வைப்பதற்கான காரணங்களையும் அவர்கள் விவரித்திருக்கிறார்கள்; தற்போதைய சூழலைக் கருத்தில் கொண்டு உரிய நடவடிக்கை எடுக்குமாறு குடியரசுத் தலைவரிடம் வேண்டுகோள் வைத்திருக்கிறார்கள்.

அறிவியல் அறிஞர்கள், கண்டுபிடிப்புகளை நிகழ்த்துவது மட்டுமே தம் கடமை என்றிருந்துவி்டாமல், மதவெறி பிடித்த மூடர்களின் அடாவடித்தனங்களைக் கண்டித்திருப்பது போற்றத்தக்க செயலாகும்.

மேற்கண்ட மனு குறித்துக் குடியரசுத் தலைவர் நடுவணரசுக்குப் பரிந்துரை செய்து, அதன் அடிப்படையில் நடவடிக்கை ஏதும் எடுக்கப்பட்டதாகச் செய்தி ஏதும் வெளியாகவில்லை.

இன்றளவும் மதவெறியர்களின் கட்டற்ற வெறியாட்டம் தொடர்ந்துகொண்டுதான் இருக்கிறது.