செவ்வாய், 17 நவம்பர், 2026

பகிரங்க எச்சரிக்கை[காணொலி] வேண்டாம்; பயனுள்ள நடவடிக்கை தேவை முதல்வரே!


“கட்சிப் பதவியில் இருப்பவர்கள் தவறு செய்தால் பதவி பறிக்கப்படும்” என்று பகிரங்க எச்சரிக்கை விடுத்திருக்கிறீர்கள் ஜோசப்.

ஓசைப்படாமல் தப்புப் பண்ணினவன் மேல் நடவடிக்கை எடுத்தாலே எவனும் அதைச் செய்யமாட்டான்; பகிரங்க எச்சரிக்கை[நீங்கள் நேர்மையானவர் என்று மக்களை நம்பவைக்கும் ஏமாற்று வேலை]யும் தேவைப்படாது.

ஆக்ரோஷத்தின் உச்சியை அடைந்துவிட்டீர்களாமே!

உங்கள் கட்சியைச் சேர்ந்த ச.ம.உறுப்பினர் செய்த அசிங்கச் செயல் பட்டிதொட்டிவரை பரவிக்கிடக்கிறது.

அவரைத் தண்டிக்காமல் நீங்கள் ஆக்ரோஷத்தின் உச்சியிலேயே இருந்துகொண்டிருந்தால், அங்கிருந்து தலைகுப்புற விழவேண்டியிருக்கும்; எழவே முடியாது.

‘தலைவர்[நீங்கள்] காலடி படும் இடமெல்லாம் அதிருது; குலுங்குது’ என்பது போல், கைக்கூலி ஊடகங்கள் செய்தி வெளியிடுவதைத் தடுத்து நிறுத்துவது கௌரவமான பதவி வகிக்கும் உங்களுக்கு நல்லது.

‘வெற்று ஆரவாரம் தவிர்த்து மனப்பூர்வமாய் மக்கள் நலனில் அக்கறை செலுத்துவதே முதல்வரின் கடமை’ என்பதை மறவாதீர்கள் ஜோசப்!
                                                                  =============

பெரியார் அறிவுலகம் ‘மகா மகா மகா பெரியவாள் ஆன்மிக உலகம்’ ஆகுமா?!

கோவை பெரியார் அறிவுலக நூலகத்திற்குப் புத்தகங்கள் வாங்கியதில் நடைபெற்றதாகக் கூறப்படும் முறைகேடுகளைச் சுட்டிக்காட்டி, அந்தப் பாவம் நீங்க வேண்டுமென்றால், நூலகத்தில் மகா பெரியவாள்>காஞ்சி சங்கராச்சாரி< புத்தகங்களை[ரா. கணபதி தொகுத்த தெய்வத்தின் குரல் போன்றவை] எடுத்து அத்தனைத் தொகுதிகளையும் ரேக்குகளில் அடுக்கினால்தான், அந்தப் பாவம் போகும் என நான் மனதார நம்புகிறேன்" என்று ஒரு புத்தக வெளியீட்டு விழாவில் பேசியுள்ளார் நீதிபதி ஜி.ஆர்.சுவாமிநாதன்[ஊடகச் செய்தி]. 

நீதிபதி என்பதைவிடவும் இவரை ‘நீதிஅதிபதி’ என்று போற்றலாம். அந்த அளவுக்கு ஒரு பிராமணராக அல்லாமல், மனிதராக இருந்து வழக்குகளில் தீர்ப்பு வழங்கி, நீதி நெறி போற்றிப் பாதுகாப்பவர் இவர்.

தமிழை ‘நீச பாஷை’ என்று பழித்தவர்தான் என்றாலும், மக்கள் சாதிமதப் பேதங்களின்றி, சமதர்மம் போற்றி, பாவச் செயல்கள் தவிர்த்து, 100% புண்ணியராக வாழ்ந்திட  அருள்பாலித்த மகா பெரியவாவின் நூல்களைப் பெரியார் அறிவுலக நூலகத்தில் சேர்த்தால், செய்த பாவத்திலிருந்து விடுபடலாம் என்று நீதிஅதிபதி சுவாமிநாதனார் கூறியதில் ஒரு திருத்தம்.....

நூல்களைச் சேர்ப்பதால், பாவத்தில் ஒரு பகுதி மட்டுமே நீங்கும். முழுப் பாவமும் நீங்க, ‘பெரியார் அறிவுலகம்’ என்னும் பெயரை அகற்றிவிட்டு, நூலகத்திற்கு, ‘மகா மகா மகா பெரியவாள் ஆன்மிக உலகம்’ என்று பெயர் சூட்டுதல் வேண்டும். 

இதற்கான நடவடிக்கையை ‘தவெக’ அரசு உடனடியாக மேற்கொள்ளும் என்று நம்புகிறோம்.