வேட்பாளர்களா, வாக்காளர்களா, கடவுள்களா இவர்களில் ஆகச் சிறந்த முட்டாள்கள் யார்?!

ஒருவன் தன்னைப் ‘பரம யோக்கியன்’ என்று பிறரை நம்ப வைப்பதற்குக் கையாளும் உத்திகளில் ஒன்று கடவுள் பக்தனாக முன்னிலைப்படுத்துவது.

இந்த உத்தியைத் தேர்தலில் போட்டியிடும் அரசியல்வாதிகள் வெகு சிறப்பாகக் கையாள்கிறார்கள்.

எடப்பாடியார், ‘பாஜக’ எல்.முருகன் போன்றோர் பரப்புரையைத் தொடங்குவதற்கு முன்னால், கோயில்களுக்குச் சென்று வழிபட்டார்கள் என்பது ஊடகச் செய்தி.

பாஜக அண்ணாமலை, கோவை மாவட்டப் பேரூரிலுள்ள மடத் தலைவரை வணங்கி ஆசி பெற்றிருக்கிறார்.

2024 தேர்தலில் போட்டியிடவுள்ள அனைத்துக் கட்சி வேட்பாளர்களில் மிகப் பெரும்பாலோர் கோயில்களுக்குச் சென்று வழிபட்ட பிறகே[காணொலியாக்கி ஊடகங்களிலும் வெளியிடுகிறார்கள்] தேர்தல் பணிகளைத் தொடங்குவார்கள்/தொடங்கியிருப்பார்கள் என்பதில் சிறிதளவும் சந்தேகத்திற்கு இடமில்லை.

இவர்களின் இச்செயல் முழுக்க முழுக்க, மக்களை மூடர்களாக்கி ஓட்டுப் பெறுவதற்கான ‘ஓரங்க நாடகம்’ என்பது நம் குற்றச்சாட்டு.

“இல்லை இல்லை. வெற்றிக்கு எங்களின் தெய்வங்கள் உதவும் என்ற மனப்பூர்வமான நம்பிக்கையில்தான் வழிபடுகிறோம்” என்று கூறுவார்களேயானால்.....

இவர்கள் தேர்தலில் தோல்வியைத் தழுவினால், “நாங்கள் நம்பிய கடவுள்கள் எங்களைக் கைவிட்டுவிட்டார்கள்” என்று பகிரங்கமாக அறிவிப்புச் செய்வார்களா?

அல்லது,

“நாங்கள் உண்மையான மக்கள் தொண்டர்களாகவும், யோக்கியர்களாகவும் இருந்திருந்தால் அவர் எங்களைக் கைவிட்டிருக்கமாட்டார்” என்று மனம் திறந்து சொல்வார்களா?

அல்லது, 

“நாங்கள் அயோக்கியர்கள் என்றாலும், மன்னித்து எங்களுக்கு அவர் அருள்பாலித்திருக்க வேண்டும். அதைச் செய்யாததால் அவர் கருணையுள்ளவர் அல்ல; வழிபடத் தக்கவரும் அல்ல” என்று துணிந்து சொல்வார்களா?

இந்தவொரு துணிச்சல் தேர்தலில் போட்டியிடும் அனைத்து வேட்பாளர்களுக்கும் தேவை என்பது நம் எண்ணம். இதன் மூலம், ‘கடவுளை நம்பினோர் கைவிடப்படார்’ என்னும் மூடநம்பிக்கையிலிருந்து மக்கள் விடுபடுவது உறுதி.

முக்கியக் குறிப்பு:

நம்மைப் போன்ற அறிவுஜீவி[ஹி... ஹி... ஹி!!!]களிடமிருந்து இவ்வாறான மண்டை காய வைக்கும் கேள்விகளை வேட்பாளர்கள் தவிர்க்க விரும்பினால்.....

கோயில்களுக்குச் சென்று சாமி சிலைகளுக்கு முன்னால் நீட்டிப் படுத்துக் கும்பிட்டு வேண்டுதல் வைப்பதைத் தவிர்த்துவிட்டு, வாக்காளர்களையே கடவுள்களாக மதித்து, அவர்களின் கால்களில் விழுந்து வணங்கி வாக்குச் சேகரிப்பதே புத்திசாலித்தனம் ஆகும்!

‘தினமணி’யில் வெளியானதொரு கருத்துப் படமும்[கீழ்க்காண்பது] இதைத்தான் சொல்கிறது.

“ஆன்மிகமும் அரசியலும் பிரிக்கக் கூடாதவை”... அறிஞர் அண்ணாமலை!!!

//எப்பவுமே அரசியல் என்பது அறம் சார்ந்து இருக்க வேண்டும். ஆன்மிகத்தையும், அரசியலையும் பிரித்துப் பார்க்கக் கூடாது. எப்பொழுது எல்லாம் அரசியலில் அரசியல்வாதிகள் தவறு செய்கிறார்களோ, அந்தச் சமயங்களில் அவர்கள், ஆதீனங்களையும் குருமார்களையும் சந்தித்து அறிவுரைகளைப் பெற்று, அதைத் திருத்திக்கொள்ள வேண்டும்//

மேற்கண்ட தத்துவ முத்தை உதிர்த்திருப்பவர் தமிழ்நாடு ‘பாஜக’ தலைவர் அண்ணாமலை அவர்கள்.

“அரசியல் என்பது அறம் சார்ந்து இருக்க வேண்டும்” என்கிறார் இவர்.

இதில் மாற்றுக் கருத்துக்கு இடமே இல்லை.

அரசியல்வாதிகள் அறநெறி பிறழாமல் செயல்படுவது அவர்களுக்கான மிக முக்கியத் தகுதிகளில் ஒன்று.

அந்நெறி பிறழ்பவன் சுயநலவாதி. மக்களால் தேர்ந்தெடுக்கப்படுகிற அவனால் மக்களுக்கு நன்மைகள் விளைவதில்லை.

எனவே, “அரசியல் என்பது அறம் சார்ந்திருத்தல் வேண்டும்” என்று அண்ணாமலை கூறியது வரவேற்கத்தக்கது.

“அரசியலையும் ஆன்மிகத்தையும் பிரித்துப் பார்த்தல் கூடாது” என்று அவர் கூறியிருப்பதுதான் நகைப்பூட்டுகிறது.

ஆறறிவைப் பெற்ற மனிதர்கள் எப்போது ஒன்றுபட்டு ஒரு குழுவாக இணைந்து, ஒரு தலைவனையோ, தலைவர்களையோ தங்களை ஆளுபவர்களாக ஏற்றுக்கொண்டார்களோ அப்போதே அரசியல் அமைப்பும் உருவாகிவிட்டது.

ஆக, அரசியல் என்பது மக்கள் வாழ்க்கையில் இரண்டறக் கலந்துவிட்ட ஒன்று.

ஆன்மிகம் என்பது இதனின் வேறுபட்டது. தமக்கும் மேம்பட்ட சக்தியைக் கடவுள் என்று சொல்லி, அவரை வழிபட்டால் நன்மைகள் உண்டு என்னும் நம்பிக்கை சிலரால் திணிக்கப்பட்டு, மக்களும் அதை நம்பத்தொடங்கியபோது உருவானது ஆன்மிகம்.

அது இயற்கையானது அல்ல; ‘இடைச் செருகல்’ என்று சொல்லலாம்.

அது முழுக்க முழுக்க நம்பிக்கையின் பாற்பட்டது. ஆன்மிகத்தை ஏற்காத அரசியல்வாதிகள் அன்று இருந்தார்கள்; இன்றும் இருக்கிறார்கள்.

எனவே, அரசியல்வாதி ஆன்மிகராகவும் இருத்தல் அவசியமில்லை.

ஆன்மிகத்தைப் புறக்கணித்து, மக்கள் பணிக்காகவே தங்களின் வாழ்வை அர்ப்பணித்தவர்கள் இருந்தார்கள்; இருக்கிறார்கள்.

இதைச் சொல்வதற்கோ, புரிந்துகொள்வதற்கோ அறிஞராக இருத்தல் அவசியமில்லை; வெகு சாமானிய மக்களுக்கே இது சாத்தியம்தான்.

ஆன்மிகத்தையும் அரசியலையும் பிரித்துப் பார்க்கக் கூடாது என்று சொன்ன அண்ணாமலை ஒரு சாமானியராகக்கூட இல்லை என்பது பெரிதும் வருந்தத்தக்கது.

தலைவன் எவ்வழி தொண்டன் அவ்வழி!

* * * * *

https://www.maalaimalar.com/news/state/tamil-news-annamalai-says-spirituality-and-politics-should-not-be-separated-709743?utm_source=newsshowcase&utm_medium=gnews&utm_campaign=CDAqEAgAKgcICjDtzp8LMPrYtwMw1tr-Ag&utm_content=rundown